លោកហ៊ុន ម៉ានី ប្រធានគណៈកម្មការអប់រំ យុវជន កីឡា ធម្មការ កិច្ចការសាសនា វប្បធម៌ និងទេសចរណ៍នៃរដ្ឋសភា បានដឹកនាំគណប្រតិភូ គណៈកម្មការ ចុះបំពេញបេសកកម្មនៅខេត្តកំពង់ធំ ដើម្បីសិក្សាឈ្វេងយល់ពីវិស័យការងារ ដែលស្ថិតនៅក្រោមសមត្ថកិច្ចទទួលខុសត្រូវរបស់ គណៈកម្មការទី៧នេះ កាលពីព្រឹកថ្ងៃទី១៩ ខែមិថុនា ឆ្នាំ២០១៩។
នៅក្នុងកិច្ចប្រជុំជាមួយ លោកសុខ លូ អភិបាលនៃគណៈអភិបាលខេត្តកំពង់ធំ ក៏ដូចជាលោក លោកស្រី ជាប្រធានមន្ទីរជំនាញទាំងបួននៃខេត្តនេះ ឯកឧត្តម ហ៊ុន ម៉ានី បានជំរុញ និងសំណូមពរឲ្យអាជ្ញាធរ ក៏ដូចជាមន្ទីរជំនាញពាក់ព័ន្ធខិតខំពង្រឹងការងាររបស់ខ្លួន ឲ្យមានភាពល្អប្រសើរឡើងបន្ថែម ទៀត ដើម្បីឆ្លើយតបសេចក្ដីត្រូវការរបស់ប្រជាពលរដ្ឋ។
លោកហ៊ុន ម៉ានី បានមានប្រសាសន៍ថា «ភាពច្បាស់លាស់នៃការវាយតម្លៃពីថ្នាក់ក្រោមជាតិទៅថ្នាក់ជាតិ គឺពិតជាមានសារៈសំខាន់។ ផ្អែកលើ គោលការណ៍ណែនាំរបស់ក្រសួង មន្ទីរត្រូវវាយតម្លៃស្ថានភាពក្នុងមូលដ្ឋានរបស់ខ្លួនផ្ទាល់ និងរាយការណ៍ទៅថ្នាក់ជាតិ ដើម្បីស្នើសុំការរៀបចំ និងគាំទ្រ នូវការដាក់ចេញនូវផែនការឲ្យចំគោលដៅ និងស្របតាមបរិបទក្នុងខេត្តផ្ទាល់។ ជាមួយគ្នានោះ ការអនុវត្តដែលនាំមកនូវលទ្ធផលជាក់ស្តែងជូនដល់ ប្រជាពលរដ្ឋ គឺទាមទារការសហការ និងពិភាក្សាគ្នា រវាងមន្ទីរ និងអាជ្ញាធរខេត្ត ដើម្បីរួមគ្នាធ្វើយ៉ាងណាបំពេញនូវតម្រូវការរបស់ប្រជាពលរដ្ឋ និងឆ្លើយ តបទៅនឹងបញ្ហានានាដែលជាកង្វល់របស់ប្រជាពលរដ្ឋ។»
លោកសុខ លូ អភិបាលនៃគណៈអភិបាលខេត្តកំពង់ធំ បានមានប្រសាសន៍ជម្រាបជូន ឯកឧត្តម ហ៊ុន ម៉ានី និងគណៈប្រតិភូគណៈកម្មការ នៃរដ្ឋសភា អំពីស្ថានភាពទូទៅជុំវិញខេត្ត ដោយឯកឧត្ដមបញ្ជាក់ថា ខេត្តកំពង់ធំជាខេត្តដែលនៅជាប់នឹងបឹងទន្លេសាប មានអំណោយផលពីធម្មជាតិ យ៉ាងខ្លាំងទៅលើវិស័យកសិកម្ម កសិ-ឧស្សាហកម្ម ទេសចរណ៍ នេសាទ និងសម្បូរធនធានធម្មជាតិផងដែរ។ កត្តាទាំងនេះហើយដែលធ្វើឲ្យមាន ក្រុមហ៊ុនវិនិយោគជាច្រើន បានមកបណ្ដាក់ទុនវិនិយោគលើវិស័យកសិកម្ម កសិ-ឧស្សាហកម្មនៅក្នុងខេត្តកំពង់ធំ និងបានជួយធ្វើឲ្យជីវភាពប្រជាពលរដ្ឋ មានភាពរីកចំរើនគួឲ្យកត់សំគាល់។
លោកអភិបាលខេត្តបានមានប្រសាសន៍បន្តថា ទាក់ទងនឹងវិស័យអប់រំនៅក្នុងខេត្តកំពង់ធំបច្ចុប្បន្ន មានគ្រឹះសា្ថនសិក្សាសាធារណៈសរុប៧៨២កន្លែង និងគ្រឹះស្ថានឯកជន២៦កន្លែង។ មតេយ្យសិក្សាសហគមន៍មានចំនួន១៨៧កន្លែង និងមជ្ឈមណ្ឌលសិក្សាសហគមន៍១៧កន្លែង។ ចំពោះលទ្ធផល ប្រឡងមធ្យមសិក្សាទុតិយភូមិនៅក្នុងឆ្នាំសិក្សា២០១៧-២០១៨កន្លងមក មានបេក្ខជនចូលរួមប្រឡងសរុប៤.៤៣៤នាក់។ ក្នុងនោះបេក្ខជនដែលបាន ប្រឡងជាប់មានចំនួន៣.៣០៥នាក់ ហើយសិស្សជាប់និទ្ទេស A ចំនួន១១នាក់ ស្រី០៦នាក់។
ជាមួយនឹងការជម្រាបជូនគណៈប្រតិភូរដ្ឋសភាពីសមិទ្ធផលការងារលើវិស័យផ្សេងៗទៀត មានដូចជាវិស័យវប្បធម៌ ធម្មការ និងទេសចរណ៍ជាដើមនោះ ឯកឧត្តម សុខ លូ ក៏បានលើកឡើងពីបញ្ហាប្រឈមមួយចំនួនដែលខេត្តបានជួបប្រទះ និងថាអាជ្ញាធរខេត្តក៏ដូចជាមន្ទីរជំនាញជុំវិញខេត្ត បានខិតខំ ប្រឹងប្រែងធ្វើការដោះស្រាយបានជាបន្តបន្ទាប់ ដើម្បីឆ្លើយតបឲ្យទាន់ពេលវេលាជូនបងប្អូនប្រជាពលរដ្ឋ។
លោកហ៊ុន ម៉ានី បានធ្វើការកោតសរសើរ និងវាយតំលៃខ្ពស់ចំពោះក៏ការខិតខំប្រឹងប្រែងបំពេញការងាររបស់អាជ្ញាធរខេត្ត ក៏ដូចមន្ទីរពាក់ព័ន្ធ ដោយលោកបានលើកទឹកចិត្តឲ្យរដ្ឋបាលខេត្តទាំងមូល រួមគ្នាខិតខំប្រឹងប្រែងបន្ត ដើម្បីសម្រេចបាននូវសមិទ្ធផលថ្មីៗ ជូនប្រជាពលរដ្ឋក្នុងខេត្ត តាមរយៈការដាក់គោលដៅសកម្មភាពជំរុញការអនុវត្តទ្វេដងលើអ្វីដែលសម្រេចបានកន្លងមក។
លោកប្រធានគណៈប្រតិភូបានមានប្រសាសន៍បញ្ជាក់ថា «តម្រូវការរបស់ប្រជាពលរដ្ឋកាន់តែវិវត្តគួរឲ្យកត់សម្គាល់។ ក្នុងទិដ្ឋភាពនេះ គឺទាមទារ អោយមានការឆ្លើយតប និងបំពេញសេចក្តីត្រូវការឲ្យបានទាន់ពេលវេលា និងប្រកបដោយប្រសិទ្ធភាពជាងមុន៕ ដោយ៖កូឡាប
