ខេត្តស្វាយរៀង ៖ ផ្ទះពលរដ្ឋមួយខ្នងត្រូវបានអគ្គីភ័យលេបត្របាក់ សល់តែ ផេះផង់កាលពីវេលាម៉ោង៦និង៥៥នាទីព្រឹក ថ្ងៃទី២០ ខែមិថុនា ឆ្នាំ២០១៩ ស្ថិតក្នុងភូមិស្វាយ សង្កាត់ចេក ក្រុងស្វាយរៀង ខេត្តស្វាយរៀង ដោយសង្ស័យថាមានគេលួចដុត ដោយសារសម្លេងផ្ទុះហ្គាសលន់លឺរំពងពេញភូមិ។
ប្រជាពលរដ្ឋដែលបានឃើញហេតុការណ៍នេះបានប្រាប់អោយដឹងថានៅមុនពេលកើតហេតុមានអណ្តាតភ្លើងចេញពីផ្ទះឈ្មោះគង់ សារឿន(ហៅសឿន)ភេទស្រី អាយុ៤៦ឆ្នាំ ហើយក៏មានសម្លេងផ្ទុះហ្គាសផូងផាំងឡើងកងរំពងពេញភូមិផ្អើលអស់អ្នកភូមិរត់មកចោមរោមមើល ប៉ុន្តែមិនអាចជួយបាន ព្រោះគ្មានទឹកបាញ់ពន្លត់ហើយក្នុងផ្ទះនេះមានធុងហ្គាសមួយដ៏ធំដោយខ្លាចផ្ទុះបានត្រឹមរាយការណ៍ទៅអាជ្ញាធរ ដើម្បីមកជួយពន្លត់។
ប្រភពបន្តទៀតថា ផ្ទះបានឆេះអស់ទាំំងស្រុងទៅហើយ ទើបឃើញរថយន្តពន្លត់អគ្គីភ័យមកដល់ដែលផ្ទះនេះសង់អំពីឈើប្រក់សង្ក័សីងាយនិងឆេះណាស់។ ហើយគ្រួសារនេះមានជីវភាពក្រីក្រខ្លាំងបានត្រឹមយំសោកស្តាយបោកខ្លួននូវការបាត់បង់ផ្ទះដែលបានខិតខំសន្សំលុយសាងសង់ផ្ទះមួយខ្នងឲ្យកូនៗបានរស់នៅ។
បើតាមម្ចាស់ផ្ទះឈ្មោះគង់ សារឿន បានអោយដឹងថា គ្រាន់តែគាត់និងប្តីចេញផុតពីផ្ទះ ដើម្បីប្រកបរបររកសុីដូចសព្វមួយដងបានប្រមាណ១៥នាទី ក៏មានគេប្រាប់ថា ផ្ទះត្រូវភ្លើងឆេះគាត់ក៏រត់មកផ្ទះវិញ ឃើញភ្លើងឆេះយ៉ាងសន្ធោសន្ធៅនិងមានសម្លេងផ្ទុះផូងផាំង។
ប្រភពខាងលើបានបញ្ជាក់ទៀតថា ករណីភ្លើងឆេះផ្ទះនេះសង្ស័យមានមនុស្សលួចដុត ព្រោះនៅមុនពេលកើតហេតុមានយុវជនម្នាក់ស្លៀកខោក្រហមដើរក្រឡឹងផ្ទះរបស់គាត់ ខណៈដែលគាត់(គង់ សារឿន) និងប្តីចេញពីផ្ទះ ដោយកូនៗបានប្រាប់ថា មានពូស្លៀកខោក្រហម និងដៃមានកាន់ដបសាំងមកគំរាមអោយបងប្រុស សងលុយទៅគាត់ ហើយបើមិនព្រមសងលុយទេ ពូនោះថានឹងដុតផ្ទះចោល។
ប្រភពបានបន្តទៀតថា ដោយមានការភ័យខ្លាចកូនៗរបស់គាត់បានរត់ចេញពីផ្ទះ ស្រាប់តែមួយសន្ទុះក្រោយមកភ្លើងបានឆាបឆេះផ្ទះរបស់គាត់តែម្តង។
ទាក់ទិននិងការឆេះផ្ទះនេះដែរ លោកអធិការនគរបាលក្រុងស្វាយរៀងបានប្រាប់ឲ្យដឹងថា ៖ ករណីឆេះផ្ទះពលរដ្ឋនៅភូមិស្វាយ សង្កាត់ចេកនេះ គឺសង្ស័យជំហានដំបូងបណ្តាលមកពីឆ្លងចរន្តអគ្គីសនី ហើយទំហំនៃការខូចខាតមិនទាន់ដឹងនៅឡើយទេសមត្ថកិច្ចកំពុងចុះទៅធ្វើរឿងហ្នឹងហើយដើម្បីស្រាវជ្រាវរកការពិត៕ ដោយ ៖ វ៉ៃកូ