ប្រទេសឥណ្ឌាបានប្រកាសថា ចាប់ពីថ្ងៃអាទិត្យទៅ ខ្លួននឹងធ្វើការយកពន្ធលើផលិតផលនាំចូលពីអាមេរិចចំនួន ២៨មុខ រួមមានគ្រាប់អាល់មុន និងផ្លែប៉ោមជាដើម។
ការកំណត់យកពន្ធនោះ ដែលអាចមានរហូតដល់ ៧០ភាគរយ ត្រូវបានធ្វើឡើងដើម្បីជាការសងសឹក ដោយសារតែអាមេរិចបដិសេធមិនឲ្យផលិតផលឥណ្ឌា រួមមាន ដែក និងអាលុយមីញ៉ូម រួចពន្ធ ។
កាលពីដើមខែនេះ ប្រធានាធិបតីអាមេរិច ដូណាល់ ត្រាំ បានប្រកាសថា អាមេរិចបានដកឥណ្ឌាចេញពីកិច្ចព្រមព្រៀងអនុគ្រោះពន្ធ ។
កាលពីខែ មិថុនាឆ្នាំមុន ឥណ្ឌាបានប្រកាសថា នឹងយកពន្ធចំនួន ១២០ភាគរយ លើផលិតផលអាមេរិច ប៉ុន្តែដោយសារតែមានការចរចារពាណិជ្ជកម្ម ទើបឥណ្ឌាបានពន្យាពេលការអនុវត្តនោះ។
នៅក្នុងសេចក្តីប្រកាសកាលពីថ្ងៃសុក្រកន្លងទៅនេះ ក្រសួងហិរញ្ញវត្ថុឥណ្ឌាបាននិយាយថា សេចក្តីសម្រេចនោះធ្វើឡើងដើម្បីជាផលប្រយោជន៍សាធារណៈ។
សូមបញ្ជាក់ថា ពាណិជ្ជកម្មទ្វេភាគីរវាងអាមេរិច និងឥណ្ឌាមានទំហំទឹកប្រាក់ ១៤២ ពាន់លានដុល្លារ កាលពីឆ្នាំ ២០១៨ ដែលពាណិជក្ជកម្មនៃប្រទេសទាំងពីរមានការកើនឡើងយ៉ាងខ្លាំងចាប់តាំងពីឆ្នាំ ២០០១ មក។ នេះបើតាមតួលេខរបស់អាមេរិច។
ប៉ុន្តែ ទំនិញរបស់ឥណ្ឌាដែលមានទំហំទឹកប្រាក់ ៥,៦ពាន់លានដុល្លារ នឹងត្រូវរងការយកពន្ធពីអាមេរិច ។ ទំនិញទាំងនោះ កាលពីមុនគឺមានការអនុគ្រោះពន្ធពីអាមេរិច ៕
អត្ថបទប្រែសម្រួលដោយ៖ សុភ័ក្រ
ប្រភព៖ BBC