ខេត្តព្រះសីហនុ ៖ រដ្ឋបាលខេត្តព្រះសីហនុ រួមជាមួយមន្ត្រីជំនាញស្ថាប័នពាក់ព័ន្ធ ក្រោមឱវាទ នៃរដ្ឋបាលខេត្តនេះ បានជួបប្រជុំគ្នា ជាមួយប្រតិភូបរទេស ដឹកនាំដោយ លោកស្រី Katelijn Van Den Berg អ្នកឯកទេសជាន់ខ្ពស់ផ្នែកបរិស្ថាន និងជាប្រធានក្រុមការងារប្រឹក្សាយោបល់ នៃវិទ្យាស្ថានឧស្សាហកម្មបរិស្ថាន និងបច្ចេកវិទ្យា នៃសាធារណរដ្ឋកូរ៉េ KEITI ស្តីពីគម្រោងសំណល់រឹង និងប្លាស្ទិច។
ជំនួបពិភាក្សានេះ ធ្វើឡើងកាលពីរសៀលថ្ងៃទី១៣ ខែមិថុនា ឆ្នាំ២០១៩ នាសាលប្រជុំសាលាខេត្តព្រះសីហនុ។
ជំនួបពិភាក្សាខាងលើនេះ គឺភាគីប្រទេសកូរ៉េ មានគម្រោងផ្តល់ជំនួយបច្ចេកទេស នៅលើផ្នែកកាកសំណល់រឹង និងប្លាស្ទិច នៅមូលដ្ឋានខេត្តព្រះសីហនុ ដើម្បីឲ្យមានបរិស្ថានអនាម័យប្រសើរជាងពេលបច្ចុប្បន្ននេះ។
នាឱកាសនោះ លោក ជាវ វិជ្ជាក់ អភិបាលរងខេត្តព្រះសីហនុ ដែលបានដឹកនាំកិច្ចប្រជុំ បានស្វាគមន៍ និងជម្រាបជូនប្រតិភូមកពីប្រទេសកូរ៉េថា ក្រុងព្រះសីហនុ ចែកជា ៦សង្កាត់ និងមានប្រជាពលរដ្ឋចំនួន ៧៥.២១០នាក់ (ស្ថិតិឆ្នាំ២០១៨) និងមានជនបរទេស (ជនជាតិចិន) ប្រមាណ ៤០.០០០នាក់ បានចូលមករស់នៅ។
លោកអភិបាលរងបន្តថា បញ្ហាសំរាមនាពេលបច្ចុប្បន្ននេះ គឺអាចមានចន្លោះពី ៤០០ ទៅ ៥០០តោន ក្នុងមួយថ្ងៃ ៗ។ ហើយថា ចំនួននេះ គឺមិនទាន់គិតពីកាកសំណល់ របស់ការដ្ឋានសំណង់ផ្សេងម ផងទេ។
លោក ជាវ វិជ្ជាក់ បញ្ជាក់បន្ថែមថា រាល់ថ្ងៃនេះ ដោយសារតែកំណើន នៃការវិនិយោគម្ពីប្រទេសចិន មានសន្ទុះកើនខ្ពស់យ៉ាងគំហុកនោអ ព្រមជាមួយគ្នានេះ បញ្ហាកាកសំណល់សំរាម ក៏មានការកើនឡើងស្របគ្នាផងដែរ។
លោកបន្តថា ការកើនឡើង នៃកាកសំណល់សំរាមនាក្រុងព្រះសីហនុពេលបច្ចុប្បន្ននេះ គឺជាកង្វល់ របស់រដ្ឋបាលក្រុង-ខេត្ត ព្រះសីហនុ ក៏ដូចជារាជរដ្ឋាភិបាលកម្ពុជា កំពុងជួយគិតគូររកដំណោះស្រាយ ឲ្យបានប្រសើរឡើងនាថ្ងៃអនាគត។
តាមរយៈជំនួបជាមួយគណៈប្រតិភូ មកពីប្រទេសកូរ៉េខាងលើនេះ លោក ជាវ វិជ្ជាក់ រំពឹងថា នៅប៉ុន្មានឆ្នាំខាងមុខទៀតនេះ បញ្ហាសំរាម- ទឹកកខ្វក់ – បរិស្ថាន អាចនឹងវិលមករកភាពប្រក្រតីដូចដើមឡើងវិញជាមិនខាន ។
លោក ជាវ វិជ្ជាក់ ឲ្យដឹងដូច្នេះ រួចបញ្ជាក់ថា រាល់ថ្ងៃនេះ ទន្ទឹមគ្នាបញ្ហាប្រឈម នៃកាកសំណល់សំរាម ក៏នៅមានបញ្ហា កាកសំណល់ប្លាស្ទិច កំពុងកកស្ទះនៅតាមអូរ និងនៅតាមប្រឡាយបង្ហូរទឹកមួយចំនួន មានដូចជា៖ ប្រឡាយអិលវី ស្ថិតក្នុងសង្កាត់លេខ៤ និងតំបន់ទំនប់រលក ត្រង់ចំណុចផ្ទះប្រជានេសាទបណ្តែតលើទឹកសមុទ្រ ជិតកំពង់ផែក្រុងព្រះសីហនុ ក៏ទាមទារឲ្យមានដំណោះស្រាយដូចកាកសំណល់សំរាមដែរ។
ចំណែក លោកស្រី Katelijn Van Den Berg អ្នកឯកទេសជាន់ខ្ពស់ផ្នែកបរិស្ថាន និងជាប្រធានក្រុមការងារ នៃវិទ្យាស្ថានឧស្សាហកម្មបរិស្ថាន និងបច្ចេកវិទ្យា Korea Environmental Industry and Technology Institute/KEITI នៃសាធារណរដ្ឋកូរ៉េ បានឲ្យដឹងថា គោលបំណង នៃគម្រោងការងារ របស់លោកស្រី គឺមានបំណងចង់ជួយដំណោះស្រាយធ្វើឲ្យប្រសើរឡើង លើផ្នែកហិរញ្ញវត្ថុ និងបរិស្ថាន ដែលផ្តើមចេញពីកាកសំណល់រឹង និងថង់ប្លាស្ទិច នៅតាមតំបន់គោលដៅចំនួនបី សំខាន់ៗ រួមមាន៖ រាជធានីភ្នំពេញ – ខេត្តសៀមរាប និងខេត្តព្រះសីហនុ។
ទាក់ទិនបញ្ហានេះ កិច្ចប្រជុំបានរកឃើញថា តាមការសិក្សា និងតាមការអង្កេត គឺបញ្ហាគ្រប់គ្រងកាកសំណល់សំរាម និងផ្លាស្ទិក មិនបានល្អ នាខេត្តព្រះសីហនុ នាពេលកន្លងមក គឺបណ្តាលមកពីសាលាក្រុងព្រះសីហនុ ពុំមានថវិកាគ្រប់គ្រាន់។ ហើយម្យ៉ាងទៀត តម្លៃសេវាប្រមូលសំរាម ដែលទទួលបានពីប្រជាពលរដ្ឋ គឺមានការលំបាក ក្នុងការប្រមូលយក- ការគ្រប់គ្រងស្ថាប័ននានា និងហិរញ្ញវត្ថុ មានការខ្វះខាត- កិច្ចសន្យាជាមួយក្រុមហ៊ុនប្រមូលសំរាម មិនមានតម្លាភាព ខ្វះការទំនាក់ទំនង ក្នុងការប្រមូលបញ្ចេញសំរាម នៅក្នុងក្រុងព្រះសីហនុ នៅមានកម្រិតជាដើម..។
ចំពោះភាពមិនប្រក្រតីខាងលើនេះ គឺទាមទារឲ្យរដ្ឋបាលខេត្តព្រះសីហនុ ត្រូវពង្រឹងធនធានស្ថាប័នប្រមូលសំរាម ពិសេសសាលាក្រុងព្រះសីហនុ ត្រូវបង្កើតការិយាល័យគ្រប់គ្រងសំរាម- ផ្សព្វផ្សាយរៀបចំផែនការ ចូលរួមត្រួតពិនិត្យ និងវាយតម្លៃក្នុងការប្រមូលសំរាម ឲ្យបានត្រឹមត្រូវ។ បង្កើនការគ្រប់គ្រង និងប្រមូលសំរាម ដោយអនុវត្តតាម អនុក្រិត្យលេខ១១៣- បង្កើនសកម្មភាពក្នុងការងារប្រមូលសំរាម មានដូចជា៖ រៀបចំគោលនយោបាយថ្នាក់ជាតិ-ក្រុង។ គាំទ្រលើផ្នែកបច្ចេកទេស។ ការវិនិយោគលើគម្រោងសំណល់រឹង និងត្រូវពិនិត្យតាមដាន រាល់គ្រប់គម្រោងនានា ឲ្យមានប្រសិទ្ធភាព និងតម្លាភាព ដើម្បីធានាឲ្យបរិស្ថាន នាខេត្តព្រះសីហនុ ឲ្យមានអនាម័យល្អនៅឆ្នាំខាងមុខ៕ ដែន សីមា