ខេត្តស្វាយរៀង ៖ លោក ម៉ែន វិបុល អភិបាលខេត្តស្វាយរៀង និងឯកឧត្តមបណ្ឌិត សុខ ទូច ប្រធានរាជបណ្ឌិត្យសភាកម្ពុជានាព្រឹកថ្ងៃទី១៤ ខែមិថុនា ឆ្នាំ២០១៩នេះ បានជួបពិភាក្សាការងារជាមួយក្រុមស្រាវជ្រាវព្រំដែនកម្ពុជា-វៀតណាម នៃរាជបណ្ឌិតសភាកម្ពុជានៅសាលប្រជុំមន្ទីរ អគារ ខ សាលាខេត្តស្វាយរៀង ។
អញ្ជើញចូលរួមក្នុងកិច្ចប្រជុំនេះមាន ប្រតិភូក្រុមការងារស្រាវជ្រាវព្រំដែន កម្ពុជា-វៀតណាម នៃរាជបណ្ឌិត្យ សភាកម្ពុជា លោកអភិបាលរងខេត្ត លោកប្រធានមន្ទីរ-អង្គភាព តំណាងកងកម្លាំងទាំងបី អភិបាលក្រុង ស្រុក កងកម្លាំងវរៈព្រំដែន ប្រធានច្រកទ្វារព្រំដែនអន្តរជាតិ និងទ្វេភាគី និងអស់លោក លោកស្រី ដែលជាសមាជិកអនុគណៈកម្មាធិការព្រំដែនខេត្តជាច្រើនរូបទៀត។
មានប្រសាសន៍នៅក្នុងឱកាសនោះលោក ម៉ែន វិបុល អភិបាលខេត្តបានជម្រាបជូនអំពីស្ថានភាពភូមិសាស្ត្រនៅតាមខ្សែបន្ទាត់ព្រំដែនកម្ពុជាវៀតណាម និងសម្ដែងនូវការអរគុណចំពោះលោកបណ្ឌិត សភាពចារ្យសុខ ទូចប្រធានរាជបណ្ឌិត្យសភាកម្ពុជា ព្រមទាំងគណៈប្រតិភូអមដំណើរដែលបានអញ្ជើញចុះមកបំពេញបេសកកម្ម ដើម្បីសិក្សាឈ្វេងយល់ពីស្ថានភាពព្រំដែន នៅក្នុងភូមិសាស្ត្រខេត្ដស្វាយរៀង នាពេលនេះ។ ក្នុងនាមអនុគណៈកម្មាធិការព្រំដែនខេត្ត សូមសម្ដែងនូវការគាំទ្រ និងសហការសម្រប សម្រួលជានិច្ចជាមួយក្រុមការងារ ដើម្បីគាំទ្រកិច្ចការដ៏មានសារៈសំខាន់នេះ ឲ្យទទួលបានលទ្ធផលជោគជ័យ សម្រាប់ជាប្រយោជន៍របស់ប្រទេសជាតិយើងនិយាយជារួម និងក្នុងខេត្តស្វាយរៀងនិយាយដោយឡែក ។
លោកអភិបាលខេត្តបានបន្តថា ក្នុងនាមអនុគណៈកម្មាធិការព្រំដែនខេត្តសូមស្នើដល់កងកម្លាំងដែលកំពុងឈរជើងការពារនៅតាមខ្សែបន្ទាត់ព្រំដែន រដ្ឋបាលក្រុង ស្រុកជាប់ព្រំដែន ដែលមានវត្តមាននៅទីនេះស្រាប់ត្រូវត្រៀមសហការសម្របសម្រួល និងបង្កលក្ខណៈងាយស្រួលគ្រប់បែបយ៉ាងជាមួយក្រុមការងារ រាជបណ្ឌិត សភាកម្ពុជា ដើម្បីឲ្យការចុះបំពេញបេសកកម្ម សិក្សាស្រាវជ្រាវតាមខ្សែបន្ទាត់ព្រំដែននៅខេត្ដស្វាយរៀង ទទួលបានលទ្ធផលល្អ និងជោគជ័យតាមផែនការដែលបានគ្រោងទុក ៕ ដោយ ៖ វ៉ៃកូ