បន្ទាយមានជ័យ ៖ នៅថ្ងៃទី១៧ ខែមិថុនា ឆ្នាំ២០១៩ នេះ កម្លាំងនគរបាលការិយាល័យព្រហ្មទណ្ឌកំរិតធ្ងន់ នៃស្នងការដ្ឋាននគរបាលខេត្តបន្ទាយមានជ័យ បានបញ្ជូនជនសង្ស័យជាជនជាតិចិនចំនួន១២នាក់ ទៅតុលាការ បន្ទាប់ពីចាប់បង្ខាំងមនុស្សជំរិតទារប្រាក់ប្រព្រឹត្តនៅក្នុងក្រុងប៉ោយប៉ែត។
កាលពីថ្ងៃទី១៥ ខែមិថុនា ឆ្នាំ២០១៩ កម្លាំងនគរបាលផែនការងារព្រហ្មទណ្ឌនៃស្នងការដ្ឋាននគរបាលខេត្តបន្ទាយមានជ័យ សហការជាមួយកម្លាំងនគរបាលក្រុងប៉ោយប៉ែត បានចេញប្រតិបត្តិការឆ្មក់ចូលបង្ក្រាប ចាប់ឃាត់ខ្លួនជនសង្ស័យជាជនជាតិចិនចំនួន១២នាក់ ដែលបានធ្វើការបង្ខាំងជនជាតិចិនដូចគ្នាចំនួនបីនាក់ នៅក្នុងផ្ទះសំណាក់ពីរកន្លែង គឺផ្ទះសំណាក់សុផល ថាវី និងផ្ទះសំណាក់លីហ៊ូវ ដើម្បីជំរិតទារប្រាក់។
ប្រតិបត្តិការឆ្មក់ឃាត់ចាប់ជនសង្ស័យ និងរំដោះជនរងគ្រោះធ្វើឡើងក្រោមការសម្របសម្រួលនីតិវិធីពី លោក មាស ច័ន្ទពិសិដ្ឋ ព្រះរាជអាជ្ញាអមសាលាដំបូងខេត្តបន្ទាយមានជ័យ។
សមត្ថកិច្ចបានរំដោះជនរងគ្រោះចំនួន៣នាក់ និងចាប់ខ្លួនជនសង្ស័យបាន១២នាក់ នៅផ្ទះសំណាក់សុផលថាវី ។
១.He wu jun អាយុ ៣០ឆ្នាំ
២. Liu Meng Hui អាយុ ២៥ឆ្នាំ
៣. Zhang Hang អាយុ ២២ឆ្នាំ
៤. He. Fan អាយុ ២៥ឆ្នាំ
៥. Miao Yun. អាយុ ២០ឆ្នាំ
៦. Li hong Fu អាយុ ២៤ឆ្នាំ ។
ចំណែកករណីទីពីរសមត្ថកិច្ចបានចុះទៅឆែកឆេរផ្ទះសំណាក់មួយកន្លែងទៀតយីហោ លី ហ៊ូវ ដោយមានការសហការពីម្ចាស់ផ្ទះ កម្លាំងបានឆ្មក់ចូល បន្ទប់១០៣/១០៤/១០៩ រំដោះជនរងគ្រោះជាជនជាតិចិន ដែលត្រូវគេបង្ខាំងទុក(ធេី្វទារុណកម្មវាយដំដៃជាប់ចំណង ចំនួន០២នាក់) បន្ថែមទៀតឈ្មោះ ៖
១. Tuli Gule អាយុ ១៨ឆ្នាំ
២. Tian gang អាយុ ៣៦ឆ្នាំ។
ឃាត់ខ្លួនជនសង្ស័យ០៦នាក់បន្ថែមទៀត រួមមានឈ្មោះ
១. Wang gua quan អាយុ ២២ឆ្នាំ
២. Yang Zhao. អាយុ ២៤ឆ្នាំ
៣. Mang Chao. អាយុ ២៧ឆ្នាំ
៤. Yang Tian. អាយុ ៣១ឆ្នាំ
៥. Lie Yu Hang. អាយុ ២២ ឆ្នាំ
៦. Ding chun. អាយុ ១៨ឆ្នាំ
កម្លាំងនគរបាលបង្ក្រាបចាប់ឃាត់ខ្លួនជនជាតិចិន ១២នាក់ខាងលើ អនុវត្តតាមបណ្តឹងរបស់ស្ថានទូតចិនប្រចាំប្រទេសកម្ពុជា បន្ទាប់ពីទទួលព័ត៌មានពីក្រុមគ្រួសារជនរងគ្រោះនៅប្រទេសចិន។
ជនរងគ្រោះ៣នាក់ជាជនជាតិចិន ត្រូវបានជនសង្ស័យជនជាតិចិនទាំងនោះបង្ខាំងទារប្រាក់ និងធ្វើទារុណកម្ម ហើយផ្ញើរូបភាពទៅគ្រួសារជនរងគ្រោះនៅក្នុងប្រទេសចិន ក្រោយពីក្រុមជនសង្ស័យឱ្យប្រាក់ទៅជនរងគ្រោះខ្ចីលេងល្បែងចាញ់អស់ប្រាក់ និងគ្មានប្រាក់សងទៅក្រុមជនសង្ស័យទាំងនោះវិញ។ ជនរងគ្រោះរងការធ្វើទារុណកម្មបង្កឱ្យរបួសស្នាមពេញខ្លួន ហើយត្រូវបានកម្លាំងនគរបាលរំដោះបញ្ជូនទៅសម្រាកព្យាបាលនៅមន្ទីរពេទ្យឯកជនមួយកន្លែងក្នុងក្រុងប៉ោយប៉ែត ខេត្តបន្ទាយមានជ័យ។
អធិការនគរបាលរងក្រុងប៉ោយប៉ែតទទួលបន្ទុកផ្នែកអន្តោប្រវេសន៍ លោក អេង លីហួ បានថ្លែងថា ជនល្មើសជាជនជាតិចិនទាំងនោះ សមត្ថកិច្ចចាប់បាននៅក្នុងផ្ទះសំណាក់ ឈ្មោះ សុផល ថាវី ចំនួន៦នាក់ និងរំដោះជនរងគ្រោះបានម្នាក់ និងជនជាតិចិនចំនួន៦នាក់ទៀត ចាប់នៅក្នុងផ្ទះជួលក្បែរផ្ទះសំណាក់សុផល ថាវី នោះដែរ និងជួយរំដោះជនរងគ្រោះ២នាក់ នៅក្នុងភូមិក្បាលស្ពាន១ សង្កាត់ប៉ោយប៉ែត ក្រុងប៉ោយប៉ែត ខេត្តបន្ទាយមានជ័យ ពាក់ព័ន្ធនឹងការឃាត់មនុស្សដើម្បីឱ្យសងលុយវិញ ដោយសារចិនគ្នាគាត់ជំពាក់លុយ ហើយឃាត់មនុស្សឱ្យសងលុយវិញ ដល់ពេលអីចឹង យើងបានទទួលពាក្យបណ្ដឹងពីឪពុកម្ដាយពីប្រទេសចិនតាមរយៈស្ថានទូតប្រចាំនៅកម្ពុជា ហើយក៏ចុះបង្ក្រាបបាន២ទីតាំង។ ទាំងនេះមានលិខិតឆ្លងដែនទាំងអស់គ្នា។
លោកបន្តថា សមត្ថកិច្ចបានសាកសួរជនជាតិចិនទាំងនោះ តាំងពីថ្ងៃចាប់ខ្លួន រហូតដល់រសៀលដដែល នៅថ្ងៃទី១៦ មិថុនា នៅមិនទាន់ចប់នៅឡើយទេ។ លោកថា សមត្ថកិច្ចនឹងបន្តសាកសួរទៀត មុននឹងបញ្ជូនពួកគេទៅ សាលាដំបូងខេត្តបន្ទាយមានជ័យ៕ ដោយ ៖ កូឡាប
