មនុស្សយ៉ាងហោចណាស់ចំនួន ៣៦នាក់ បានស្លាប់ដោយសារតែអាកាសធាតុក្តៅខ្លាំងពេកនៅក្នុងប្រទេសឥណ្ឌា។ រដូវក្តៅក្នុងប្រទេសឥណ្ឌាឆ្នាំនេះ អូសបន្លាយយូរបំផុតនៅក្នុងប្រវត្តិសាស្ត្រនៃប្រទេសនេះ។ នេះបើតាមការបញ្ជាក់របស់អ្នកនាំពាក្យអាជ្ញាធរគ្រប់គ្រងគ្រោះមហន្តរាយជាតិឥណ្ឌា។
រលកកម្តៅបានធ្វើឲ្យមានអាកាសធាតុក្តៅ និងឆាបឆួលក្នុងរយៈពេល ៣០ថ្ងៃជាប់គ្នា នៅភាគខាងជើង និងភាគកណ្តាលនៃប្រទេសឥណ្ឌា។ អាកាសធាតុបានឡើងដល់ ៤៨អង្សា នៅទីក្រុង New Delhi កាលពីថ្ងៃទី ១០ ខែមិថុនានេះ ដែលវាគឺជាកម្រិតខ្ពស់បំផុតមិនធ្លាប់កើតមាន។
ចំណែកនៅក្នុងរដ្ឋ Churu វិញ អាកាសធាតុលើស ៥០អង្សា នៅថ្ងៃទី ១ ខែមិថុនានេះ។
សូមរម្លឹកថា កាលពីរដូវក្តៅ ក្នុងឆ្នាំ ២០១៦ អាជ្ញធរឥណ្ឌាបានបញ្ចេញវិធានការជាច្រើនដើម្បីសម្រាលកុំអោយមានការប៉ះពាល់ដោយសារបញ្ហារលកកម្តៅ ដោយមានការផ្តល់ជម្រកដល់អ្នកគ្មានផ្ទះសម្បែង កែសម្រួលម៉ោងធ្វើការសម្រាប់មន្ត្រីរដ្ឋាភិបាល ដើម្បីបញ្ជៀសបញ្ហាកម្តៅ បង្កើតកន្លែងស្តុកទឹកសម្រាប់ប្រជាជនផឹក និងធ្វើការលាបដំបូលផ្ទះទៅជាព៌ណស ដើម្បីកាត់បន្ថយការស្រូបកម្តៅ។
ជាលទ្ធផល ចំនួនអ្នកស្លាប់ដោយសារអាកាសធាតុក្តៅខ្លាំងបានថយចុះនៅក្នុងឆ្នាំ ២០១៦ ដែលមានអ្នកស្លាប់ត្រឹមតែ ២៥០ប៉ុណ្ណោះ។ ក្នុងឆ្នាំ ២០១៥ មានមនុស្សរហូតដល់ ២.៤០០នាក់ស្លាប់ ដោយសាររលកកម្តៅ៕
អត្ថបទប្រែសម្រួលដោយ៖ សុភ័ក្រ
ប្រភព៖ CNN
