រដ្ឋាភិបាលហុងកុងបានកំណត់ពន្យាពេលលើគម្រោងអនុម័តសេចក្តីស្នើច្បាប់ដ៏ចម្រូងចម្រាស់ ដែលអនុញ្ញាតឲ្យមានការធ្វើបត្យាប័នជនសង្ស័យទៅកាន់ប្រទេសចិនបាន។ នេះបើតាមការចុះផ្សាយរបស់សារព័ត៌មាននៅហុងកុង។
ប្រធាននាយកប្រតិបត្តិហុងកុង អ្នកស្រី Carrie Lam ដំបូងឡើយបានបដិសេធបោះបង់សេចក្តីស្នើច្បាប់នោះ ប៉ុន្តែក្នុងរយៈពេលប៉ុន្មានថ្ងៃនេះ ជំនួយការរបស់អ្នកស្រីជាច្រើនបានជំរុញអ្នកស្រីឲ្យព្យួរវាជាបណ្តោះអាសន្នសិន។
ប្រជាជនរាប់ពាន់នាក់បានធ្វើការតវ៉ាប្រឆាំងនឹងសេចក្តីព្រាងច្បាប់នោះ ហើយក្រុមតវ៉ាមានគម្រោងជួបជុំបន្ថែមទៀតនៅថ្ងៃអាទិត្យស្អេកនេះ។
អ្នកស្រី Carrie Lam ត្រូវគេរំពឹងថានឹងធ្វើសន្និសិទកាសែតនៅល្ងាចថ្ងៃសៅរិ៍នេះ។
សូមបញ្ជាក់ថា ទីក្រុងហុងកុងគឺជាអតីតទឹកដីអាណានិគមន៍របស់អង់គ្លេស ប៉ុន្តែវាត្រូវបានប្រគល់ទៅឲ្យប្រទេសចិនវិញក្នុងឆ្នាំ ១៩៩៧ ក្រោមកិច្ចព្រមព្រៀង “ប្រទេសមួយ ប្រព័ន្ធដឹកនាំពីរ” ដែលវាជាការធានាស្វ័យយ័តភាពរបស់ហុងកុង៕
អត្ថបទប្រែសម្រួលដោយ៖ សុភ័ក្រ
ប្រភព៖ BBC