ប្រទេសកូរ៉េខាងត្បូងគ្រោងបញ្ជូនអង្ករចំនួន ៥០.០០០តោនទៅអោយប្រទេសកូរ៉េខាងជើង ដែលកំពុងរងផលប៉ះពាល់យ៉ាងខ្លាំងដោយសារបញ្ហាគ្រោះរាំងស្ងួត។ វាគឺជាអំណោយម្ហូបលើកដំបូងរបស់កូរ៉េខាងត្បូងអោយកូរ៉េខាងជើង ក្នុងរយៈពេលមួយទសវត្សន៍ចុងក្រោយនេះ។
គ្រោះរាំងស្ងួតកំពុងញាំញីកូរ៉េខាងជើង ហើយប្រទេសកុម្មុយនីស្តដ៏ឯកោរមួយនេះកំពុងមានបញ្ហាខ្វះខាតចំណីអាហារយ៉ាងខ្លាំង។
ក្រសួងបង្រួបបង្រួមជាតិកូរ៉េខាងត្បូង បានថ្លែងថា អំណោយអង្ករនឹងត្រូវបញ្ជូនទៅកាន់កូរ៉េខាងជើងឲ្យលឿនតាមតែអាចធ្វើបាន។
កម្មវិធីចំណីអាហារពិភពលោក របស់អង្គការសហប្រជាជាតិនឹងធ្វើការគ្រប់គ្រង លើការពិនិត្យការផ្តល់អង្កររបស់កូរ៉េខាងត្បូងនោះ។
កាលពីខែមុន របាយការណ៍របស់អង្គការសហប្រជាជាតិបានថ្លែងថា មនុស្សចំនួន ១០លាននាក់នៅកូរ៉េខាងជើងកំពុងត្រូវការជំនួយម្ហូបអាហារជាបន្ទាន់។
សូមបញ្ជាក់ថាកាលពីឆ្នាំ ២០១០ ប្រទេសកូរ៉េខាងត្បូង បានផ្តល់ជំនួយជាអង្ករចំនួន ៥ពាន់តោន៕
អត្ថបទប្រែសម្រួលដោយ៖ សុភ័ក្រ
ប្រភព៖ BBC
