កំពង់ត្រឡាច ៖ តៃកុងឡានម្នាក់បានស្លាប់ ក្នុងគ្រោះថ្នាក់ចរាចរមួយ ដោយតៃកុងរូបនោះ បានបើករថយន្តសណ្ដោងរឺម៉ក ទៅបុករថយន្តធុនធំមួយគ្រឿងទៀត ដែលកំពុងចតលើផ្លូវ។
នៅថ្ងៃពុធទី១៩ ខែមិថុនា ឆ្នាំ២០១៩ វេលាម៉ោង១និង០០នាទី នៅចំណុចផ្លូវជាតិលេខ៥ ចន្លោះបង្គោលគីឡូម៉ែត្រលេខ៥០/៥១ ភូមិតាកុល ឃុំពានី ស្រុកកំពង់ត្រឡាច ខេត្តកំពង់ឆ្នាំង មានករណីគ្រោះថ្នាក់ ចរាចរណ៍មួយកើតឡើងរវាងរថយន្តម៉ាកISUZU ពណ៌ស (ចង្កូតស្ដាំ)របស់ក្រុមហ៊ុនដឹកជញ្ជូនត្បូងពេជ្រ ពាក់ផ្លាកលេខពោធិ៍សាត់ 3A-0397 សណ្ដោងរុឺម៉ក ពាក់ផ្លាកលេខ ព្រះសីហនុ 4A-0506 អ្នកបើកបរឈ្មោះ ម៉េង លាង ភេទ ប្រុស អាយុ៣៦ឆ្នាំ ជនជាតិខ្មែរ ស្នាក់ នៅគីឡូម៉ែត្រលេខ៤ សង្កាត់ផ្សារកណ្ដាល ក្រុងប៉ោយប៉ែត ខេត្តបន្ទាយមានជ័យបើកបរពីទិស ខាងជើងឆ្ពោះទៅទិសខាងត្បូង និងរថយន្តម៉ាកហុីយ៉ាន់ដាយ ពណ៌ស ឆ្នូតពណ៌ខៀវ ពាក់ផ្លាកលេខ កំពង់ចាម 3A- 4770 សណ្ដោងរុឺម៉ក គ្មានផ្លាកលេខ របស់ក្រុមហ៊ុនដឹកជញ្ជូនឡោម៉េង ហួត(ចតស្ងៀម)។ អ្នកបើកបរមិនស្គាល់ឈ្មោះ និងអសយដ្ឋាន ចតពីទិសខាងជើងឆ្ពោះទៅទិស ខាងត្បូងក្នុងដំណើរស្របទិសគ្នា។
ក្នុងហេតុការគ្រោះថ្នាក់នេះបណ្តាលឲ្យស្លាប់មនុស្សប្រុស ១នាក់ (អ្នកបើកបររថយន្តISUZU ) និងខូចខាត រថយន្ត ១គ្រឿង។ មូលហេតុ បណ្ដាលមកពីកត្តាមនុស្សបើកបរ ក្នុងល្បឿនលឿន។
វត្ថុតាងជំនាញបានយកមករក្សាទុក នៅអធិការដ្ឋាន នគរបាលស្រុកកំពង់ត្រឡាច ដើម្បីអនុវត្តតាមនីតិវិធី៕ ដោយ៖កូឡាប