កិច្ចសន្ទនាលើកទី៣ រវាងអគ្គនាយកដ្ឋានគយនិងរដ្ឋាករគយកម្ពុជា (អគរ) និងសមាគមធុរកិច្ចជប៉ុនប្រចាំនៅកម្ពុជា (JBAC) ក្នុងគោលបំណងបន្តពិនិត្យដោះស្រាយនូវបញ្ហានិងសំណូមពរមួយចំនួនរបស់វិស័យឯកជនពាក់ព័ន្ធនឹងការអនុវត្តនីតិវិធីគយ។ កិច្ចសន្ទនានេះបានប្រព្រឹត្តទៅក្រោមអធិបតីភាព លោកគុណ ញឹម ប្រតិភូរាជរដ្ឋាភិបាលទទួលបន្ទុកជាអគ្គនាយកនៃ អគរ និងមានការចូលរួមដោយតំណាង JBAC ស្ថានទូតជប៉ុនប្រចាំនៅកម្ពុជា ភ្នាក់ងារសហប្រតិបត្តិការអន្តរជាតិជប៉ុន (JICA) ស្ថាប័នធុរកិច្ចជប៉ុននៅក្រៅប្រទេស (JETRO) និងមន្ត្រីគយនិងរដ្ឋាករមួយចំនួនផងដែរ នៅថ្ងៃទី១៩ ខែមិថុនា ឆ្នាំ២០១៩ នៅសណ្ឋាគារឡឺរ៉ូយ៉ាល។
ថ្លែងក្នុងពិធីបើកកិច្ចសន្ទនា លោក ណូរីម៉ាសា យ៉ាម៉ាហ្សាគី ប្រធាន JBAC បានថ្លែងអំណរគុណដល់អគ្គនាយកដ្ឋានគយនិងរដ្ឋាករគយកម្ពុជា ដែលបានសហការរៀបចំកិច្ចសន្ទនានេះឡើង និងបានធ្វើការកត់សម្គាល់ពីវិធានការកែលម្អនានាដែល អគរ បានដាក់ចេញ។ ទន្ទឹមនេះលោក គុណ ញឹម បានលើកឡើងនូវវិធានការមុតស្រួចដែលដាក់ចេញនាពេលថ្មីៗនេះ ដោយរាជរដ្ឋាភិបាលកម្ពុជា ដែលក្នុងនោះមានក៏មានវិធានការមួយចំនួនពាក់ព័ន្ធនឹងគយផងដែរ។ លើសពីនេះទៀត លោកក៏បានគូសបញ្ជាក់នូវកម្មវិធីកំណែទម្រង់និងទំនើបកម្មរបស់រដ្ឋបាលគយកម្ពុជា ដែលសម្រេចបាននូវសមិទ្ធផលគួរឲ្យកត់សម្គាល់ រួមមាន សន្ទុះកើនឡើងនៃការប្រមូលចំណូល, ការងារបង្ការនិងបង្ក្រាបបទល្មើស, អភិបាលកិច្ចក្នុងអង្គភាពគយ និងកិច្ចសម្រួលពាណិជ្ជកម្មតាមរយៈការធ្វើស្វ័យប្រវត្តិកម្មនិងសាមញ្ញកម្មនីតិវិធីគយ ផងដែរ។ លោកក៏បានលើកឡើងពីភាពចាំបាច់នៃការពង្រឹងកិច្ចសហការឱ្យបានកាន់តែជិតស្និទ្ធថែមទៀត រវាងរដ្ឋបាលគយនិងវិស័យឯកជនដើម្បីលើកកម្ពស់បរិយាកាសធុរកិច្ចនៅកម្ពុជា តាមរយៈការកែសម្រួលនីតិវិធីនានាដើម្បីឆ្លើយតបនឹងតម្រូវការរបស់វិស័យឯកជន។
នាឱកាសនេះ អង្គប្រជុំបានតាមដាននូវវឌ្ឍនភាពការងារពាក់ព័ន្ធនឹងដំណើរការអភិវឌ្ឍ និងការត្រៀមអនុវត្តប្រព័ន្ធបញ្ជរតែមួយជាតិដំណាក់កាលទី២ និងប្រព័ន្ធបញ្ជរតែមួយអាស៊ាន ដែលគ្រោងនឹងចាប់ផ្តើមអនុវត្តនាដើមខែកក្កដា ឆ្នាំ២០១៩ ខាងមុខនេះ និងកិច្ចសហការរវាង អគរ និងកាំកុងត្រូល។ ទន្ទឹមនេះ អង្គប្រជុំក៏បានស្តាប់ពីវឌ្ឍនភាពថ្មីៗពាក់ព័ន្ធវិធានការកំណែទម្រង់សំខាន់ៗមួយចំនួនដែល អគរ បានដាក់ចេញ ស្របតាមកម្មវិធីកំណែទម្រង់មុតស្រួចរបស់រាជរដ្ឋាភិបាលកម្ពុជា ដែលក្នុងនោះរួមមាន ការកែសម្រួលនីតិវិធីគយ, ការកាត់បន្ថយការត្រួតពិនិត្យដោយម៉ាស៊ីនស្កែន, ការលើកទឹកចិត្តបន្ថែមទៀតដល់ក្រុមហ៊ុនដែលមានអនុលោមភាពខ្ពស់, ការអនុវត្តការលើកទឹកចិត្តផ្នែកគយដល់សហគ្រាសធុនតូចនិងមធ្យម និងការរៀបចំសិក្សារយៈពេលបញ្ចេញទំនិញពីគយ។
បន្ទាប់មក កិច្ចសន្ទនាបានដំណើរការពិភាក្សា និងដោះស្រាយលើសំណូមពរ និងបញ្ហាដែលបានលើកឡើងដោយ JBAC ចំនួន ០៩ ចំណុច ពាក់ព័ន្ធនឹងការកាត់បន្ថយឯកសារក្នុងទម្រង់ក្រដាស, ការកែលម្អមុខងារគេហទំព័រគយ, ការគ្រប់គ្រងជើងសាគយ, ការធ្វើសាមញ្ញកម្មនីតិវិធីគយ, និងការអនុវត្តនីតិវិធីពិសេសសម្រាប់ក្រុមហ៊ុននៅតំបន់សេដ្ឋកិច្ចពិសេស ជាដើម។ ក្នុងចំណោមសំណូមពរ និងបញ្ហាទាំង ៩ សំណូមពរនិងបញ្ហាចំនួន ៧ ត្រូវបានដោះស្រាយរួច, សំណូមពរចំនួន ០១ ត្រូវបន្តពិនិត្យលើទិដ្ឋភាពបច្ចេកទេសនិងគតិយុត្តិបន្ថែមទៀតមុននឹងសម្រេច, និងសំណូមពរ ០១ ទៀត នឹងត្រូវស្នើបន្តដោះស្រាយក្នុងកម្រិតអន្តរស្ថាប័ន។
ជាមួយគ្នានេះ តំណាង JICA ក៏បានជម្រាបអង្គប្រជុំពីគម្រោងជំនួយសំខាន់ៗរបស់ខ្លួននាពេលបច្ចុប្បន្ន ដល់រាជរដ្ឋាភិបាលកម្ពុជា ចំនួន ៣ គឺ ១. គម្រោងមេលើការកែលម្អប្រព័ន្ធភស្តុភាកម្ម ២. ការសិក្សាដើម្បីកាត់បន្ថយការកកស្ទះចរាចរទំនិញនិងអ្នកដំណើរនៅកំណាត់ផ្លូវជាតិលេខ ១ តំបន់មាត់ច្រកបាវិត-ម៉ុកបៃ និង ៣. ការអនុវត្តសាកល្បងប្រព័ន្ធកាមេរ៉ាតាមដានសកម្មភាពនៅតាមកំពង់ផែ និងច្រកទ្វារព្រំដែនសំខាន់ៗ។
នៅទីបញ្ចប់ អង្គប្រជុំបានវាយតម្លៃខ្ពស់នូវលទ្ធផលកិច្ចសន្ទនាលើកទី៣ នេះ និងបានកត់សម្គាល់ថា យន្តការកិច្ចសន្ទនានេះត្រូវបានប្រើប្រាស់ជាគម្រូសម្រាប់កិច្ចសន្ទនារវាង JBAC ជាមួយស្ថាប័នរដ្ឋាភិបាលផ្សេងទៀត ផងដែរ។ តំណាង JICA, JBAC, JETRO និង អគរ ក៏បានប្តេជ្ញាចិត្តថា នឹងបន្តពង្រឹងកិច្ចសហការជាមួយគ្នាឱ្យកាន់តែជិតស្និទ្ធថែមទៀត ក្នុងគោលដៅសម្រួលពាណិជ្ជកម្ម និងការកែលម្អបរិយាកាសធុរកិច្ច ក៏ដូចជាការអភិវឌ្ឍន៍សេដ្ឋកិច្ចកម្ពុជាឱ្យកាន់តែរឹងមាំ៕ ដោយ៖កូឡាប
