ភ្នំពេញ ៖ ប្រជាពលរដ្ឋប្រមាណ ៣០ គ្រួសារ នៅក្នុងសហគមន៍តាតុក ដែលស្ថិតនៅក្នុងតំបន់ជើងឯក បាននាំគ្នាតវ៉ាដោយលើកបដាស្នើសុំដល់លោកឃួងស្រេងអភិបាលរាជធានីភ្នំពេញ ដើម្បីជួយដោះស្រាយបញ្ហាដីលំនៅឋានជូនពួកគាត់ ដោយស្នើសុំអភិវឌ្ឍន៍នៅនឹងកន្លែងដោយកាត់ឆ្វៀលចេញពីគម្រោងអភិវឌ្ឍន៍។
ការតវ៉ានៅពីខាងមុខសាលារាជធានីភ្នំពេញកាលពីរសៀលថ្ងៃទី ១៣ ខែមិថុនានេះ តំណាងប្រជាពលរដ្ឋអ្នកស្រី ប៉ោ ស្រីម៉ៅ បាននិយាយប្រាប់អ្នកកាសែតថា ៖ ពួកគាត់រស់នៅក្នុងសហគមន៍តាតុក ស្ថិតក្នុងភូមិព្រែកថ្លឹង សង្កាត់ជើងឯក ខណ្ឌដង្កោ រាជធានីភ្នំពេញ ដែលមានចំនួន ៣០គ្រួសារ រស់នៅលើដីទំហំប្រមាណ ១ ហិចតា តាមបណ្ដោយប្រឡាយ ០៣ បាននាំគ្នាទាំងចាស់ទាំងក្មេងមកបដាស្នើសុំឯកឧត្តម ឃួង ស្រេង អភិបាល នៃគណៈអភិបាលរាជធានីភ្នំពេញ ដើម្បីឲ្យជួយឆ្វៀលដីសហគមន៍តាតុកចេញពីគម្រោងអភិវឌ្ឍន៍ប្រឡាយ ០៣ តាមផែនការអភិវឌ្ឍជម្រើសរបស់ប្រជាពលរដ្ឋនិងផ្ដល់ប័ណ្ណកម្មសិទ្ធិដីធ្លីដល់សហគមន៍យើងខ្ញុំ។
ចំណែកអ្នកស្រីណាងស្រីរ័ត្នជាតំណាងសមាគមតាតុកបាននិយាយផងដែរថាយើងខ្ញុំទាំងអស់គ្នាមកពីសង្គមតាតុកមានបំណងចូលរួមរៀបចំទីក្រុងឲ្យមានសណ្ដាប់ធ្នាប់និងមានសោភ័ណភាពល្អប្រសើរព្រមទាំងបង្កលក្ខណៈងាយស្រួលដល់ការរស់នៅរបស់ប្រជាពលរដ្ឋអាស្រ័យហេតុនេះ សូមឯកឧត្តមអភិបាលនៃគណៈអភិបាលរាជធានីភ្នំពេញជួយដោះស្រាយតាមសំណើស្នើសុំដោយក្តីអនុគ្រោះផងចុះ។
ទោះយ៉ាងណាបន្ទាប់ពីមានការតវ៉ាអាជ្ញាធរសាលារាជធានីភ្នំពេញ បានអនុញ្ញាតឲ្យតំណាងប្រជាពលរដ្ឋ ៥ នាក់ ចូលជួបដោះស្រាយនៅក្នុងសាលារាជធានីភ្នំពេញ៕ ដោយ៖កូឡាប