ភ្នំពេញៈ គ្រឿងសំអាងក្លែងក្លាយខុសច្បាប់ចំនួនជាង ៨០តោន ដែលសមត្ថកិច្ចចម្រុះ នៃគណៈកម្មាធិការប្រយុទ្ធប្រឆាំងផលិតផលក្លែងក្លាយ ដែលបង្កគ្រោះថ្នាក់ហានិភ័យខ្ពស់ដល់សុខភាព និងសុវត្ថិភាពសង្គម ត្រូវដុតបំផ្លាញចោល នៅព្រឹកថ្ងៃទី០៣ ខែតុលា ឆ្នាំ២០១៧ នេះ នៅទីលានចាក់សំរាមក្នុងជើងឯក ខណ្ឌដង្កោ ក្រោអធិបតីភាពសម្តេចក្រឡាហោម ស ខេង ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ ដោយមានការចូលរួមពីតតំណាងស្ថានទូត ស្ថាប័នតុលាការ រួមទាំងអាជ្ញាធរមានសមត្ថកិច្ចពាក់ព័ន្ធ។
គណៈកម្មាធិការប្រយុទ្ធប្រឆាំងផលិតផលក្លែងក្លាយ ដែលបង្កគ្រោះថ្នាក់ហានិភ័យខ្ពស់ដល់សុខភាព និងសុវត្ថិភាពសង្គម បានបញ្ជាក់ថា ពិធីកំទេចចោលគ្រឿងសំអាង ត្រូវបានអនុវត្តតាមការបង្គាប់របស់តុលាការ។
គណៈកម្មាធិការប្រយុទ្ធប្រឆាំងផលិតផលក្លែងក្លាយនៃក្រសួងមហាផ្ទៃ បានបង្ក្រាបទីតាំង ផលិតផលក្លែងក្លាយ ៥កន្លែង រឹបអូសផលិតផលក្លែងក្លាយ ជិត៧០តោន កាលពីខែមេសា ឆ្នាំ២០១៧ កន្លងមកនេះ។ អាជ្ញាធរចាត់ទុកការបង្ក្រាបបាននេះ ជាប្រវត្តិសាស្ត្រ។
ការបង្ក្រាបផលិតផលក្លែងក្លាយ ៥ទីតាំង ទម្ងន់ជិត ៨០តោន ជាទ្រង់ទ្រាយធំលើកដំបូងនៅក្នុងខែកាលពីថ្ងៃទី២២-២៣ ខែមេសា ឆ្នាំ២០១៧ គឺផលិតផលក្លែងក្លាយទាំងនេះមានម្សៅ ឬឡេលាបស្បែក ថ្នាំលាបសក់ ម៉ាសបកស្បែក និងសាប៊ូកក់សក់ដែលមានឈ្មោះល្បី មានជាអាទិ៍ សាប៊ូកក់សក់ម៉ាកប៉ង់តែន (Pantene) រីចយស៍ (Rejoice) សាន់ស៊ីលឃ៍ (Sun Silk) ឃ្លឿរ (Clear) និង ឡៃបយ (Lifebuoy)។ ក្រៅពីនេះ ក៏មានផលិតផលមួយចំនួនទៀតដែលជាផលិតផលអាល្លឺម៉ង់ ជប៉ុន និងកូរ៉េ។
សម្តេចក្រឡាហោម ស ខេង បានមានប្រសាសន៍ថា ការកំទេចចោលនេះ គឺជាការកំទេចចោលនៅផលិតផលក្លែងក្លាយក្នុងចំនួនដ៏ច្រើនសន្ធឹកសន្ធាប់ ដែលមិនធ្លាប់មានក្នុងប្រវត្តិសាស្ត្រ នៃការមប្រយុទ្ធផលិតផលក្លែងក្លាយនៅកម្ពុជា។ បើសិនជាសមត្ថកិច្ចមិនដែលធ្វើការបង្ក្រាប និងរឹបអូសផលិតផលទាំងនេះ បានទាន់ពេលវេលាទេនោះ ផលិតទាំងនេះ នឹងត្រូវបានធ្វើចរាចរណ៍លក់ចែកចាយលើទីផ្សារក្នុងព្រះរាជាណាចក្រកម្ពុជា គឺប្រជាពលរដ្ឋ មិនត្រឹមតែខាតបង់ថវិកាផ្ទាល់ខ្លួនប៉ុណ្ណោះទេ ថែមទាំងទទួលរងផលប៉ះពាល់ដល់សុខភាព ហើយមួយករណីមួយចំនួនរហូតបណ្តាឲ្យគ្រោះថ្នាក់ដល់អាយុជីវិតថែមទៀតផង។
សម្តេចក្រឡាហោម បានបន្តថា ការកំទេចផលិតផលក្លែងក្លាយបានធ្វើឡើងដោយមានទឡ្ហីករណ៍ត្រឹមត្រូវ ទាំងលើទិដ្ឋភាពច្បាប់ និងទិដ្ឋភាពបច្ចេកទេស ដោយហេតុថា មន្ទីរពិសោធន៍ថ្នាក់ជាតិ និងអន្តរជាតិ បានផ្តល់នៅលទ្ធផលអវិជ្ជមានពាក់ព័ន្ធទៅលើគុណភាព និងសុវត្ថិភាព នៃទំនិញទាំងនេះ ហើយតុលាការក៏បានសម្រេចបញ្ជាឲ្យធ្វើការកំទេចចោល ដោយផ្អែកលើសុភវិនិច្ឆ័យយ៉ាងត្រឹមត្រូវពិតប្រាកដ។
បើសិនជាមិនបានធ្វើកោសល្យវិច័យ គ្រាន់តែសង្ស័យថា ក្លែងក្លាយ ប្រហែលជាមិនអាចធ្វើទៅបានទេ ម្ចាស់ទំនិញពិតជាគេប្តឹង តាមផ្លូវច្បាប់ ហេតុនេះចាំបាច់ត្រូវធ្វើការបញ្ជាក់យ៉ាងច្បាស់ពីក្រសួងសមត្ថកិច្ចពាក់ព័ន្ធ ពិសេសពីអ្នកបច្ចេកទេសធ្វើកោសល្យវិច័យជាក់លាក់ទើបយើងអាចយកមកកំទេចចោលបាន ហើយជាពិសេសការសម្រេចចិត្តពីតុលាការ៕ ដោយៈ មុនីរាជ
