ព្រះសីហនុ ៖ សមត្ថកិច្ចនគរបាលចរាចរណ៍ នៃស្នងការដ្ឋានខេត្តព្រះសីហនុ បានឲ្យដឹងព័ត៌មានបឋមថា មានគ្រោះថ្នាក់ចរាចរណ៍ រថយន្តក្រឡុកសុីម៉ង់ត៍មួយគ្រឿងពេលបើកចុះផ្លូវចំណោត ពីផ្លូវបំបែកសេតេ ចុះមកផ្លូវបំបែករ៉ា ស្ថិតក្នុងសង្កាត់លេខ៣ បានជ្រុលទៅបុកម៉ូតូមួយគ្រឿងរួចក៏ក្រឡាប់ ផ្ងារជើង នៅម៉ោងជិត១រសៀលថ្ងៃទី២០ ខែមិថុនា ឆ្នាំ២០១៩នេះ ។
សេចក្តីរាយការណ៍បឋមពីកន្លែងកើតហេតុ បានឲ្យដឹងថា គ្រោះថ្នាក់ចរាចរណ៍នេះ បណ្តាលឲ្យមានមនុស្ស២នាក់រងរបួសធ្ងន់។ ក្នុងនោះម្នាក់ជាអ្នកបើកបររថយន្តក្រឡុកសុីម៉ង់ត៍ និងម្នាក់ទៀតជាស្ត្រីខាងភាគីជិះម៉ូតូ។ ហើយភ្លាមៗ អ្នករងរបួសទាំងពីរនាក់ ត្រូវបាននាំទៅសង្គ្រោះនៅមន្ទីរពេទ្យក្រោយកើតហេតុ។
ភ្លាមៗនេះ សមត្ថកិច្ច នៅមិនទាន់ស្គាល់ឈ្មោះអ្នកបើកបររថយន្ត និងស្ត្រីអ្នកជិះម៉ូតូដែលរងរបួសដូចគ្នានៅឡើយទេ ហើយពេលនេះសមត្ថកិច្ច កំពុងរកដំណោះស្រាយតាមនីតិវិធី៕ ដែន សីមា