ខេត្តកំពង់ឆ្នាំង៖ មន្ត្រីកងរាជអាវុធហត្ថខេត្តកំពង់ឆ្នាំង បានឱ្យដឹងនៅរសៀលថ្ងៃទី១៩ ខែមិថុនា ឆ្នាំ២០១៩នេះថា កម្លាំងកងរាជអាវុធហត្ថ បានចាប់ខ្លួន លោក ងិន វាសនា ជានាយកផ្សាយព័ត៌មានគេហទំព័រក្រាំងមាស និងសហការីម្នាក់ទៀត បន្ទាប់ពីជនសង្ស័យទាំងពីរនាក់នេះ បានជំរិតទារប្រាក់ចំនួន ២៨០០ដុល្លារសហរដ្ឋអាមេរិកពី លោកឧកញ៉ា ទៀ វិចិត្រ ជាថ្នូរនឹងការបិទ ឬលុបព័ត៌មាន ដែលគេហទំព័រមួយនេះបានចុះផ្សាយ។
មន្ត្រីកងរាជអាវុធហត្ថខេត្តកំពង់ឆ្នាំង បន្ថែមថា កន្លងមកនេះ គេហទំព័រក្រាំងមាស បានចុះផ្សាយព័ត៌មានចោទប្រកាន់ លោកឧកញ៉ា ទៀ វិចិត្រ ថាបាននាំប្រេងគេចពន្ធចូលមកខេត្តព្រះសីហនុ ដោតខុសច្បាប់។
មន្ត្រីដដដែលបន្តថា បច្ចុប្បន្ននេះ លោក ងិន វាសនា និងសហការីម្នាក់ ទៀត បំរើការងារឱ្យគេហទំព័រក្រាំងមាស ត្រូវមន្ត្រីកងរាជអាវុធហត្ថខេត្ត កសាងសំណុំរឿងបញ្ជូនទៅសាលាដំបូងខេត្តកំពង់ឆ្នាំង នៅល្ងាចថ្ងៃទី១៩ ខែមិថុនានេះ ដើម្បីបន្តនីតិវិធីច្បាប់។
មន្ត្រីកងរាជអាវុធហត្ថខេត្តកំពង់ឆ្នាំង បានឱ្យដឹងថា នាយកការផ្សាយគេហទំព័រ ក្រាំងមាស លោក ងិន វាសនា និងសហការី ត្រូវបានកម្លាំង កងរាជអាវុធហត្ថឃាត់ខ្លួន នៅវេលាម៉ោងប្រមាណជិត ១០ព្រឹកថ្ងៃទី១៩ ខែមិថុនា ឆ្នាំ២០១៩ នៅក្នុងហាងកាហ្វេមួយកន្លែង មានទីតាំងនៅជិតស្នងការដ្ឋាននគរបាលខេត្ត កំពង់ឆ្នាំងចាស់ ស្ថិតនៅក្នុងភូមិកណ្តាល សង្កាត់កំពង់ឆ្នាំង ក្រុងកំពង់ឆ្នាំង ដោយចោទប្រកាន់ជនសង្ស័យទាំងពីរនាក់ ពីបទបរិហារកេរ្តិ៍ និងកំហែងយកប្រាក់។
បញ្ហានេះ លោក លឹម ហាក់ កម្លាំងកងរាជអាវុធហត្ថខេត្តកំពង់ឆ្នាំង ទទួលស្គាល់ថា កម្លាំងកងរាជអាវុធហត្ថខេត្តនេះ ពិតជាបានឃាត់ខ្លួន លោក ងិន វាសនា នាយកការផ្សាយគេហទំព័រក្រាំងមាស និងសហការីម្នាក់ពិតមែន ដោយជនសង្ស័យទាំងពីរនាក់ខាងលើ ជាប់ចោទពីបទបរិហារកេរ្តិ៍ និងកំហែងយកប្រាក់ តាមពាក្យបណ្ដឹង មេធាវី របស់លោកឧកញ៉ា ទៀ វិចិត្រ ប្តឹងចោទ។
សមត្ថកិច្ចកងរាជអាវុធហត្ថខេត្តកំពង់ឆ្នាំង បញ្ជាក់ថា ការចាប់ខ្លួន លោក ងិន វាសនា រួមជាមួយសហការីម្នាក់ទៀត ឈ្មោះ ទូច ឌីន អាយុអាយុ ៥១ឆ្នាំ គឺបានកើតឡើងបន្ទាប់ពី លោក ងិន វាសនា បានសរសេរអត្ថបទចុះផ្សាយចោទប្រកាន់ លោកឧកញ៉ា ទៀ វិចិត្រ ថាបាននាំប្រេង គេចពន្ធចូលមកខេត្តព្រះសីហនុ។
ចំការចុះផ្សាយបរិហាកេរ្តិ៍ លោកឧកញ៉ា ទៀ វិចិត្រ នេះដែរ កន្លងមក មេធាវី របស់លោកឧកញ៉ា ទៀ វិចិត្រ ក៏បានស្នើឱ្យ លោក ងិន វាសនា ចុះផ្សាយបកស្រាយបំភ្លឺឡើងវិញ ជុំវិញអត្ថបទបរិហាកេរ្តិ៍នេះ ប៉ុន្តែខាងគេហទំព័រក្រាំងមាស មិនបានចុះផ្សាយបំភ្លឺ ឬបកស្រាយឡើងវិញជូន លោកឧកញ៉ា ទៀ វិចិត្រ នោះទេ ទើបសមត្ថកិច្ចកងរាជអាវុធហត្ថខេត្តកំពង់ឆ្នាំង បានឃាត់ខ្លួនជនសង្ស័យទាំងពីរនាក់ខាងលើ តាមពាក្យបណ្ដឹង របស់មេធាវីលោកឧកញ៉ា ទៀ វិចិត្រ ដើម្បីកសាងសំណុំរឿងបញ្ជូនជនសង្ស័យទៅកាន់សាលាដំបូងខេត្តកំពង់ឆ្នាំង ដើម្បីបន្តនីតិវិធីច្បាប់៕ ដែន សីមា
