ខេត្តព្រះសីហនុ ៖ មន្ត្រីនគរបាលស្រុកស្ទឹងហាវ បានឲ្យដឹងថា សមត្ថកិច្ចជំនាញ បានបើកយុទ្ធនាការចុះបង្ក្រាបបទល្មើសគ្រឿងញៀន១ករណី ដោយឃាត់ខ្លួនជនសង្ស័យចំនួន២នាក់ និងរឹបអូសបានថ្នាំញៀន ២កញ្ចប់ធំ។
លោកវរសេនីយ៍ឯក រស់ កី អធិការនគរបាលស្រុកស្ទឹងហាវ បានឲ្យដឹងថា យុទ្ធនាការចុះបង្ក្រាបបទល្មើសគ្រឿងញៀននេះ ធ្វើឡើងកាលពីរសៀល ថ្ងៃទី១៣ ខែមិថុនា ឆ្នាំ២០១៩ ស្ថិតក្នុងក្រុមទី១៣ ភូមិ៤ ឃុំទំនប់រលក ស្រុកស្ទឹងហាវ ខេត្តព្រះសីហនុ។
លោក រស់ កី បន្តថាសកម្មភាពរបស់សមត្ថកិច្ចជំនាញ បានឈានទៅឃាត់ខ្លួនជនសង្ស័យប្រុស-ស្រីចំនួន ២នាក់ ៖ ឈ្មោះ ឆៃ សុវណ្ណារ៉ា ភេទប្រុស អាយុ ២៩ឆ្នាំ មានទីលំនៅសង្កាត់លេខ១ ក្រុងព្រះសីហនុ និង ឈ្មោះ ម៉េត សុភ័ណ្ឌភេទស្រី អាយុ ២៧ឆ្នាំ មានទីលំនៅ សង្កាត់លេខ១ ក្រុងព្រះសីហនុ។
ចំណែកវត្ថុតាង ដែលសមត្ថកិច្ច ចាប់យកបានរួមមាន៖ ម្សៅក្រោមពណ៌ ស ថ្លា សង្ស័យ ជាសារធាតុញៀន ចំនួន២កញ្ចប់ធំ។ កញ្ឆារ ១ កញ្ចប់តូច និងឧបករណ៍សម្រាប់ប្រើប្រាស់ ដើម្បីជក់គ្រឿងញៀន មួយចំនួនទៀត។
លោក រស់ កី អធិការនគរបាលស្រុកស្ទឹងហាវ បន្ថែមថា ជនសង្ស័យបទល្មើសគ្រឿងញៀនទាំងពីរនាក់នេះ គឺជាមុខសញ្ញាចែកចាយគ្រឿងញៀនផ្ទាល់ ហើយសមត្ថកិច្ចរបស់លោក បានតាមដានចំពោះសកម្មភាពរបស់ជនសង្ស័យជាយូរមកហើយ មុនឈានដល់ចាប់ឃាត់ខ្លួន។
បច្ចុប្បន្ននេះ ជនសង្ស័យបទល្មើសគ្រឿងញៀនខាងលើនេះ សមត្ថកិច្ចជំនាញ កំពុងកសាងសំណុំរឿងបញ្ជូនជនសង្ស័យទាំង ២នាក់ ទៅកាន់សាលាដំបូងខេត្តព្រះសីហនុ ដើម្បីបន្តនីតិវិធីតាមច្បាប់៕ ដែន សីមា