សហរដ្ឋអាមេរិចនឹងធ្វើការបញ្ជូនទ័ពបន្ថែមចំនួន ១.០០០នាក់ ទៅកាន់មជ្ឍិមបូព៌ា ខណៈដែលភាពតានតឹងជាមួយអ៊ីរ៉ង់កំពុងឡើងកម្តៅខ្លាំង ក្រោយពេលមានការវាយប្រហារលើកប៉ាល់ដឹកប្រេងចំនួន ២គ្រឿងនៅឈូងសមុទ្រអូម៉ង ដែលអាមេរិចចោទថាជាទំនួលខុសត្រូវរបស់អ៊ីរ៉ង។
រដ្ឋមន្ត្រីការពារជាតិស្តីទី លោក Patrick Shanahan បានថ្លែងថា ការដាក់ពង្រាយទ័ពបន្ថែមនោះគឺដើម្បីជាការឆ្លើយតបទៅនឹងសកម្មភាពរបស់កងកម្លាំងអ៊ីរ៉ង់។
កាលពីពេលថ្មីៗនេះ កងនាវាជើងទឹកអាមេរិចបានបញ្ចេញរូបភាពដែលអាមេរិចបានភ្ជាប់អ៊ីរ៉ង់ទៅនឹងការវាយប្រហារលើកប៉ាល់ដឹកប្រេងនៅឈូងសមុទ្រអូម៉ង។
នៅថ្ងៃច័ន្ទម្សិលមិញនេះ អ៊ីរ៉ងបានប្រកាសថាខ្លួននឹងលែងអនុវត្តតាមផ្នែកមួយនៃកិច្ចព្រមព្រៀងឆ្នាំ ២០១៥ ដែលទប់ស្កាត់មហិច្ឆតានុយក្លេអ៊ែររបស់ខ្លួនទៀតហើយ។
អ៊ីរ៉ង់បញ្ជាក់ថា ខ្លួននឹងលែងអនុវត្តតាមកិច្ចព្រមព្រៀងដែលកម្រិតដោយមហាអំណាចអន្តរជាតិ ក្នុងការបង្កើនជាតិអ៊ុយរ៉ាញ៉ូមរបស់ខ្លួននៅថ្ងៃទី ២៧ ខែមិថុនាខាងមុខ។
ការប្រកាសបន្ថែមទ័ពទៅកាន់មជ្ឍិមបូព៌ា ត្រូវបានប្រកាសកាលពីថ្ងៃច័ន្ទម្សិលមិញ ដោយលោក Patrick Shanahan។
នៅក្នុងសេចក្តីប្រកាស លោកបានថ្លែងថា “អាមេរិចមិនកំពុងស្វែងរកជម្លោះជាមួយអ៊ីរ៉ងនោះទេ ប៉ុន្តែសកម្មភាពរបស់ពួកយើងគឺដើម្បីធានាសុវត្ថិភាព និងសុខមាលភាពរបស់កងកម្លាំងពួកយើង ដែលកំពុងបំពេញកិច្ចការទូទាំងតំបន់ ដើម្បីការពារផលប្រយោជន៍ជាតិ”៕
អត្ថបទប្រែសម្រួលដោយ៖ សុភ័ក្រ
ប្រភព៖ BBC