ប្រទេសឥណ្ឌានឹងដណ្តើមដំណែងរបស់ចិន ជាប្រទេសដែលមានប្រជាជនច្រើនបំផុតក្នុងលោក ក្នុងរយៈពេលជិតមួយទសវត្សរ៍ទៀត។ នេះបើតាមការព្យាករណ៍របស់របាយការណ៍ថ្មីរបស់អង្គការសហប្រជាជាតិ។
បច្ចុប្បន្ន ចិនមានប្រជាជនសរុបចំនួន ១,៣ពាន់លាននាក់ ចំណែកឥណ្ឌាមាន ១,១ពាន់លាននាក់។ ប្រទេសទាំងពីរនេះ មានប្រជាជនសរុបស្មើ ៣៧ភាគរយ នៃចំនួនប្រជាជនសរុបលើពិភពលោក ដែលមាន ៧,៧ពាន់លាននាក់។
របាយការណ៍របស់អង្គការសហប្រជាជាតិព្យាករថា នៅមុនឆ្នាំ ២០២៧ ប្រទេសឥណ្ឌានឹងមានប្រជាជនច្រើនជាងចិន ហើយនៅឆ្នាំ ២០៥០ គម្លាតនោះនឹងកើនឡើងកាន់តែខ្លាំង។
របាយការណ៍ក៏បានបញ្ជាក់ថា ប្រទេសមួយចំនួនក៏នឹងមានចំនួនប្រជាជនធ្លាក់ចុះផងដែរ។
“ចន្លោះឆ្នាំ ២០១៩ និង ២០៥០ ប្រទេស ឬតំបន់ចំនួន ៥៥នឹងមានចំនួនប្រជាជនធ្លាក់ចុះយ៉ាងតិចណាស់ចំនួន ១ភាគរយ ដោយសារតែការគិតពីរឿងការបន្តពូជទាប ហើយក្នុងករណីខ្លះ ដោយសារតែធ្វើអន្តោប្រវេសន៍ទៅកន្លែងផ្សេង”។ នេះបើតាមការព្យាកររបស់របាយការណ៍។
របាយការណ៍ថា ប្រជាជនចិននឹងធ្លាក់ចុះចំនួន ៣១,៤លាននាក់ ឬ ២,២ភាគរយ។ ដោយសារបញ្ហាខាងលើ ប្រជាជនចិនអាចនឹងធ្លាក់ចុះមកត្រឹម ១,១ពាន់លាននាក់តិចជាងឥណ្ឌា ដែលរំពឹងថានឹងកើនឡើងដល់ ១,៥ពាន់លាននាក់។
នៅឆ្នាំ ២០៥០ ចំនួនប្រជាជននៅលើពិភពលោកអាចនឹងកើនដល់ ៩,៧ពាន់លាននាក់។
សូមបញ្ជាក់ថា ៥ឆ្នាំក្រោយពេលការបង្កើតអង្គការសហប្រជាជាតិក្នុងឆ្នាំ ១៩៥០ ប្រជាជនសរុបនៅលើពិភពលោកមានត្រឹមតែ ២,៦ពាន់លាននាក់ប៉ុណ្ណោះ៕
អត្ថបទប្រែសម្រួលដោយ៖ សុភ័ក្រ
ប្រភព៖ CNN
