ខេត្តស្វាយរៀង ៖ ថ្នាំញៀនប្រភេទម៉ាទឹកកកចំនូន ១៧ ដុំ ត្រូវបានសមត្ថកិច្ចព្រំដែនធ្លក នៃវរសេនាតូច៦១១ ក្របួចបាន ខណៈប្រុងលោតឆ័ត្រទៅវៀតណាម។
សមត្ថកិច្ចបានឱ្យដឹងថា ៖ នៅវេលាម៉ោង២០និង០០នាទីយប់ថ្ងៃទី១៣ ខែមិថុនា ឆ្នាំ ២០១៩ កម្លាំងប៉ុស្តិ៍នគរបាលការពារព្រំដែនធ្លកនៃវរៈសេនាតូច៦១១ បានចេញល្បាតតាមខ្សែបន្ទាត់ព្រំដែនត្រង់ចំណុចចន្លោះបង្គោលព្រំដែនលេខ១៧០និង១៧១ខាងជើងច្រកទ្វារអន្តរជាតិបាវិត ចម្ងាយប្រហែល ៥០០ ម៉ែត្រ បានឃើញមនុស្សម្នាក់ ភេទប្រុស ជនជាតិវៀតណាម យួរវ៉ាលីសដើរកាត់ស្រែកម្លាំងយើងក៍បានហៅឲ្យឈប់តែជននោះមិនព្រមឈប់ ហើយក៏បានទំលាក់វ៉ាលីចោលរួចរត់ចូលព្រៃប្រេងខ្យល់បាត់ស្រមោលតែម្តង។
ប្រភពដដែលបានឱ្យដឹងទៀតថា ៖ ក្រោយពេលដែលបុរសជនជាតិវៀតណាមនោះរត់បាត់ សមត្ថកិច្ចបានប្រើកម្លាំងរុករកដែរ តែមិនឃើញមនុស្សឡើយ គឺឃើញតែវ៉ាលីសហើយនៅក្នុងវ៉ាលីនោះមានថ្នាំញៀនប្រភេទម៉ាទឹកកកចំនូន ១៧ ដុំ បច្ចុប្បន្នរក្សាទុកនៅស្នាក់ការប៉ុស្តិ៍ការពារព្រំដែនធ្លក ចំពោះមុខសញ្ញា សត្ថកិច្ចយើងនិងសហការជាមួយសមត្ថកិច្ច ដើម្បីធ្វើការស្រាវជ្រាវស្វែងរកមុខសញ្ញាបន្តទៀត ៕ ដោយ ៖ វ៉ៃកូ
