IDP Education គឺជាស្ថាប័នធំជាងគេបង្អស់លើពិភពលោកដែលបានដើរតួនាទីក្នុងការបញ្ជូនសិស្ស និស្សិត ទៅសិក្សានៅប្រទេសអូស្ត្រាលី កាណាដា អៀរឡង់ណូវែលហ្សេឡង់ អាមេរិច និងអង់គ្លេស។ ស្ថាប័ន IDP មានការិយាល័យជាង ១០០ នៅច្រើនជាង ៣២ប្រទេសជុំវិញពិភពលោក។
រៀបចំឡើងដោយ ស្ថាប័ន IDP កម្មវិធីពិព័រណ៍ពីអាហារូបករណ៍និងការសិក្សានៅបរទេសបានផ្តល់អោយនូវវេទិកាដ៏ល្អបំផុតសម្រាប់សិស្ស និស្សិតកម្ពុជានិងអាណាព្យាបាលដើម្បីជួបពិភាក្សាជាមួយនឹងអ្នកជំនាញប្រឹក្សារបស់ស្ថាប័នIDPដើម្បីទទួលបានពត៌មានពីការសិក្សាទៅកាន់ប្រទេសទាំង ៦ ដែលមានដូចជា អូស្ត្រាលី កាណាដាណូវែលហ្សេឡង់ សហរដ្ឋអាមេរិក អង់គ្លេស និងអៀរឡង់។
កម្មវិធីនេះត្រូវបានធ្វើឡើងនៅថ្ងៃទី ១៦ មិថុនា ឆ្នាំ ២០១៩ នៅសណ្ឋាគារសូហ្វីតែលអង្គរ សៀមរាប បានផ្តល់ឱកាសអោយសិស្ស និស្សិត និងអាណាព្យាបាលជួបពិភាក្សាជាមួយអ្នកជំនាញរបស់ស្ថាប័ន IDP។
«ប្រទេសទាំង ៦ ផ្តល់នូវការអប់រំលំដាប់អន្តរជាតិទៅលើការសិក្សាគ្រប់កម្រិត និង ស្ថាប័ន IDP ពិតជាមានសេចក្តីសោមន្សរីករាយក្នុងការចូលរួមជ្រោមជ្រែងសិស្ស និស្សិតអោយសម្រេចនូវក្តីស្រមៃទៅលើការសិក្សារបស់ពួកគេ និងរៀបចំផ្លូវសម្រាប់ពួកគេដើម្បីឈានទៅកាន់អាជីពដែលពួកគេប្រាថ្នាផងដែរ» ប្រសាសន៍របស់លោក ម៉ៅ ស្រេង នាយកស្ថាប័ន IDP ប្រចាំប្រទេសកម្ពុជា។
កម្មវិធីពិព័រណ៍ពីអាហារូបករណ៍ និងការសិក្សានៅបរទេសនេះ គឺជាវេទិកាការសិក្សាអន្តរជាតិដ៏ធំជាងគេនៅកម្ពុជា ជាមួយនឹងវត្តមានរបស់សិស្ស និស្សិត និងអាណាព្យាបាលជាង ៣៥០ នាក់បានជួបពិភាក្សាជាមួយអ្នកជំនាញស្ថាប័ន IDP ដើម្បីទទួលបានពត៌មានផ្សេងៗ ក៏ដូចជាពត៌មានទាក់ទងនឹងជម្រើសសិក្សា ឱកាសអាហារូបករណ៍ និងដំណើរការទិដ្ឋាការជាដើម។ការផ្តល់ប្រឹក្សាទៅសិក្សានៅបរទេសរបស់ស្ថាប័ន IDP គឺមិនតម្រូវអោយបង់ប្រាក់ទេ។
«ខ្ញុំពិតជាមានភាពរីករាយណាស់ដែលបានមកចូលរួមកម្មវីធីពិព័រណ៍អាហារូបករណ៍ និងការសិក្សានៅបរទេសក្នុងថ្ងែនេះ! ខ្ញុំបានមានឱកាសជួបជាមួយនឹងអ្នកជំនាញក្នុងការប្រឹក្សាយោបល់ទៅសិក្សានៅបរទេស និងបានស្វែងយល់ពត៌មានទាក់ទងនឹងការដាក់ពាក្យសុំចូលរៀន និងការរៀបចំទិដ្ឋាការទៅសិក្សានៅបរទេស ដែលជាចម្ងល់ដែលខ្ញុំមានជាយូរមកហើយ» សម្តីរបស់សិស្សម្នាក់ដែលមកពីសាលានៅខេត្តសៀមរាប។
ដោយឡែកអ្នកតំណាងមកពីមជ្ឈមណ្ឌលអូស្ត្រាលីសម្រាប់ការបណ្តុះបណ្តាល(ACE) ក៏មានវត្តមានក្នុងកម្មវិធីនេះដែរនិងបានផ្តល់នូវពត៌មានទាក់ទងនឹងការអភិវឌ្ឍន៍កម្រិតភាសាអង់គ្លេសដែលស្ថាប័នអប់រំក្រៅប្រទេសត្រូវការ។លើសពីនេះ អ្នកតំណាងមកពីមណ្ឌលប្រលងតេស្តភាសាអង់គ្លេសIELTS ដែលជាតេស្តមានត្រូវបានទទួលស្គាល់ជាអន្តរជាតិក៏បានមានវត្តមាននៅកម្មវិធីនេះដើម្បីផ្តល់នូវពត៌មានអំពីការចុះឈ្មោះនិងការត្រៀមប្រលងក៏ដូចជាផ្តល់នៅការធ្វើតេស្តតាមរយៈកុំព្យូទ័រ (CDI) សាកល្បង។
នៅប្រទេសកម្ពុជា សិស្ស និស្សិត និងអាណាព្យាបាលអាចស្វែងរកការិយាល័យផ្តល់ ពត៌មានទៅសិក្សានៅបរទេស IDP នៅគ្រប់សាខានៃសាលា ACE ទីក្រុងភ្នំពេញ និងខេត្តសៀមរាប ដើម្បីទទួលបានការប្រឹក្សាដោយឥតគិតថ្លៃ ៕ ដោយ ៖ កូឡាប