មនុស្សយ៉ាងហោចណាស់ចំនួន ៤៤នាក់បានស្លាប់ នៅពេលរថយន្តក្រុងមួយគ្រឿងបានបើកធ្លាក់ជ្រោះនៅតំបន់ភ្នំនៃរដ្ឋ Himachal Pradesh នៅថ្ងៃព្រហស្បតិ៍ម្សិលមិញនេះ។
ក្នុងហេតុការណ៍ដ៏រន្ធត់នោះ ក៏បណ្តាលឲ្យមនុស្ស ២៨នាក់រងរបួសធ្ងន់ធ្ងរផងដែរ។ គ្រោះអកុសលនោះ កើតឡើងនៅពេលឡានក្រុងមួយគ្រឿង ដែលមានមនុស្សជិះយ៉ាងច្រើនបានបើករអិលធ្លាក់ផ្លូវ រួចក៏បានបោះពួយធ្លាក់ជ្រោះដែលមានជម្រៅ ១៥០ម៉ែត្រ នៅក្នុងតំបន់ Kullu។
ប៉ូលីសនៃតំបន់ខាងលើបានថ្លែងប្រាប់ AFP ថា ជនរងគ្រោះភាគច្រើនជាស្ត្រី និងកុមារ ដែលបានធ្វើដំណើរត្រឡប់ពីធ្វើការងារ និងសាលារបស់គេ។
រថយន្តនោះដឹកមនុស្សច្រើនជាង ៦០នាក់ ដែលមនុស្សមួយចំនួនជិះនៅលើដំបូល។
សូមបញ្ជាក់ថា គ្រោះថ្នាក់ចរាចរណ៍កើតមានយ៉ាងច្រើននៅក្នុងប្រទេសដែលមានប្រជាជនច្រើនលំដាប់ទី ២ក្នុងពិភពលោក។ ជារឿងរាល់ឆ្នាំ មនុស្សជាមធ្យមចំនួន ១៥០.០០០នាក់បានស្លាប់នៅក្នុងគ្រោះថ្នាក់ចរាចរណ៍៕
អត្ថបទប្រែសម្រួលដោយ៖ Channelnewsasia