ខេត្តមណ្ឌលគិរី ៖ ប្រជាសហគមន៍ជនជាតិដើមភាគតិច រស់នៅក្នុងស្រុកកោះញ៉ែក បានផ្តល់ព័ត៌មានមកថា មានក្រុមហ៊ុនទទួលបានដីសម្បទានសេដ្ឋកិច្ចពីរដ្ឋាភិបាលចំនួន៣ នៅស្រុកកោះញ៉ែក កំពុងធ្វើសកម្មភាពប្រមូលកាប់ឈើខុសច្បាប់ រួចដឹកចូលក្នុងដីបរិវេណក្រុមហ៊ុន ដើម្បីបំលែងឈើខុសច្បាប់នោះ ឱ្យក្លាយទៅជាឈើស្របច្បាប់ រួចហើយដឹកចេញតាមរថយន្តធំៗ រាប់រយគ្រឿង ក្នុង១ខែៗ ចេញទៅក្រៅប្រទេស។
បទល្មើសព្រៃឈើអនាធិបតេយ្យ ដែលអាចបន្តធ្វើសកម្មភាពរាល់ថ្ងៃ នៅខេត្តមណ្ឌលគិរី ដោយគ្មានការហាមឃាត់ គឺត្រូវបានមជ្ឈដ្ឋាននានា បានដឹងជាយូឆ្នាំមកហើយ ប៉ុន្តែពួកគេមានចម្ងល់ថា បែរជាមិនដែលឃើញមានសមត្ថកិច្ចពីស្ថាប័នពាក់ព័ន្ធផ្នែកណាមួយចេញមុខចុះបង្ក្រាបឱ្យមានប្រសិទ្ធភាពនោះទេ។
ត្រង់ចំណុចនេះ ប្រជាសហគមន៍ជនជាតិដើមភាគតិច និងប្រជាពលរដ្ឋ រស់នៅខេត្តមណ្ឌលគិរី បានដាក់ការសង្ស័យថា ក្រុមឧកញ្ញ៉ា ឬឈ្មួញ រកស៊ីកាប់ឈើខុសច្បាប់មួយចំនួននោះ ទំនងជាបានយកលុយទៅញ៉ុកភ្នែកមន្ត្រីទាំងនោះហើយមើលទៅ ទើបបានជាមន្ត្រីស្ថាប័នពាក់ព័ន្ធមួយចំនួននោះ ងងឹតភ្នែកមើលអ្វីមិនឃើញ ដូចដេកលក់បែបនេះ។
ទាក់ទិនបញ្ហានេះ សមាជិកសហគមន៍ម្នាក់ ថ្លែងមិនបញ្ចេញឈ្មោះ ឱ្យដឹងថា បច្ចុប្បន្ននេះ ក្រុមហ៊ុន យ៉ានថាវ ខេមបូឌា ដែលមានម្ចាស់ឈ្មោះ ZHANG WENIAO និង ក្រុមហ៊ុន ថាច់វូដ ខេមបូឌាខូអិលធីឌី មាននាយកក្រុមហ៊ុនឈ្មោះ SONG WENZHANG ដែលទីតាំងក្រុមហ៊ុនទាំងពីរនេះ ស្ថិតនៅក្នុងស្រុកកោះញ៉ែក កំពុងធ្វើសកម្មភាពដាក់ពង្រាយកម្លាំងកម្មករទាំងខ្មែរ និងជនជាតិបរទេសជាច្រើននាក់ចូលទៅនៅក្នុងព្រៃ ដើម្បីធ្វើសកមក្មភាពកាប់រំលំដើមឈើ ក្នុងដែនជម្រកសត្វព្រៃភ្នំព្រិចយ៉ាងសកម្ម។ ហើយថា ក្រោយមក ក៏បានដឹកឈើខុសច្បាប់ទាំងនោះ ចូលក្នុងបរិវេណក្រុមហ៊ុនទាំង ៣ ទាំងយប់ទាំងថ្ងៃ ដោយគ្មានការរំខានពីកម្លាំងសមត្ថកិច្ចជំនាញស្ថាប័នពាក់ព័ន្ធណាមួយនោះទេ។
ប្រភពព័ត៌មានដដែលបន្តថា ក្រុមហ៊ុនទាំង៣នោះរួមមាន៖ ក្រុមហ៊ុន យ៉ានថាវ , ក្រុមហ៊ុន ថាច់វូដ និងក្រុមហ៊ុន ប៉ាស៊ីភិក។
ប្រភពព័ត៌មានឱ្យដឹងបន្តទៀតថា ក្នុងចំណោមក្រុមហ៊ុនទាំង៣នោះ គឺមានក្រុមហ៊ុនមួយឈ្មោះ យ៉ានថាវ កំពុងតែសកម្មជាងគេ ក្នុងប្រមូលដឹកឈើ ដែលបានកាប់ផ្តួលរំលំនោះ ចេញពីក្នុងព្រៃ ហើយបានបំលែងឈើ ដែលខុសច្បាប់នោះ ឱ្យក្លាយជាឈើស្របច្បាប់ រួចដឹកចេញទាំងយប់ទាំងថ្ងៃចេញទៅក្រៅប្រទេស។
ត្រង់ចំណុចនេះ ប្រជាពលរដ្ឋ និងប្រជាសហគមន៍ជនជាតិដើមភាគតិច បានលើកជាចម្ងល់ថា ចំពោះសកម្មភាពដឹកឈើអនាធិបតេយ្យ ដែលអាចធ្វើសកម្មភាពបានគគ្រឹកគ្រេង ហើយគ្មានការរំខានពីកម្លាំងសមត្ថកិច្ចពាក់ព័ន្ធបែបនេះ ទំនងជាក្រុមហ៊ុនទាំងនោះ អាចមានខ្នងបង្អែកជាមន្ត្រីមានអំណាចមានឋានៈខ្ពស់ ទើបគ្មានសមត្ថកិច្ច នៃរដ្ឋបាលខេត្តមណ្ឌលគិរី ចេញមុខបង្ក្រាបបែបនេះ ។
យោងតាមប្រភពព័ត៌មានបានឱ្យដឹងថា ពាក់ព័ន្ធសកម្មភាពខាងលើនេះ គឺមានមេកាមើលការខុសត្រូវ របស់ក្រុមយ៉ានថាវ ឈ្មោះ ម៉េង និងមេកាម្នាក់ទៀត ដែលមិនសូវចេញមុខមាន ឈ្មោះ យ៉ត ត្រូវជាកូនលោកធំ និងមានឋានៈខ្ពស់នៅក្នុងខេត្តមណ្ឌលគិរី គឺជាអ្នកនៅពីក្រោយសកម្មភាពរត់ការបង់លុយតាមផ្លូវ ជូនកម្លាំងសមត្ថកិច្ចជំនាញស្ថាប័នពាក់ព័ន្ធ នៅពេលឡានដឹកឈើ ចេញទៅក្រៅប្រទេសម្តងៗ។
ប្រភពបន្តទៀតថា ក្រុមមេកាឈ្មោះ ម៉េង និងឈ្មោះ យ៉ត ទាំងពីរនាក់ខាងលើនេះ បានប្រគល់ការងាររត់ការនេះ ទៅឱ្យឈ្មោះ ហេង ជាអ្នកចាត់ចែងជាមួយសមត្ថកិច្ចគ្រប់ជំនាញ ក្នុងខេត្តមណ្ឌលគិរី និងចាត់ចែងបន្តរហូតដលគោលដៅចុងក្រោយ ដែលក្រុមហ៊ុនត្រូវនាំឈើចេញ។
ទាក់ទិនបញ្ហានេះ នាយកដែនជម្រកសត្វព្រៃភ្នំព្រិច លោក ហាន សុខន បានឱ្យដឹងថា ក្រុមហ៊ុនទាំង៣ខាងលើនេះ មានទីតាំងនៅតំបន់របៀងអភិរក្ស។ ហើយថា រាល់បទល្មើសព្រៃឈើទាំងនោះ គឺមិនជាប់ពាក់ព័ន្ធ ជាមួយដែនជម្រកសត្វព្រៃភ្នំព្រិចនោះទេ។
ចំណែក លោក គង់ វិរៈ នាយផ្នែករដ្ឋបាលព្រៃឈើស្រុកញ៉ែក មិនទាន់អាចសុំការបំភ្លឺ បានទេតាមទូរស័ព្ទ ដោយលេខទូរស័ព្ទ របស់គាត់ហៅចូលច្រើនដង ប៉ុន្តែមិនមានអ្នកលើកទទួល៕ ដោយ ៖ ដែន សីមា