ភ្នំពេញ ៖ បណ្តាញសារព័ត៌មាន និងបណ្តាញសង្គមហ្វេសប៊ុកជាច្រើន បានផ្សព្វផ្សាយថា មានកម្លាំងសមត្ថកិច្ចឆ្មក់ស្ទាក់ចាប់លោកឆៃ សុវណ្ណរ៉ា នាយទាហានរង និងស្រីស្នេហ៍ដល់ក្នុងបន្ទប់ ស្រាប់តែឆែកឆេរឃើញសុទ្ធតែ….។ ពាក់ព័ន្ធករណីខាងលើនេះ នៅថ្ងៃទី១៤មិថុនា ឧត្តមសេនីយ៍ត្រី អេង ហ៊ី អ្នកនាំពាក្យកងរាជអាវុធហត្ថលើផ្ទៃប្រទេស បានបញ្ជាក់ថា លោក ឆៃ សុវណ្ណរ៉ា អតីតជានាយទាហានរងនៃកងរាជអាវុធហត្ថ ត្រូវបានអគ្គបញ្ជាការដ្ឋាននៃកងយោធពលខេមរភូមិន្ទលុបឈ្មោះយោធិនចេញពីការគ្រប់គ្រងតាំងពីឆ្នាំ២០១៦ មកម្ល៉េះ។
លោកឧត្តមសេនីយ៍ត្រី អេង ហ៊ី អ្នកនាំពាក្យកងរាជអាវុធហត្ថលើផ្ទៃប្រទេស សូមជម្រាបជូនលោក លោកស្រី នាយកសារព័ត៌មាន អ្នកសារព័ត៌មាន និងសាធារណជនជ្រាបថា “លោក ឆៃ សុវណ្ណរ៉ា អតីតជានាយទាហានរងនៃកងរាជអាវុធហត្ថ អត្តលេខ ១៩៧៥៥៧ ត្រូវបានកងរាជអាវុធហត្ថស្នើសុំលុបឈ្មោះចេញពីការគ្រប់គ្រងរបស់កងរាជអាវុធហត្ថក្នុងឆ្នាំ២០១៦ ដោយសារយោធិននេះអវត្តមានគ្មានមូលហេតុ ហើយអគ្គបញ្ជាការដ្ឋាននៃកងយោធពលខេមរភូមិន្ទក៏បានចេញសេចក្តីសម្រេចលេខៈ០៨៦/២០១៦ ស.ស.រ ចុះថ្ងៃទី៣០ ខែធ្នូ ឆ្នាំ២០១៦ ស្តីពីការលុបឈ្មោះយោធិនចេញពីការគ្រប់គ្រង។ អាស្រ័យដូចជម្រាបជូនខាងលើ សូមលោក លោកស្រី នាយកសារព័ត៌មាន អ្នកសារព័ត៌មាន និងសាធារណជន មេត្តាជ្រាប និងសុំជួយកែតម្រូវតាមនីតិវិធីផង”។
សូមបញ្ជាក់ថា ៖ នៅថ្ងៃទី១៣ ខែមិថុនា ឆ្នាំ២០១៩ មានគេហទំព័រឈ្មោះ 7news kh បានផ្សាយអត្ថបទមួយមានចំណងជើងថា “ហួសចិត្ត! កម្លាំងសមត្ថកិច្ចឆ្មក់ស្ទាក់ចាប់លោកនាយទាហានរង និងស្រីស្នេហ៍ដល់ក្នុងបន្ទប់ ស្រាប់តែឆែកឆេរឃើញសុទ្ធតែ….” ព្រមទាំងបានបង្ហាញរូបភាពដែលមានរូបថតស្លៀកពាក់ឯកសណ្ឋានកងរាជអាវុធហត្ថចំនួន០១សន្លឹក និងមានអត្តសញ្ញាណប័ណ្ណនាយទាហានរង ពលទាហាន នៃកងយោធពលខេមរភូមិន្ទចំនួន០១សន្លឹក៕ ដោយ៖កូឡាប