សហរដ្ឋអាមេរិចបានធ្វើការចោទប្រកាន់ប្រទេសអ៊ីរ៉ង់ថា ជាអ្នកនៅពីក្រោយការវាយប្រហារកប៉ាល់ដឹកប្រេងចំនួន ២គ្រឿងនៅឈូងសមុទ្រអូម៉ង់ ប៉ុន្តែភាគីអ៊ីរ៉ងបានបដិសេធការចោទប្រកាន់នោះ។
រដ្ឋមន្ត្រីការបរទេសអាមេរិច លោក Mike Pompeo បានចោទប្រកាន់អ៊ីរ៉ង់ថា ជាអ្នកនៅពីក្រោយការវាយប្រហារដែលកើតឡើងកាលពីថ្ងៃព្រហស្បតិ៍័ ម្សិលមិញនេះ។
លោកថា អាមេរិចបានធ្វើការចោទប្រកាន់ដោយផ្អែកទៅលើការស៊ើបអង្កេតលើប្រភេទអាវុធដែលប្រើប្រាស់ក្នុងការវាយប្រហារនោះ។
ប៉ុន្តែត្រូវបានភាគីអ៊ីរ៉ង់បដិសេធ និងបានចាត់ទុកវាថាជាការចោទប្រកាន់គ្មានសមហេតុផលសោះ។
មន្ត្រីជាន់ខ្ពស់អ៊ីរ៉ង់ម្នាក់បានថ្លែងប្រាប់ BBC ថា”អ៊ីរ៉ង់គ្មានការពាក់ព័ន្ធនឹងការផ្ទុះនោះទេ”។
សូមបញ្ជាក់ថា កាលពីម្សិលមិញមានការវាយប្រហារទៅលើកប៉ាល់ដឹងប្រេងចំនួន ២គ្រឿងដែលមួយគ្រឿងជារបស់ក្រុមហ៊ុនជប៉ុន Kokuka Courageous និងមួយទៀតរបស់ក្រុមហ៊ុនណូវេរ។
ទាំងអ៊ីរ៉ង់ និងអាមេរិចបញ្ជាក់ថា ពួកគេជាអ្នកជួយជន្លៀសមនុស្សនៅលើកប៉ាល់នោះចេញ។
នៅក្នុងសេចក្តីប្រកាសនៅថ្ងៃសុក្រនេះ បេកសកម្មអ៊ីរ៉ង់ប្រចាំអង្គការសហប្រជាជាតិបាននិយាយថា “អ៊ីរ៉ង់បដិសេធដាច់ខាតចំពោះការអះអាងគ្មានហេតុផលរបស់អាមេរិច ជុំវិញការវាយប្រហារលើកប៉ាល់ដឹកប្រេងនៅថ្ងៃទី ១៣ ខែមិថុនា និងសូមធ្វើការថ្កោលទោស”៕ សុភ័ក្រ