ខេត្តព្រះសីហនុ ៖ មន្ត្រីរដ្ឋបាលសាលាខេត្តព្រះសីហនុ បានឱ្យដឹងថា កាលពីព្រឹកថ្ងៃទី១៩ ខែមិថុនា ឆ្នាំ២០១៩នេះ ភូមិសាស្ត្រកោះរ៉ុង ត្រូវបានបង្កើតទៅជារដ្ឋបាលក្រុងកោះរ៉ុងជាផ្លូវការហើយ ហើយចំណុះឱ្យរដ្ឋបាលខេត្តព្រះសីហនុ។
មន្ត្រីបញ្ជាក់ថា ពីមុនកោះរ៉ុង គឺស្ថិតនៅជារដ្ឋបាលថ្នាក់សង្កាត់កោះរ៉ុង ដែលចំណុះឱ្យរដ្ឋបាលក្រុងព្រះសីហនុ។
មន្ត្រីរដ្ឋបាលខេត្តព្រះសីហនុ ឱ្យដឹងដូច្នេះ រួបបញ្ជាក់ថា ការបង្កើតរដ្ឋបាលក្រុងកោះរ៉ុងនេះឡើង គឺស្របតាមស្ថានភាពភូមិសាស្ត្រ និងការវិវត្តន៍រីកចម្រើន របស់ខេត្តព្រះសីហនុ និងជាពិសេសស្របតាមគោលនយោបាយ របស់រាជរដ្ឋាភិបាល នៃព្រះរាជាណាចក្រកម្ពុជា។
ពិធីប្រកាសរដ្ឋបាលក្រុងកោះរ៉ុង បានរៀបចំឡើង កាលពីព្រឹកថ្ងៃទី១៩ ខែមិថុនា ឆ្នាំ២០១៩នេះ។ ហើយ លោក យន្ត មីន អភិបាលខេត្តព្រះសីហនុ បានអញ្ជើញជាអធិបតីក្នុងពិធីប្រកាសដាក់ឱ្យដំណើរការរដ្ឋបាលក្រុងកោះរ៉ុង ជាមួយការប្រកាសតែងតាំងអភិបាល -អភិបាលរងក្រុងកោះរ៉ុង និងប្រកាសទទួលស្គាល់ក្រុមប្រឹក្សាក្រុងកោះរ៉ុងថែមទៀតផង។
សូមបញ្ជាក់ថា លោក នួន ប៊ុនថុល អតីតនាយកទីចាត់ការអន្តរវិស័យសាលាខេត្តព្រះសីហនុ ត្រូវបានតែងតាំងជាអភិបាលក្រុងកោះរ៉ុង និងលោកអួង និត អតីតចៅសង្កាត់កោះរ៉ុង ត្រូវបានប្រកាសជាប្រធានក្រុមប្រឹក្សាក្រុងកោះរ៉ុង។
មន្ត្រីរដ្ឋបាលសាលាខេត្តព្រះសីហនុ បានឱ្យដឹងថា ក្រុងកោះរ៉ុង មាន ២សង្កាត់ គឺសង្កាត់កោះរ៉ុង និងសង្កាត់កោះរ៉ុងសន្លឹម៕ ដែន សីមា
