មន្ត្រីអាមេរិចបាននិយាយថា អ៊ីរ៉ង់បានព្យាយាមបាញ់កម្ទេចដ្រូនរបស់អាមេរិច (Drone) ដែលហោះនៅលើវា ប៉ុន្តែមីស៊ីលដែលខ្លួនបាញ់ទៅលើដ្រូនគ្មានមនុស្សបើកនោះ ហោះមិនត្រូវគោលដៅ ហើយបានធ្លាក់ចូលក្នុងទឹក។
មន្ត្រីខាងលើថ្លែងថា ប៉ុន្មានម៉ោងមុនពេលមានការវាយប្រហារលើកប៉ាល់ដឹកប្រេងនៅឈូងសមុទ្រអូម៉ង កាលពីថ្ងៃព្រហស្បតិ៍កន្លងទៅ អ៊ីរ៉ង់បានឃើញដ្រូន ហើយវាក៏បានធ្វើការបាញ់មីស៊ីល ប៉ុន្តែខុសគោលដៅ។
មុនពេលមានការវាយប្រហារ ដ្រូនអាមេរិចឈ្មោះ MQ-9 Reaper បានហោះធ្វើការពិនិត្យមើលកប៉ាល់របស់អ៊ីរ៉ងដែលនៅជិតកប៉ាល់ដឹកប្រេង។
នេះគឺជាការអះអាងលើកទីមួយដែលអាមេរិចមានពត៌មានរបស់សកម្មភាពអ៊ីរ៉ងមុនពេលការវាយប្រហារ។
ជុំវិញការចោទប្រកាន់នោះ អ៊ីរ៉ង់បានបដិសេធដាច់ខាតថា ខ្លួនបានពាក់ព័ន្ធនឹងការវាយប្រហារនោះ។
មន្ត្រីដដែលខាងលើបាននិយាយថា ប៉ុន្មានថ្ងៃមុនពេលការវាយប្រហារ ដ្រូនរបស់អាមេរិចត្រូវបានបាញ់
ទម្លាក់នៅក្នុងសមុទ្រក្រហមដែលការវាយប្រហារនោះត្រូវបានគេជឿជាក់ថាជាមីស៊ីលរបស់អ៊ីរ៉ង់ បាញ់ដោយក្រុមបះបោរ Houthi ។
នៅថ្ងៃសុក្រម្សិលមិញនេះ មន្ទីរបញ្ចាកោណអាមេរិចបានបោះសំដីយ៉ាងខ្លាំង ខណៈអាមេរិចបន្តអះអាងថា ទីក្រុងតេហេរ៉ងជាអ្នកនៅពីក្រោយការវាយប្រហារលើកប៉ាល់ដឹកប្រេង ២គ្រឿងនៅសមុទ្រអន្តរជាតិ ក្រោយពេលអាមេរិចបញ្ចេញវីដេអូ ដែលបង្ហាញថា ទូកយាមល្បាតរបស់អ៊ីរ៉ងបានជញ្ជូនចេញនូវរ៉ែដែលមិនទាន់ខូចខាតពីតួកប៉ាល់។
ចំណែកចក្រភពអង់គ្លេសវិញ បានចេញសេចក្តីប្រកាសនៅថ្ងៃសុក្រម្សិលមិញ ដោយបញ្ជាក់ថា វាគឺជាការពិតប្រាកដណាស់ដែលថា សាខារបស់កងកម្លាំងបដិវត្តន៍អ៊ីរ៉ងគឺជាអ្នកវាយប្រហារលើកប៉ាល់ទាំងនោះ។
សូមបញ្ជាក់ថា កាលពីថ្ងៃព្រហស្បតិ៍ មានការវាយប្រហារទៅលើកប៉ាល់ដឹងប្រេងចំនួន ២គ្រឿងដែលមួយគ្រឿងជារបស់ក្រុមហ៊ុនជប៉ុន Kokuka Courageous និងមួយទៀតរបស់ក្រុមហ៊ុនណូវេរ។
ទាំងអ៊ីរ៉ង់ និងអាមេរិចបញ្ជាក់ថា ពួកគេជាអ្នកជួយជន្លៀសមនុស្សនៅលើកប៉ាល់នោះចេញ ៕
ប្រែសម្រួលដោយ ៖ សុភ័ក្រ
ប្រភព៖ CNN
