ខេត្តព្រះសីហនុ៖ នារសៀលថ្ងៃទី២០ ខែមិថុនា ឆ្នាំ២០១៩នេះ លោក យន្ត មីន អភិបាល នៃគណៈអភិបាលខេត្តព្រះសីហនុ បានអញ្ជើញជាអធិបតី ក្នុងពិធីសម្ពោធដាក់ឱ្យដំណើរការច្រកចេញ-ចូលតែមួយ និងការិយាល័យប្រជាពលរដ្ឋ នៅស្រុកស្ទឹងហាវ ខេត្តព្រះសីហនុ។
ពិធីសម្ភោធនេះ មានការចូលរួមពីសំណាក់មន្ត្រីរាជការ កងកម្លាំងប្រដាប់អាវុធ សិស្សានុសិស្ស និងប្រជាពលរដ្ឋយ៉ាងច្រើនកុះករ នាបរិវេណសាលាស្រុកស្ទឹងហាវ។
អភិបាលស្រុកស្ទឹងហាវ លោក ឆាយ សុគន្ធដា បានឱ្យដឹងថា ការិយាល័យច្រកចេញ ចូលតែមួយ និងការិយាល័យប្រជាពលរដ្ឋស្រុកស្ទឹងហាវ បានដាក់ឱ្យដំណើរការនៅពេលនេះ ដើម្បីផ្តល់សេវាសាធារណៈ ជូនប្រជាពលរដ្ឋឱ្យមានភាពងាយស្រួល ដើមហបីកាត់បន្ថយការចំណាយពេលវេលា បង្កើនទំនុកចិត្តដល់ប្រជាពលរដ្ឋ និងបង្ខិតសេវានានា ឱ្យមកជិត ឬកៀកប្រជាពលរដ្ឋ។
លោកអភិបាលស្រុកបន្តថា ជាក់ស្ដែង នៅក្នុងឆ្នាំ២០១៨ អាជ្ញាធរស្រុកស្ទឹងហាវ បានផ្ដល់សេវាផ្សេងៗ ជូនប្រជាពលរដ្ឋចប់សព្វគ្រប់ជាស្ថាពរចំនួន ៤.៣៨៨ ច្បាប់ និងមានប្រជាពលរដ្ឋមកទទួលសេវាសរុប ២.១០៦នាក់ ។
នាឱកាសនោះដែរ លោក យន្ត មីន អភិបាល នៃគណៈអភិបាលខេត្តព្រះសីហនុ មានប្រសាសន៍ថា ការដាក់ឲ្យដំណើរការការិយាល័យច្រក ចេញចូលតែមួយ និងការិយាល័យប្រជាពលរដ្ឋស្រុកស្ទឹងហាវនៅពេលនេះ គឺជាការផ្ដល់សិទ្ធិសម្រេចក្នុងការទទួលខុសត្រូវដល់ក្រុមប្រឹក្សា និងគណៈអភិបាលស្រុក ដែលជាតំណាងរាជរដ្ឋាភិបាល នៅថ្នាក់ស្រុក ក្នុងការផ្ដល់សេវារដ្ឋបាល ជូនប្រជា ពលរដ្ឋចំនួន ១៤វិស័យ។ ក្នុងនោះមានវិស័យជំនាញចំនួន១០ ដែលក្រសួងស្ថាប័នពាក់ព័ន្ធបានធ្វើប្រតិភូកម្ម និងវិស័យផ្ទាល់ចំនួន៤ បានដាក់មកឱ្យថ្នាក់មូលដ្ឋានស្រុកសម្រេច។
លោក យន្ត មីន បន្តថា ក្នុងវិស័យទាំង ១៤ មានសេវារហូតដល់ ២១១សេវា ដែលរដ្ឋបាលស្រុកស្ទឹងហាវ ត្រូវអនុវត្តផ្ដល់សេវារដ្ឋបាលដោយផ្ទាល់ ដើម្បីឆ្លើយតបទៅ នឹងតម្រូវការ របស់ប្រជាពលរដ្ឋនៅក្នុងមូលដ្ឋាន។
ដោយឡែកចំពោះការិយាល័យប្រជាពលរដ្ឋនៅរដ្ឋបាលថ្នាក់ស្រុក គឺបង្កើតឡើង ដើម្បីលើកកម្ពស់អភិបាលកិច្ចល្អ ក្នុងការផ្ដល់សេវា និងការអភិវឌ្ឍន៍នៅមូលដ្ឋានតាមរយៈពង្រឹងតួនាទី ភារកិច្ច របស់រដ្ឋបាលស្រុក ក្នុងការទទួល និងសម្រុះសម្រួលដោះស្រាយបណ្ដឹងក្រៅប្រព័ន្ធតុលាការពាក់ព័ន្ធនឹងការផ្ដល់សេវាសាធារណៈ និងការគ្រប់គ្រងរដ្ឋបាលប្រកបដោយតម្លាភាពគណនេយ្យភាព ប្រសិទ្ធភាព សំដៅបង្កើនជំនឿទុក ចិត្តប្រជាពលរដ្ឋនៅក្នុងមូលដ្ឋាន។
លោក យន្ត មីន អភិបាលខេត្តព្រះសីហនុ បន្តថា ចំពោះការធ្វើកំណែទម្រង់ថ្មី វាប្រាកដជាមានអ្វីថ្មី ខុសពីទម្លាប់មុនជាក់ជាមុនខាន ឬ អាចកើតមាននូវចំណុចអសកម្មមួយចំនួនផងដែរ ប្រសិនបើអ្នកពាក់ព័ន្ធមិនមានឆន្ទៈ ក្នុងការបំពេញការងារ តាមតួនាទី ភារកិច្ចរបស់ខ្លួន ឱ្យស្របតាមគោល ការណ៍ដែលបានដាក់ចេញនោះទេ។
ត្រង់ចំណុចនេះ លោក យន្ត មីន សង្កត់ធ្ងន់ថា ទាមទារឲ្យយើងទាំងអស់គ្នាជាមន្ត្រីរាជការបំរើរាស្ត្រ ត្រូវចេះបត់បែនទៅតាមពេលវេលា ដោយត្រូវអនុវត្តការងារទៅតាមរបត់ថ្មី នៃកំណែទម្រង់ របស់រាជរដ្ឋាភិបាល។ លោកថា បញ្ហានេះ គឺទាមទារឲ្យយើងទាំងអស់គ្នាជាមន្ត្រីរាជការ ត្រូវខិតខំប្រឹងប្រែងរួមគ្នាធ្វើការដោះស្រាយបញ្ហាប្រឈមទាំងនោះជាបន្តបន្ទាប់ ដើម្បីរួមចំណែកសម្រេចគោលដៅការធ្វើកំណែទម្រង់ របស់រាជរដ្ឋាភិបាលបានដាក់ចេញ៕ ដែន សីមា
