ខេត្តស្វាយរៀង ៖ ឡានប្រភេទសាំយ៉ុង ១៥កៅអីមួយគ្រឿង ពាក់ផ្លាកលេខព្រះសីហនុ 2A 1326 ត្រូវបានឈ្មួញធ្វើសកម្មភាពដោះកៅអីចេញហើយបានដាក់សត្វជ្រូករស់ប្រហែល២០ក្បាល ហើយត្រូវបានមន្ត្រីសមត្ថកិច្ចការិយាល័យផលិតកម្មនិងបសុព្យាបាលខេត្តស្វាយរៀងធ្វើការស្ទាក់ចាប់បាននៅត្រង់ចំណុចផ្សារព្រាត់ប្រាស់ស្ថិតក្នុងភូមិថ្មីឃុំចំបក់ ស្រុកស្វាយជ្រំ ខេត្តស្វាយរៀងកាលពីវេលាម៉ោង៩និង២០នាទីព្រឹកថ្ងៃទី១៥ ខែមិថុនា ឆ្នាំ២០១៩ ។
លោក ប៉ែន ចន្ធី ប្រធានការិយាល័យផលឹតកម្មនិងបសុព្យាបាលខេត្តស្វាយរៀងបានឱ្យដឹងថា ៖ ពិតជាមានករណីខាងលើនេះមែនប៉ុន្តែដោយសារកំលាំងមន្ត្រីរបស់លោកមានគ្នាតិចពេកទើបមិនអាចចាប់ឡានដឹកជ្រូកខាងលើនេះបានហើយម្យ៉ាងទៀតក៏ដោយសារតែមានមន្ត្រីយោធាបានចេញមុខមកអន្តរាគមន៍រំដោះយករថយន្តរបស់ឈ្មួញដឹកជ្រូកខុសច្បាប់បើកចេញទៅបាត់ដោយសុវត្ថិភាពបើទោះបីជាមន្ត្រីជំនាញបានយកម៉ូតូទៅដាក់ពាំងខាងមុខឡានឈ្មួញនោះក៏ដោយ ។
ប្រភពដដែលបានឱ្យដឹងទៀតថា ៖ ចំពោះមន្ត្រីយោធាដែលចេញមុខមករំដោះរថយន្តដឹកជ្រូកនោះលោកបានធ្វើរបាយការណ៍ជំរាបជូនថ្នាក់ដឹកនាំខេត្តរួចហើយព្រមទាំងបានកសាងសំណុំរឿងបញ្ជូនទៅតុលាការខេត្តស្វាយរៀងថែមទៀតផង។
ដោយឡែកប្រភពព័ត៍មានច្បាស់ការពីមន្ត្រីសាលាស្រុកស្វាយជ្រំបានឱ្យដឹងផងដែរថា ៖ មន្ត្រីយោធាស្រុកស្វាយជ្រំដែលចេញមុខមកកាងរំដោះឡានឈ្មួញដឹកជ្រូកខុសច្បាប់នោះឈ្មោះគង់ ប៉ុន្តែមិនដឹងមានតួនាទីជាអ្វីឱ្យប្រាកដនោះទេហើយលោកក៏បានរាយការណ៍ជូនថ្នាក់ដឹកនាំរួចហើយអំពីករណីនេះទុកជូនថ្នាក់លើសំរេចទៅចុះ។
មន្ត្រីខាងលើបានបន្តថា ៖ មិនត្រឹមតែចេញមុខមកកាងរំដោះបទល្មើសនោះទេ មន្ត្រីយោធារូបនោះថែមទាំងនិយាយថា ពីមុនពុំដែលមាននរណាហ៊ានចាប់នោះទេ គឺគេអាចរកសុីបានដោយរលូននិយាយជារួមគឺគ្មានបញ្ហា sic ។
ពាក់ព័ន្ធករណីខាងលើនេះក្រុមអ្នកសារព័ត៍មានពុំអាចធ្វើការទំនាក់ទំនងមន្ត្រីយោធាឈ្មោះគង់នោះបានដែរនៅរសៀលថ្ងៃទី១៧ ខែមិថុនា ឆ្នាំ២០១៩នេះ។ ដោយឡែកលោក ចេត សា មន មេបញ្ជាការផ្នែកសឹករងស្រុកស្វាយជ្រំ ដែលមានលេខទូរស័ព្ទលេខ ០៩៧ ៩៩៦៦២៧៦ ពេលទូរស័ព្ទចូលលោកថាច្រំឡំលេខហើយ ! ។
សូមរំលឹកផងដែរថា៖ កាលពីថ្ងៃទី១៥ ខែមីនាឆ្នាំ២០១៩នេះ លោក អភិបាលខេត្តស្វាយរៀងបានចេញសេចក្តីណែនាំលេខ០០២/១៩ សណនស្តីពីវិធានការបន្ទាន់ដើម្បីត្រួតពិនិត្យនិងទប់ស្កាត់ការឆ្លងរាលដាលជម្ងឺប៉េសជ្រូកអាហ្វ្រិក ហើយពេលទទួលបានសេចក្តីណែនាំនេះអាជ្ញាធរគ្រប់លំដាប់ថ្នាក់ មន្ទីរអង្គភាពពាក់ព័ន្ធនានាត្រូវមានវិធានការណែនាំអនុវត្តជាក់ស្តែងឱ្យបានសមស្របនិងមានប្រសិទ្ធភាពឈានទៅសម្រេចបាននូវបរិមាណនិងគុណភាពខ្ពស ហើយលោកអភិបាលខេត្តស្វាយរៀងធ្លាប់បានធ្វើការព្រមានធ្ងន់ៗដល់មន្ត្រីក្រោមឱវាទទាំងអស់ថា បើនៅតែប្រព្រឹត្តផ្ទុយទៅនឹងសេចក្តីណែនាំខាងលើនោះលោកនឹងអនុវត្តនូវអភិក្រមទាំង ៥របស់សម្តេចតេជោនាយករដ្ឋមន្ត្រីជាក់ជាមិនខានឡើយ។
សំណួរសួរថា ៖ មន្ត្រីយោធាដែលបានប្រព្រឹត្តនូវករណីខាងលើនេះតើហ៊ានរឺមិនហ៊ាន? ប្រជាពលរដ្ឋកំពុងរង់ចាំមើលចំណាត់ការកណ្តាប់ដៃដែករបស់ថ្នាក់ដឹកនាំដើម្បីឱ្យពួកគាត់មានសង្ឃឹមនឹងជឿជាក់ដើម្បីអភិវឌ្ឍន៍សង្គម ៕ វ៉ៃកូ
