រដ្ឋមន្ត្រីការបរទេសអាមេរិចលោក Mike Pompeo បាននិយាយនៅថ្ងៃអាទិត្យម្សិលមិញថា អាមេរិចកំពុងពិចារណាវិធានការជាច្រើន រួមមានវិធានការយោធា ជុំវិញការកើនឡើងភាពតានតឹងជាមួយនឹងប្រទេសអ៊ីរ៉ង់ ទោះយ៉ាងណា លោកបានបញ្ជាក់ថា លោក ដូណាល់ ត្រាំ និយាយថា លោកមិនចង់ធ្វើសង្គ្រាមនោះឡើយ។
“អាមេរិចកំពុងពិចារណាលើជំរើសជាច្រើន។ ពួកយើងបានផ្តល់ពត៌មានលំអិតប្រាប់ប្រធានាធិបតីជាច្រើនដងរួចហើយ ហើយពួកយើងនឹងនៅតែបន្តប្រាប់គាត់ពត៌មានចុងក្រោយ។ ពួកយើងមានទំនុកចិត្តថា ពួកយើងអាចចាត់វិធានការជាច្រើនដើម្បីស្ថារអំណាចរបស់ពួកយើង”។ នេះជាការបញ្ជាក់របស់រដ្ឋមន្ត្រីការបរទេសខាងលើប្រាប់ CBS។
លោកក៏បានបញ្ជាក់ថា វិធានការទាំងនោះក៏នឹងមានវិធានការយោធាផងដែរ ។
លោកនិយាយថា ប្រធានាធិបតីនឹងធ្វើការពិចារណាលើអ្វីគ្រប់យ៉ាងដែលយើងត្រូវធ្វើ។ ពួកយើងមិនចង់អោយអ៊ីរង់មានអាវុធនុយក្លេអ៊ែរទេ ហើយលោប្រធានាធិបតីបាននិយាយយ៉ាងច្បាស់ហើយថា គាត់មិនចង់មានសង្គ្រាមនោះទេ។
សូមបញ្ជាក់ថា ការថ្លែងពីវិធានការយោធាប្រឆាំងអ៊ីរ៉ង់ របស់លោក Pompeo កើតឡើងក្រោយមានភាពតានតឹងយ៉ាងខ្លាំងនៅតំបន់ដែនទឹកស្ថិតនៅមជ្ឍិមបូព៌ា កន្លែងដែលកប៉ាល់ដឹកប្រេង ២គ្រឿងបានរងការវាយប្រហារកាលពីពេលថ្មីៗនេះ។
អាមេរិចចោទអ៊ីរ៉ងថា ជាអ្នកនៅពីក្រោយការវាយប្រហារលើកប៉ាល់ដឹកប្រេងនោះ ប៉ុន្តែអ៊ីរ៉ង់បដិសេធថាខ្លួនពាក់ព័ន្ធនឹងហេតុការណ៍នោះ៕
អត្ថបទប្រែសម្រួលដោយ៖ សុភ័ក្រ
ប្រភព៖ CNN