លោករដ្ឋមន្ត្រីកសិកម្ម បានថ្លែងថា នឹងយសេចក្តីព្រាងច្បាប់ស្តីពី “ការបង្កើតអង្គការបណ្តាញអន្តរជាតិសម្រាប់ឫស្សី និងផ្តៅ” ទៅអនុវត្តដោយឈរលើស្មារតីទទួលខុសត្រូវទាំងការងារច្បាប់ បច្ចេកទេស និងកិច្ចសហប្រតិបត្តិការ ដើម្បីទាញយកប្រយោជន៍ជូនជាតិ និងប្រជាជន។
នៅវិមានរដ្ឋសភា នាព្រឹកថ្ងៃចន្ទ ១៥កើត ខែជេស្ឋ ឆ្នាំកុរ ឯកស័ក ព.ស.២៥៦៣ ត្រូវនឹងថ្ងៃ ទី១៧ ខែមិថុនា ឆ្នាំ២០១៩ លោកវេង សាខុន រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ បានដឹកនាំគណៈប្រតិភូក្រសួងអញ្ជើញចូលរួមការពារសេចក្តីព្រាងច្បាប់ស្តីពី “ការបង្កើតអង្គការបណ្តាញអន្តរជាតិសម្រាប់ឫស្សី និងផ្តៅ” នៅវិមានរដ្ឋសភា ដែលកិច្ចប្រជុំនេះស្ថិតក្រោមអធិបតីភាពដ៏ខ្ពង់ខ្ពស់សម្តេចពញាចក្រី ហេង សំរិន ប្រធានរដ្ឋសភា។ ក្នុងនាមដ៏ខ្ពង់ខ្ពស់នៃរាជ រដ្ឋាភិបាលកម្ពុជា និងក្នុងនាមក្រសួងកសិកម្ម រុក្ខាប្រមាញ់ និងនេសាទ ឯកឧត្តមរដ្ឋមន្ត្រីបានសម្តែងនូវអំណរអរគុណយ៉ាងជ្រាលជ្រៅចំពោះសម្តេចប្រធានរដ្ឋសភាដែលបានអនុញ្ញាតឲ្យដាក់ឆ្លងកិច្ចប្រជុំសេចក្តីព្រាងច្បាប់ស្តីពីការអនុម័តយល់ព្រមលើកិច្ចព្រមព្រៀងស្តីពីការបង្កើតអង្គការបណ្តាញអន្តរជាតិសម្រាប់ឫស្សី និងផ្តៅ នាពេលនេះ។
លោករដ្ឋមន្ត្រីបានធ្វើសេចក្តីថ្លែងហេតុ និងជម្រាបជូនអង្គប្រជុំនូវប្រវត្តិសង្ខេប និងខ្លឹមសារសំខាន់ៗនៃសេចក្តីព្រាងច្បាប់នេះថា÷ សេចក្តីព្រៀងច្បាប់ស្តីពី “ការបង្កើតអង្គការបណ្តាញអន្តរជាតិសម្រាប់ឫស្សី និងផ្តៅ” មានគោលបំណងលើកកម្ពស់ជីវភាពប្រជាពលរដ្ឋ ប្រជាសហគមន៍ ដោយធ្វើការកែប្រែទម្លាប់ និងជំរុញលើកទឹកចិត្តប្រជាពលរដ្ឋពីការប្រើប្រាស់ឈើមកប្រើប្រាស់ឫស្សី និងផ្តៅវិញតាម រយៈការអភិវឌ្ឍផលិតកម្ម ការអភិរក្ស និងការកែច្នៃឫស្សី និងផ្តៅ តាមគោលការណ៍អភិវឌ្ឍឫស្សី និងផ្តៅប្រកបដោយចីរភាព និងនិរន្តរភាព។ សេចក្តីព្រាងច្បាប់នេះមាន ២២មាត្រ ដែលគ្របដណ្តប់ដោយខ្លឹមសារពិស្តារអំពី÷ ទី១. ប្រវត្តិនៃអង្គការបណ្តាញអន្តរជាតិឫស្សី និងផ្តៅ ទី២. គោលនយោបាយ និងផែនការយុទ្ធសាស្ត្រ ទី៣. លក្ខន្តិកនៃការចូលជាសមាជិក ទី៤. ការត្រៀមលក្ខណ:គ្រប់គ្រាន់មុនចូលជាសមាជិក និងទី៥. អត្ថប្រយោជន៍នៃការចូលជាសមាជិក។ សេចក្តីព្រៀងច្បាប់នេះ បានដាក់ឆ្លងពេញអង្គគណរដ្ឋមន្ត្រីកាលពីថ្ងៃទី០៥ ខែមេសា ឆ្នាំ២០១៩ បានដាក់ឆ្លងក្នុងកិច្ចប្រជុំពិភាក្សា ជាមួយគណ:កម្មការទី០៣ និងទី០៥ នៃរដ្ឋសភា កាលពីថ្ងៃទី ២៧ ខែឧសភា ឆ្នាំ២០១៩ កន្លងទៅ។
តាមរយៈកិច្ចព្រមព្រៀងនេះ យើងសង្ឃឹម និងជឿជាក់ថាកម្ពុជានឹងទទួលបាននូវកិច្ចសហប្រតិបត្តិការអន្តរជាតិមួយដ៏ល្អក្នុងការពង្រឹងសមត្ថភាពការពារ និងអភិវឌ្ឍធនធានឫស្សី និងផ្តៅប្រកប ដោយនិរន្តរភាព ដើម្បីផល ប្រយោជន៍សង្គម សេដ្ឋកិច្ច និងភាតរបរិស្ថានបៃតង រួមទាំងការអភិរក្សជីវៈចម្រុះនិងមរតកវប្បធម៌ជាតិផងដែរ។ បន្ទាប់ពីបានពិភាក្សាលើសេចក្តីព្រាងច្បាប់នេះយ៉ាងផុលផុសរួចមក កិច្ចប្រជុំរដ្ឋសភា នីតិកាលទី៦ សម័យប្រជុំលើកទី០២ បានសម្រេចអនុម័តជាស្ថាពរលើសេចក្តីព្រាងច្បាប់ស្តីពី “ការបង្កើតអង្គការបណ្តាញអន្តរជាតិសម្រាប់ឫស្សី និងផ្តៅ” ដោយទទួលបានសម្លេងគាំទ្រ ១០៧ លើ ១០៨។
លោករដ្ឋមន្ត្រីបានគោរពសម្តែងនូវអំណរអរគុណយ៉ាងជ្រាលជ្រៅជូនចំពោះសម្តេចពញាចក្រីប្រធានព្រឹទ្ធសភា ឯកឧត្តមអនុប្រធាន ឯកឧត្តម លោកជំទាវ សមាជិក សមាជិកា នៃរដ្ឋសភា ដ៏ឧត្តុង្គឧត្តម និងគ្រប់គណ:កម្មាធិការទាំងអស់ដែលបានអនុម័តយល់ព្រមលើសេចក្ដីព្រាងច្បាប់ស្ដីពី “ការបង្កើតអង្គការបណ្ដាញអន្តរជាតិសម្រាប់ឫស្សី និងផ្តៅ” នាពេលនេះ លោករដ្ឋមន្ត្រីបានប្តេជ្ញាចិត្តយ៉ាងមុតមាំថានឹងយកសេចក្តីព្រាងច្បាប់នេះទៅអនុវត្តដោយឈរលើស្មារតីទទួល ខុសត្រូវទាំងការងារច្បាប់ បច្ចេកទេស និងកិច្ចសហប្រតិបត្តិការ ដើម្បីទាញយកប្រយោជន៍ជូនជាតិ និងប្រជាជន ៕ ដោយ ៖ កូឡាប
