ភ្នំពេញ៖ គណៈកម្មការផែនការ វិនិយោគ កសិកម្ម អភិវឌ្ឍន៍ជនបទ បរិស្ថាន និងធនធានទឹក នៃរដ្ឋសភា សហការជាមួយគណៈកម្មការកិច្ចការបរទេស សហប្រតិបត្តិការអន្តរជាតិ ឃោសនាការ និងព័ត៌មាន នៃរដ្ឋសភា បានជួបប្រជុំផ្ទៃក្នុងអន្តរគណៈកម្មការ ដើម្បីពិនិត្យសិក្សា លើសេចក្តីព្រាងច្បាប់ ស្ដីពីការអនុម័តយល់ព្រមឱ្យព្រះរាជាណាចក្រកម្ពុជាចូលជាសមាជិកនៃកិច្ចព្រមព្រៀងស្តីពីវិធានការរដ្ឋជាម្ចាស់កំពង់ផែ ដើម្បីបង្ការទប់ស្កាត់ និងលុបបំបាត់ការនេសាទខុសច្បាប់ គ្មានរបាយការណ៍ និងគ្មានការអនុញ្ញាត នៅរសៀលថ្ងៃទី២០ ខែមិថុនា ឆ្នាំ២០១៩នេះ នៅវិមានរដ្ឋសភា។
លោកជា វ៉ាន់ដេត ប្រធានគណៈកម្មការផែនការ វិនិយោគ កសិកម្ម អភិវឌ្ឍន៍ជនបទ បរិស្ថាន និងធនធានទឹក នៃរដ្ឋសភា បានលើកឡើងថា កិច្ចព្រមព្រៀងស្តីពីវិធានការរដ្ឋជាម្ចាស់កំពង់ផែ ដើម្បីបង្ការទប់ស្កាត់ និងលុបបំបាត់ការនេសាទខុសច្បាប់ គ្មានរបាយការណ៍ និងគ្មានការអនុញ្ញាត ត្រូវបានអនុម័តដោយសន្និសីទអង្គការស្បៀង និងកសិកម្មនៃអង្គការសហប្រជាជាតិ កាលពីថ្ងៃទី២២ ខែវិច្ឆិកា ឆ្នាំ២០០៩ និងមានចែងក្នុងមាត្រាទី១៤ នៃធម្មនុញ្ញរបស់អង្គការស្បៀងនិងកសិកម្ម របស់អង្គការសហប្រជាជាតិ។ កិច្ចព្រមព្រៀងនេះបានចូលជាធរមាន នៅថ្ងៃទី៥ ខែមិថុនា ឆ្នាំ២០១៦ រយៈពេល ៣០ថ្ងៃ បន្ទាប់ពីថ្ងៃដាក់តម្កល់ឯកសារគតិយុត្តិទី២៥នៃការផ្តល់សច្ចាប័ន ការទទួលយក ការយល់ព្រមជាមួយនឹងការតម្កល់ឯកសារនៃកិច្ចព្រមព្រៀងនេះ។
លោកបន្តថា មកដល់ខែឧសភា ឆ្នាំ២០១៩ មានប្រទេសចំនួន៦០ រួមទាំងសហភាពអឺរ៉ុបបានចូលរួមជាភាគីអនុវត្តកិច្ចព្រមព្រៀងនេះ ក្នុងនោះប្រទេសនៅតំបន់អាស៊ីអាគ្នេយ៍មានចំនួន០៥ រួមមាន ប្រទេសមីយ៉ាន់ម៉ា ឥណ្ឌូណេស៊ី ហ្វីលីពីន ថៃ និងប្រទេសវៀតណាម។ កិច្ចព្រមព្រៀង ជាឯកសារគតិយុត្តិដ៏សំខាន់តែមួយគត់ដែលមានគោលបំណងប្រយុទ្ធប្រឆាំង និងលុបបំបាត់ការនេសាទខុសច្បាប់ គ្មានរបាយការណ៍ និងគ្មានការអនុញ្ញាត។ កិច្ចព្រមព្រៀងនេះមាន ១០ផ្នែក និង ៣៧មាត្រា។
ចំពោះ សេចក្តីព្រាងច្បាប់ ស្ដីពីការអនុម័តយល់ព្រមឱ្យព្រះរាជាណាចក្រកម្ពុជាចូលជាសមាជិកនៃកិច្ចព្រមព្រៀងស្តីពីវិធានការរដ្ឋជាម្ចាស់កំពង់ផែ ដើម្បីបង្ការទប់ស្កាត់ និងលុបបំបាត់ការនេសាទខុសច្បាប់ គ្មានរបាយការណ៍ និងគ្មានការអនុញ្ញាតគោលបំណងនៃកិច្ចព្រមព្រៀងនេះ គឺដើម្បីបង្ការ ទប់ស្កាត់ និងលុបបំបាត់ការនេសាទខុសច្បាប់ គ្មានរបាយការណ៍ និងគ្មានការអនុញ្ញាត វិញ មានបីមាត្រា។ បន្ទាប់ពីបានពិនិត្យសិក្សា តាមនីតិវិធីរួចហើយ គណៈកម្មការជំនាញរដ្ឋសភា បានសម្រេចថានឹងអញ្ជើញតំណាងរាជរដ្ឋាភិបាល មកពិភាក្សានិងពិនិត្យលើសេចក្តីព្រាងច្បាប់នេះ នៅថ្ងៃទី២៤ ខែមិថុនា ឆ្នាំ២០១៩នេះ មុនដាក់ជូនគណៈកម្មាធិការអចិន្ត្រៃយ៍រដ្ឋសភា សម្រេចបញ្ចូលក្នុងរបៀបវារៈសម័យប្រជុំរដ្ឋសភានាពេលខាងមុខ៕ ដោយ៖កូឡាប