នៅក្នុងផែនការអភិវឌ្ឍន៍រដ្ឋបាលគ្រប់គ្រងខេត្ត ព្រះសីហនុ លោក សាយ សំអាល់ រដ្ឋមន្ត្រីក្រសួងបរិស្ថាន និងជាប្រធានក្រុមការងារថ្នាក់ជាតិចុះមូលដ្ឋានខេត្តព្រះសីហនុ មានប្រសាសន៍ថា ដើម្បីឆ្លើយតបនឹងតម្រូវការបច្ចុប្បន្ន និងអនាគតនៃទីផ្សារការងារ ខេត្តចាំបាច់ត្រូវរៀបចំកំណត់ការបង្កើតសាលាបណ្តុះបណ្តាលជំនាញវិជ្ជាជីវៈឱ្យបានត្រឹមត្រូវ ។ ជាមួយគ្នានេះ ដើម្បីពង្រឹងលើសោភ័ណភាពទីក្រុង ខេត្តព្រះសីហនុ និងកំណត់យកដើមឈើនាងនួន ជាអត្តញ្ញាណដើមឈើប្រចាំខេត្ត និងមានការដាំឈើប្រណីតផ្សេងទៀតគួបផ្សំផងដែរ។ នេះបើតាមការផ្សាយរបស់ក្រសួងបរិស្ថាន កាលពីថ្ងៃទី១៤ មិថុនា។
ក្នុងឱកាសនេះ លោក សាយ សំអាល់ បានប្រកាសពីការគ្រប់គ្រងការងារអភិវឌ្ឍឱ្យបានត្រឹមត្រូវតាមបទដ្ឋាន និងណែនាំផែនការការគ្រប់គ្រងទឹកស្អាត និងអគ្គិសនីដើម្បីឱ្យការផ្តល់សេវាផ្គត់ផ្គង់កាន់តែប្រសើរ និងការផ្គត់ផ្គង់ឆ្លើយតបនឹងតម្រូវការប្រើប្រាស់ប្រចាំថ្ងៃ។
ខេត្តព្រះសីហនុបាននិងកំពុងទទួលបានផលពីផ្លែផ្កាសុខសន្តិភាពស្ថិរភាពនិងការអភិវឌ្ឍដែលបានមកពីការយកជីវិតធ្វើដើមទុនរបស់ថ្នាក់ដឹកនាំយើង។ លោកសាយ សំអាល់ បានគូសបញ្ជាក់នៅចំពោះមុខក្រុមការងារថ្នាក់ជាតិ និងក្រុមការងារថ្នាក់មូលដ្ឋានទាំងអស់ថា កិច្ចការអាទិភាពចំនួន ៤ ក្នុងចំណោមការងារជាច្រើនដែលក្រុមការងារត្រូវដោះស្រាយឱ្យបានគឺ ទី១) ការពង្រឹងសន្តិសុខនិងសណ្តាប់ធ្នាប់នៅក្នុងខេត្តព្រះសីហនុទាំងមូលដោយសហការគ្នារវាងអាជ្ញាធរខេត្ត កងកម្លាំងសមត្ថកិច្ច និងក្រុមការងារឱ្យបានល្អ។ ទី២) ការពារឱ្យបាននូវបរិយាកាសសុខសុវត្ថិភាពសម្រាប់ប្រជាពលរដ្ឋនិងភ្ញៀវទេសចរ ព្រមទាំងវិនិយោគិន។ ទី៣) ការគ្រប់គ្រងការងារសំណង់ដែលជាគម្រោងសាងសង់ថ្មីៗត្រូវមានការគ្រប់គ្រងឱ្យបានល្អ កាត់បន្ថយការបំពុលខ្យល់ និងទី៤) ការគ្រប់គ្រងសំណល់រឹងរាវ និងសំរាម ឱ្យបានល្អដើម្បីធ្វើឱ្យខេត្តព្រះសីហនុមានសោភ័ណភាព មានអនាម័យបរិស្ថានល្អស្អាត និងពលរដ្ឋរស់នៅប្រកបដោយផាសុកភាព និងកាន់តែមានការទាក់ទាញភ្ញៀវទេសចរមកកម្សាន្ត។
លោកសាយ សំអាល់ លើកឡើងថាពីគម្រោងការស្តារប្រព័ន្ធលូ បង្ហូរទឹកឱ្យបានទៀងទាត់ ក៏ដូចជាការគ្រប់គ្រងសំណល់រាវឱ្យបានល្អ និងត្រូវមាន ការរៀបចំក្រុងឱ្យបានល្អដោយធ្វើយ៉ាងណាបែងចែកឱ្យដាច់រវាងលូទឹកភ្លៀង និងលូទឹកកខ្វក់ ព្រមទាំងកសាងនូវហេដ្ឋារចនាសម្ព័ន្ធផ្លូវថ្នល់ក្នុងខេត្តដើម្បីឆ្លើយតបនឹងកំណើនសេដ្ឋកិច្ច កំណើនប្រជាជន និងចំនួនភ្ញៀវទេសចរនៅក្នុងខេត្តព្រះសីហនុ៕ ដោយ ៖ ស្រីនាថ
