សៀមរាប ៖ ក្រោមកិច្ចសហការរវាងក្រសួងបរិស្ថានជាមួយអគ្គលេខាធិការដ្ឋានអាជ្ញាធរជាតិប្រយុទ្ធប្រឆាំងគ្រឿងញៀន អគ្គលេខាធិការដ្ឋានអាជ្ញាធរជាតិប្រយុទ្ធនឹងជំងឺអេដស៍សិក្ខាសាលាស្តីពីការទប់ស្កាត់ការរីករាលដាលមេរោគអេដស៍ ជំងឺអេដស៍ និងការប្រេីប្រាស់គ្រឿងញៀន ត្រូវបានរៀបចំឡេីងនៅមន្ទីរបរិស្ថានខេត្តសៀមរាប ក្រោមអធិបតីភាព លោក សាបូ អូហ្សាណូ រដ្ឋលេខាធិការក្រសួងបរិស្ថាន ដោយមានអញ្ជេីញចូលរួមពីឯកឧត្តម តែង គន្ធី អគ្គលេខាធិការអាជ្ញាធរជាតិប្រយុទ្ធប្រឆាំងគ្រឿងញៀន លោក លឹម តុងហួត ប្រធាននាយកដ្ឋាននីតិកម្ម អប់រំ និងស្តារនីតិសម្បទា និងមានការអញ្ជេីញចូលរួមពីតំណាងអង្គភាពជាសមាជិកគណកម្មាធិកាត្រួតពិនិត្យគ្រឿងញៀនខេត្តសៀមរាប ក្រុង ស្រុក មន្ទីរពាក់ព័ន្ធ ជុំវិញខេត្តសៀមរាប ឧទ្យានុរក្ស សរុបចំនួនជាង១០០នាក់នៅថ្ងៃទី២០ ខែមិថុនា ឆ្នាំ២០១៩។
លោកស៊ុន គង់ ប្រធានមន្ទីរបរិស្ថានខេត្តសៀមរាប បានមានប្រសាសន៍ស្វាគមន៍ និងថ្លែងអំណរគុណដល់ស្ថាប័នថ្នាក់ជាតិបានរៀបចំឲ្យមានកម្មវិធីផ្សព្វផ្សាយនេះឡេីង ដែលកម្មវិធីពិសេសនេះឆ្លើយបតបទៅនឹងស្ថានភាពបញ្ហាគ្រឿងញៀនបច្ចុប្បន្ន ។
លោកលឹម តុងហួត ប្រធាននាយកដ្ឋាននីតិកម្ម អប់រំ និងស្តារនីតិសម្បទា បានមានប្រសាសន៍ថ្លែងអំណរគុណដល់ក្រសួងបរិស្ថាន និងបានជម្រាបជូនពីស្ថានភាពទូទៅនៃគ្រឿងញៀន ហេីយការងារផ្សព្វផ្សាយអប់រំជាការងារអាទិភាព ដែលយេីងទាំងអស់ត្រូវបន្តយកចិត្តទុកដាក់ផ្ស្វព្វផ្សាយការយល់ដឹងពីបញ្ហាគ្រឿងញៀននេះដល់បុគ្គលិក មន្ត្រីរាជការ ឧទ្យានុរក្ស សម្រាប់បង្ការខ្លួនគាត់ក្រុមគ្រួសារគាត់កុំឲ្យធ្លាក់ចូលទៅក្នុងអន្ទាក់នៃគ្រឿងញៀន ការយល់ដឹងពីបញ្ហាគ្រឿងញៀន និងបញ្ហាជំងឺអេដស៍ មេរោគអដស៍ធ្វេីឲ្យសហគមន៍មានសុវត្ថិភាព ទន្ទឹមនឹងការកោតសរសេីរ បានស្នេីសុំឲ្យក្រសួងបរិស្ថាននិងអាជ្ញាធរមូលដ្ឋានបន្តយកចិត្តទុកដាក់លេីការងារផ្សព្វផ្សាយអប់រំនេះឲ្យបានជាប់ជាប្រចាំដូចភ្លៀងរលឹម ។
លោក តែង គន្ធី អគ្គលេខាធិការអាជ្ញាធរជាតិប្រយុទ្ធនឹងជំងឺអេដស៍ បានមានប្រសាសន៍ដោយថ្លែងអំណរគុណដល់ក្រសួងបរិស្ថាននិងបានប្រាប់ឲ្យដឹងខេត្តសៀមរាបគឺជាខេត្តគោលដៅងាយប្រឈមនឹងការរីករាលមេរោគអេដស៍ បញ្ហានិងការប្រឈមគឺការខ្វះចំណេះដឹងពីលទ្ធភាពចម្លង ការព្យាបាលមិនទាន់បានគ្រប់អ្នកដែលផ្ទុក មេរោគអដស៍នៅបន្តឆ្លង ការមាក់ងាយរេីសអេីងក្នុងសង្គម ឥរិយាបថនៃការប្រព្រឹត្ត ហេីយនៅខេត្តសៀមរាបមានអ្នកជំងឺអេដស៍ជាង៤៥០០នាក់ទទួលបានការព្យាបាល។
លោក សាបូ អូហ្សាណូរដ្ឋលេខាធិការបានមានប្រសាសន៍ថាក្រសួងបរិស្ថានជាសមាជិករបស់អាជ្ញាធរជាតិប្រយុទ្ធប្រឆាំងគ្រឿងញៀនបានយកចិត្តទុកដាក់ទទួលខុសត្រូវចូលរួមអនុវត្តនូវយុទ្ធសាស្ត្រពហុវិស័យ របស់អាជ្ញាធរជាតិប្រយុទ្ធប្រឆាំងគ្រឿងញៀន អាជ្ញាធរជាតិប្រយុទ្ធនឹងជំងឺអេដស៍ និងផែនការយុទ្ធនាការប្រយុទ្ធប្រឆាំងគ្រឿងញៀនខុសច្បាប់របស់រាជរដ្ឋាភិបាលបង្កេីតឲ្យមានគណកម្មការប្រយុទ្ធប្រឆាំងគ្រឿងញៀន និងគណកម្មការប្រយុទ្ធប្រឆាំងនឹងជំងឺអេដស៍ក្រសួងបរិស្ថាន ។
ក្ក្នុងឱកាសនោះដែរលោក សាបូ អូហ្សាណូ បានថ្លែងបន្តថា ក្រសួងបរិស្ថាននឹងបេីកយុទ្ធនាការផ្សព្វផ្សាយឲ្យបានទូលំទូលាយដេីម្បីបង្ការទប់ស្កាត់ការរីករាលដាលមេរោគអេដស៍ ជំងឺអេដស៍ និងការប្រេីប្រាស់គ្រឿងញៀនក្នុងវិស័យបរិស្ថានទូទាំង២៥រាជធានី ខេត្ត និងក្រុមគោលដៅដែលងាយប្រឈមមុខនិងបានផ្តាំផ្ញេីដល់អ្នកចូលរួមនិងអ្នកពាក់ព័ន្ធទាំងអស់ត្រូវយកចិត្តស្តាប់ស្វែងយល់យកចំណេះដឹងពីបញ្ហាគ្រឿងញៀន និងបញ្ហាមេរោគអេដស៍ ជំងឺអេដស៍ដេីម្បីជាប្រយោជន៍ផ្ទាល់ខ្លួន និងចូលរួមឲ្យបានកាន់តែសកម្មផ្សព្វផ្សាយបន្តទៅមនុស្សជាទីស្រឡាញ់កុំឲ្យជួបនូវបញ្ហាអកុសលគ្រឿងញៀន និងជំងឺអេដស៍៕ ដោយ ៖ កូឡាប