ភ្នំពេញ ៖ លោក ឃួង ស្រេង អភិបាលរាជធានីភ្នំពេញ បានមានប្រសាសន៍ថា រដ្ឋបាលខណ្ឌទាំងអស់ត្រូវបន្តខិតខំលើកកម្ពស់ក្នុងការផ្ដល់សេវាចាំបាច់នានាដូចជាសេវាសុខាភិបាលអប់រំសង្គមកិច្ចនិងសេវាសាធារណៈដទៃទៀត ប្រកបដោយស្មារតីទទួលខុសត្រូវខ្ពស់មានតម្លាភាពនិងគណនេយ្យភាព ជាពិសេសត្រូវដោះស្រាយបញ្ហាប្រឈមដូចជាសំណូមពរ សំណួរ សំណើ ចំពោះប្រជាពលរដ្ឋនៅក្នុងមូលដ្ឋាន។
លោកអភិបាលរាជធានីភ្នំពេញបានថ្លែងបែបនេះ ក្នុងពិធីប្រកាសគោលការណ៍តំណែងក្រុមប្រឹក្សាខណ្ឌជ្រោយចង្វារ កាលពីព្រឹកថ្ងៃទី ១៧ ខែមិថុនាឆ្នាំ ២០១៩ នៅសាលាខណ្ឌជ្រោយចង្វារ ។
លោកអភិបាលរាជធានីបានបន្ថែមទៀតថា រដ្ឋបាលខណ្ឌត្រូវខិតខំសម្របសម្រួលនិងពង្រឹងការផ្ដល់សេវាតាមការិយាល័យច្រកចេញចូលតែមួយនៅថ្នាក់។ដើម្បីបង្កលក្ខណៈងាយស្រួលជូនប្រជាពលរដ្ឋមកទទួលសេវានៅកន្លែងតែមួយព្រមទាំងពិនិត្យតាមដាននិងគាំទ្រដល់ដំណើរការការិយាល័យច្រកចេញចូលតែមួយនិងការិយាល័យប្រជាពលរដ្ឋនៅរដ្ឋបាលខណ្ឌដើម្បីធានាថាការផ្ដល់សេវារដ្ឋបាលនេះដំណើរការរាប់ដោយតម្លាភាពនិងគណនេយ្យភាពស្របតាមគោលការណ៍បែបបទនិងនីតិវិធីដែលបានកំណត់។ទន្ទឹមនេះត្រូវខិតខំជំរុញនិងសម្របសម្រួលជាមួយមន្ទីរអង្គភាពនិងការិយាល័យជំនាញពាក់ព័ន្ធដើម្បីពន្លឿនការផ្ទេរសេវានានាដែលនៅសេសសល់មកឱ្យដល់ហើយច្រកចេញចូលតែមួយនៅសាលាខណ្ឌរួមទាំងផ្ដល់ការគាំទ្រខាងបច្ចេកទេសការកសាងសមត្ថភាពដល់ការផ្ដល់សេវាទាំងនេះឲ្យកាន់តែមានប្រសិទ្ធភាពថែមទៀត។
លោកឃួង ស្រេង បានលើកឡើងទៀតថា ជាមួយគ្នាត្រូវបន្តពង្រឹងសមត្ថភាពដល់មន្ត្រីផ្ដល់សេវានៅថ្នាក់ក្រោមជាតិ ជាពិសេសចៅសង្កាត់ ជំទប់ចៅសង្កាត់រង ស្មៀន មេភូមិ អនុប្រធានភូមិ សមាជិកភូមិ ប៉ុស្តិ៍នគរបាល រដ្ឋបាល និងកម្លាំងសមត្ថកិច្ចនានានៅមូលដ្ឋានឱ្យពង្រឹងសមត្ថភាពនិងការទទួលខុសត្រូវក្នុងការបំពេញការងារប្រកបដោយក្រមសីលធម៌វិជ្ជាជីវៈព្រមទាំងខិតខំកែលម្អឥរិយាបថក្នុងការប្រាស្រ័យទាក់ទងជាមួយប្រជាពលរដ្ឋសំដៅរួមគ្នាដោះស្រាយសំណើសំណូមពរបញ្ហាប្រឈមនានានៅមូលដ្ឋានប្រកបដោយតម្លាភាពគណនេយ្យភាពនិងយុត្តិធម៌ដោយមិនត្រូវមានការរើសអើងការបែងចែកប្រកាន់បក្សពួកគ្រួសារនិយមនិន្នាការនយោបាយឡើយ។
លោកបានថ្លែងទៀតថារដ្ឋបាលខណ្ឌត្រូវដឹកនាំសម្របសម្រួលដល់រដ្ឋបាលសង្កាត់ដើម្បីពិនិត្យមើលឡើងវិញនូវបញ្ជីបញ្ហាប្រឈមសំណើសំណូមពរនានារបស់ប្រជាពលរដ្ឋដែលបានលើកឡើងក្នុងវេទិកាសាធារណៈនានាក៏ដូចជាសំណូមពរដែលបានបើកឡានជាមួយក្រុមការងារថ្នាក់ជាតិរួចហើយត្រូវកំណត់អាទិភាពនិងរៀបចំផែនការសកម្មភាពដើម្បីដោះស្រាយដោយមានការតាមដានត្រួតពិនិត្យនៅក្នុងជួរគណៈអភិបាលនិងក្រុមប្រឹក្សារបស់ខ្លួនជារៀងរាល់ខែព្រមទាំងធ្វើរបាយការណ៍អំពីលទ្ធផលនៃការដោះស្រាយមករកក្បាលរាជធានីភ្នំពេញឬមន្ទីរអង្គភាពជុំវិញរាជធានីភ្នំពេញខេត្តពាក់ព័ន្ធ។ ចំពោះបញ្ហាប្រឈមទាំងឡាយណាដែលហួសពីសមត្ថកិច្ចដោះស្រាយរបស់រដ្ឋបាលថ្នាក់ក្រោមជាតិត្រូវធ្វើរបាយការណ៍មកក្រសួងស្ថាប័នពាក់ព័ន្ធដើម្បីចូលរួមសហការដោះស្រាយ។ ការដោះស្រាយបញ្ហាប្រឈមនិងជម្លោះនានានៅមូលដ្ឋានក្នុងនោះរួមមានទាំងជម្លោះដីធ្លីត្រូវខិតខំព្យាយាមអត់ធ្មត់ដើម្បីសម្របសម្រួលដោះស្រាយប្រកបដោយតម្លាភាពយុត្តិធម៌និងបញ្ចៀសឲ្យបាននូវអំពើហិង្សាតាមគ្រប់រូបភាព។
លោកអភិបាលរាជធានីក៏បានណែនាំឲ្យគណៈបញ្ជាការឯកភាពរដ្ឋបាលខណ្ឌនិងកងកម្លាំងប្រដាប់អាវុធគ្រប់ប្រភេទបង្កើនការថែរក្សាការពារសន្តិសុខនិងសណ្តាប់ធ្នាប់សាធារណៈជាពិសេសត្រូវបន្តជំរុញនិងលើកទឹកចិត្តប្រជាពលរដ្ឋគ្រប់មជ្ឈដ្ឋានឲ្យចូលរួមអនុវត្តគោលនយោបាយភូមិឃុំមានសុវត្ថិភាពដើម្បីរួមគ្នាបង្ការសុខស្កាត់បង្ក្រាបបទល្មើសគ្រប់ប្រភេទនៅតាមមូលដ្ឋានរៀងៗខ្លួនពិសេសបទល្មើសគ្រឿងញៀនខុសច្បាប់ការជួញដូរមនុស្សសកម្មភាពលួចឆក់ប្លន់នឹងល្បែងស៊ីសងខុសច្បាប់នៅគ្រប់មូលដ្ឋានទូទាំងខណ្ឌ។ ត្រូវពង្រឹងវិធានការរដ្ឋបាលនិងវិធានការច្បាប់ឲ្យបានម៉ឺងម៉ាត់ក្នុងការប្រយុទ្ធប្រឆាំងគ្រឿងញៀនខុសច្បាប់គ្រប់ប្រភេទក្នុងទូទាំងខណ្ឌដោយត្រូវដាក់ចេញនូវវិធានការឲ្យបានម៉ឺងម៉ាត់ចំពោះម្ចាស់ទីតាំងសប្បាយភាពសណ្ឋាគារផ្ទះសំណាក់នានានៅក្នុងការចូលរួមអង្គការទប់ស្កាត់ការប្រើប្រាស់ការជួញដូរការចែកចាយគ្រឿងញៀនខុសច្បាប់គ្រប់ប្រភេទ។ គណៈបញ្ជាការឯកភាពខណ្ឌត្រូវមានការទទួលខុសត្រូវក្នុងការលុបបំបាត់នៅប៉ុស្តិ៍ត្រួតពិនិត្យមិនស្របច្បាប់ក្នុងដែនសមត្ថកិច្ចរបស់ខ្លួន។ ត្រូវបន្តលើកកម្ពស់ពង្រឹងសណ្តាប់ធ្នាប់និងសុវត្ថិភាពចរាចរណ៍សុវត្ថិភាពសាធារណៈដោយផ្ដល់អាទិភាពលើការផ្សព្វផ្សាយអប់រំការគោរពច្បាប់ស្តីពីចរាចរណ៍ផ្លូវគោកដើរទន្ទឹមនឹងការពង្រឹងវិធានការរដ្ឋបាលនិងវិធានការច្បាប់ក្នុងការអនុវត្តច្បាប់ចរាចរណ៍ផ្លូវគោកដើម្បីកាត់បន្ថយគ្រោះថ្នាក់ចរាចរបន្ថែមទៀត ៕ ដោយ៖កូឡាប
