ខេត្តព្រះសីហនុ ៖ របាយការណ៍ពីកងរាជអាវុធហត្ថខេត្តព្រះសីហនុ បានឲ្យដឹងថា សមត្ថកិច្ចអាវុធហត្ថខេត្តព្រះសីហនុ បាននាំខ្លួនជនជាតិឥណ្ឌូនេសុី និងមន្ត្រីយោធា ម្នាក់ទៀត ដែលបើកបររថយន្តពាក់ផ្លាកលេខខេមរភូមិន្ទ (ខ.ម) ក្លែងបន្លំ មកណែនាំអប់រំ និងធ្វើការកិច្ចសន្យា ។
ប្រតិបត្តិការនេះធ្វើឡើងតាមបទបញ្ជាលោកឧត្តមសេនីយ៍ត្រី ហេង ប៊ុនទី មេបញ្ជាការកងរាជអាវុធហត្ថខេត្តព្រះសីហនុ កាលពីថ្ងៃត្រង់ថ្ងៃទី១៤ ខែមិថុនា ឆ្នាំ២០១៩ ហើយប្រតិបត្តិការនេះ ដឹកនាំដោយលោកអនុសេនីយ៍ឯក គីវ ប៊ុណ្ណារិទ្ធ នាយការិយាល័យបទល្មើសយោធា ដោយបានចុះឆែកត្រួតពិនិត្យ និងនាំខ្លួនអ្នកបើកបររថយន្តពាក់ស្លាកលេខខេមរភូមិន្ទ (ខ.ម) ក្លែងបន្លំ គ្មានឯកសារ បញ្ជាក់ត្រឹមត្រូវ កំពុងចរាចរណ៍តាមដងផ្លូវ ក្នុងក្រុងព្រះសីហនុ ឃាត់ខ្លួនជនសង្ស័យ ចំនួន០២នាក់៖
១/ឈ្មោះ កើត សុផល អត្តលេខ៖ ២៣២៨៣១ ឋានន្តរសក្តិថ្នាក់ “អនុសេនីយ៍ឯក” មុខងារ ជំនួយការការិយាល័យបុគ្គលិក អង្គភាពបញ្ជូនសារ អគ្គបញ្ជាការដ្ឋាន (បើកបររថយន្តស្លាកលេខខ-ម គ្មានឯកសារ)។
២/ឈ្មោះ KUANIA WAN WIJAYA ភេទប្រុស អាយុ៣៤ឆ្នាំ ជនជាតិឥណ្ឌូណេសុី ស្នាក់នៅក្នុងកាសុីណូ SV ខេត្តព្រះសីហនុ ជាអ្នកហៅរថយន្តមកពីភ្នំពេញតាមរយ:មិត្តភក្តិ ឈ្មោះ ដេវីត មុខរបរ លក់ឡាន នៅភ្នំពេញ សម្រាប់យកមកដឹកភ្ញៀវចិន ពីអាកាសយានដ្ឋានអន្តរជាតិខេត្តព្រះសីហនុចូលមកក្នុងក្រុង។
ដកហូតវត្ថុតាង ៖
១-រថយន្ត ចំនួន០១គ្រឿង ម៉ាក Escalade ស៊េរីផលិតឆ្នាំ២០០៤ បិទស្កុតពណ៌ត្រេអ៊ី ពាក់ផ្លាកលេខ (ខ-ម០២ ២-៣១៧១)។ បើតាមសមត្ថកិច្ចកងរាជអាវុធហត្ថអះអាងថា ដោយយោងតាមការណែនាំរបស់លោកព្រះរាជអាជ្ញាអមសាលាដំបូងខេត្តព្រះសីហនុ ចំពោះជនជាតិឥណ្ឌូណេសុី បានណែនាំឲ្យធ្វើកិច្ចសន្យា អប់រំត្រឡប់ទៅវិញ។ ចំពោះមន្ត្រីយោធា ត្រូវរង់ចាំឲ្យមេញ្ជាការអង្គភាពមកធានា និងធ្វើកិច្ចសន្យាយកត្រឡប់ទៅអង្គភាពដើមវិញ។ ចំណែករថយន្ត ត្រូវដកហូត យកមករក្សាទុកក្នុងទីបញ្ជាការអាវុធហត្ថខេត្ត ដើម្បីបន្តនីតិវិធី៕ ដោយ៖ស្រីនាថ