ខេត្តព្រះសីហនុ ៖ សមត្ថកិច្ចនគរបាលទេសចរណ៍ នៃស្នងការដ្ឋាននគរបាលខេត្តព្រះសីហនុ បានឱ្យដឹងថា យប់ម៉ិញនេះ មានទូកដឹកភ្ញៀវទេសចរណ៍១គ្រឿង របស់ក្រុមហ៊ុន ដាលីធួរ បានលិចនៅក្នុងសមុទ្រ មានទីតាំងនៅទល់មុខឆ្នេរម្លប់ជ្រៃ ស្ថិតក្នុងក្រុងព្រះសីហនុ នៅម៉ោង៩យប់ ថ្ងៃទី១៦ ខែមិថុនា ឆ្នាំ២០១៩ ។
ទាក់ទិនបញ្ហានេះ លោក ណុប បញ្ញា ស្នងការរងនគរបាលខេត្តព្រះសីហនុ បានឱ្យប្រព័ន្ធផ្សព្វផ្សាយដឹង នៅថ្ងៃទី១៧ ខែមិថុនា ឆ្នាំ២០១៩នេះថា ទូកទេសចរណ៍ ១គ្រឿង ដែលលិចនោះ ដោយសារបញ្ហាលក្ខណៈបច្ចេកទេស គឺមិនជាប់ពាក់ព័ន្ធបញ្ហាអាកាសធាតុមិនល្អ មូលដ្ឋាននេះ មានភ្លៀង ធ្លាក់ មានរលកសមុទ្រ និងខ្យល់បោកបក់ខ្លាំងនោះទេ។
លោក ណុប បញ្ញា ឱ្យដឹងថា ហេតុការណ៍ខាងលើនេះ គឺបណ្តាលឱ្យមានការខូចខាតទ្រព្យសម្បត្តិមួយចំនួន និងខូចខាតទូកដឹកភ្ញៀវទេសចរណ៍ខ្លះៗ ប៉ុន្តែមិនមានគ្រោះថ្នាក់ដល់អាយុជីវិតមនុស្សទេ។
ផ្តើមពីបញ្ហានេះ លោក ណុប បញ្ញា បានក្រើនរំលឹកដល់ប្រជាពលរដ្ឋ ជាពិសេសភ្ញៀវទេសចរ ឱ្យប្រុងប្រយ័ត្នខ្ពស់ក្នុងការធ្វើដំណើរតាមសមុទ្រ។ ព្រោះថា រដូវនេះជារដូវវស្សាមានភ្លៀងធ្លាក់ច្រើន មានខ្យល់បោកបក់ និងមានរលកសមុទ្រធំៗផងនោះ។ លោកសូមអំពាវនាវដល់អ្នកធ្វើដំណើរតាមផ្លូវសមុទ្រ ជាពិសេសភ្ញៀវទេសចរធ្វើដំណើរកម្សាន្តតាមសមុទ្រ និងប្រជានេសាទជាដើម ត្រូវបង្កើនការប្រុងប្រយ័ត្ន ពីសុវត្ថិភាពរបស់ខ្លួនឱ្យបានជាប្រចាំ។
ជាងនេះទៀត ប្រសិនបើសង្កេតឃើញថា នៅមូលដ្ឋានខេត្តព្រះសីហនុ កំពុងតែមានភ្លៀង ខ្យល់ និងរលកសមុទ្របោកបក់ខ្លាំង សូមកុំធ្វើណើរតាមសមុទ្រឱ្យសោះ ដើម្បីការពារសុវត្ថិភាពទាំងអស់គ្នា៕ ដែន សីមា
