ភ្នំពេញ ៖ លោកនាយឧត្តមសេនីយ៍ សន្ដិបណ្ឌិត នេត សាវឿន អគ្គស្នងការនគរបាលជាតិ និងជាប្រធានលេខាធិការដ្ឋាន នៃយុទ្ធនាការប្រយុទ្ធប្រឆាំងគ្រឿងញៀន លើកទី ៤ តំណាងសម្ដេចក្រឡាហោម ស ខេង ឧបនាយករដ្ឋមន្ដ្រី រដ្ឋមន្ដ្រី ក្រសួងមហាផ្ទៃ នៅព្រឹក ថ្ងៃទី ២០ ខែមិថុនា ឆ្នាំ ២០១៩នេះ បានដឹកនាំកិច្ចប្រជុំដកពិសោធន៍ និងពង្រឹងកិច្ចប្រតិបត្តិការបង្ក្រាបបទល្មើសគ្រឿងញៀន នៅតាមក្លឹបកំសាន្ត និងកន្លែងសប្បាយដ្ឋាន ដែលមានការជួញដូរ និងប្រើប្រាស់គ្រឿងញៀន ។
កិច្ចប្រជុំដែលធ្វើឡើងនៅទីស្ដីការក្រសួងមហាផ្ទៃ ក៏មានការចូលរួមពីអភិបាលរាជធានី-ខេត្ត ស្នងការ រាជធានី-ខេត្ត មេបញ្ជាការ កងរាជអាវុធហត្ថ រាជធានី-ខេត្ត និងមន្ត្រីពាក់ព័ន្ធជាច្រើនរូបទៀត ។
គួរជម្រាបថា គេង្កេតឃើញថា មួយរយៈ ពេលចុងក្រោយនេះ កម្លាំងសមត្ថកិច្ចបានបង្ក្រាបករណីចែកចាយ និងប្រើប្រាស់គ្រឿងញៀននៅបណ្ដាក្លឹបកម្សាន្ដ និងខារ៉ាអូខេធំជាបន្ដបន្ទាប់ ទាំងនៅរាជធានី ភ្នំពេញ និងតាមខេត្តមួយចំនួន ហើយក្នុង ប្រតិបត្តិការនេះ សមត្ថកិច្ចក៏បានដកហូតគ្រឿងញៀន ជាច្រើន ព្រមទាំង ឃាត់ខ្លួន អ្នកពាក់ព័ន្ធជាបន្ដបន្ទាប់ផងដែរ ។
នាយឧត្តមសេនីយ៍សន្តិបណ្ឌិត នេត សាវឿន បានបញ្ជាក់ក្នុងរបាយការណ៍ថា រយៈពេល ០៥ ខែ ដើមឆ្នាំ ២០១៩នេះ កងកម្លាំង អនុវត្តច្បាប់បានធ្វើការបង្ក្រាបបទល្មើសគ្រឿងញៀនសរុបចំនួន ៣៣៣៥ករណី ឃាត់ខ្លួន ៧០៩៧នាក់ ចាប់យកសារធាតុញៀនគ្រប់ប្រភេទ សរុប ៣១០.៩៨ គីឡូក្រាម កញ្ញា ស្រស់ ៤៧.១០៣ដើម រួមនឹងមធ្យោបាយសម្ភារៈវត្ថុតាងមួយចំនួនទៀត ។
ដោយឡែកលទ្ធផលបង្ក្រាបតាមគោលដៅក្លឹបកំសាន្ត និងទីតាំងសប្បាយដ្ឋាន ផ្អែកតាមរបាយការណ៍ ដែលទទួលបានពីលេខាធិការដ្ឋាន នៃគណៈបញ្ជាការអនុវត្តផែនការយុទ្ធនាការ ប្រយុទ្ធប្រឆាំងគ្រឿងញៀន លើកទី ៤ រាជធានី ខេត្តបានឲ្យដឹងថា ក្នុងចំណោមគោលដៅអាជីវកម្មក្លឹបកំសាន្ត ទីតាំងសប្បាយដ្ឋាន ចំនួន ៧,១១៣ ទីតាំង ត្រូវបាន សមត្ថកិច្ច ចុះ ផ្សព្វផ្សាយ អប់រំ ធ្វើ កិច្ចសន្យា ដើម្បី ស្នើសុំ កិច្ចសហការ ក្នុងការ បង្ការ ទប់ស្កាត់ ការជួញដូរ និង ប្រើប្រាស់ គ្រឿងញៀន បាន ចំនួន ៣៧៤១ កន្លែង ស្មើនឹង ៥២ភាគរយ៕ ដោយ៖កូឡាប
