ក្នុងឱកាសទទួលបានការអនុញ្ញាតឲ្យចូលជួបសំណេះសំណាល និងពិភាក្សាការងារជាមួយ លោកកិត្តិនីតិកោសលបណ្ឌិត ប៉ែន បញ្ញា ប្រធានគណៈកម្មការនីតិកម្ម និងយុត្តិធម៌នៃរដ្ឋសភា នៅព្រឹកថ្ងៃទី២១ ខែមិថុនា ឆ្នាំ២០១៩ នៅវិមានរដ្ឋសភា អង្គការសហព័ន្ធសន្តិភាពសកលកម្ពុជា UNIVERSAL PEACE FEDERATION-CAMBODIA (UPF) ដែលមាន លោក ហាជីមី សៃតុ ជាប្រធាន បានស្នើសុំអន្តរាគមន៍ពីលោកកិត្តិនីតិកោសលបណ្ឌិតជួយគាំទ្រចំពោះអង្គការនេះ ក្នុងសកម្មភាពលើកកម្ពស់តម្លៃវប្បធម៌ និងគ្រួសារ និងការប្រារព្ធខួបនៃការបង្កើតអង្គការនៅកម្ពុជា នាអំឡុងខែវិច្ឆិកា ឆ្នាំ២០១៩ខាងមុខនេះ។
លោក ហាជីមិ សៃតុ ប្រធានសហព័ន្ធ(UPF) ប្រចាំតំបន់ឥណ្ឌូចិនបានមានប្រសាសន៍ថ្លែងកោតសរសើរ ចំពោះការអភិវឌ្ឍរីកចម្រើនគ្រប់វិស័យរបស់ប្រទេសកម្ពុជា។ លោកបន្តថា កម្ពុជាក៏បានខិតខំប្រឹងប្រែងកសាងជាមួយគ្នាលើសកម្មភាពការងារលើកកម្ពស់បណ្តាញទំនាក់ទំនង ការសន្ទនា ពហុសាសនា ការអប់រំ សុជីវធម៌នៃការរស់នៅដោយសុច្ចរិត។ លោកបន្ថែមថា អង្គការសហព័ន្ធសន្តិភាពសកលកម្ពុជា នឹងប្រារព្ធខួបនៃការបង្កើតអង្គការនេះ ដោយឈរលើគោលដៅរក្សាសន្តិភាព និងដើម្បីសន្តិភាព នាខែវិច្ឆិកា ឆ្នាំ២០១៩ខាងមុខ ក្នុងនោះក៏មានការពិភាក្សាកម្មវិធីកិច្ចប្រជុំកំពូលអាស៊ី-ប៉ាស៊ីហ្វិក ឆ្នាំ២០១៩ នៅរាជធានីភ្នំពេញ ប្រទេសកម្ពុជាផងដែរ ដែលរំពឹងថានឹងមានអ្នកចូលរួមប្រមាណជាង៥ម៉ឺននាក់។
លោកបញ្ជាក់ថា អង្គការនេះកំណត់នូវវត្ថុបំណងចំនួនបី គឺទី១-ប្រសិទ្ធពរជ័យមង្គលដល់គ្រួសារក្នុងសង្គម (ប្តីមួយប្រពន្ធមួយ) ទី២-ការអប់រំយុវជន និងទី៣-អភិបាលកិច្ចល្អ ព្រមទាំងកិច្ចការទាំងឡាយរបស់អង្គការសហប្រជាជាតិ។
លោកកិត្តិនីតិកោសលបណ្ឌិត ប៉ែន បញ្ញា ប្រធានគណៈកម្មការទី៦នៃរដ្ឋសភា បានមានប្រសាសន៍កោតសរសើរចំពោះអង្គការសហព័ន្ធសន្តិភាពសកលកម្ពុជា ដែលបានខិតខំអនុវត្តការងាររបស់ខ្លួន ដើម្បីរួមចំណែកជួយអភិវឌ្ឍន៍តាមបណ្តាប្រទេសនានា ទាំងក្នុងតំបន់ និងសកលលោក ក្នុងនោះក៏មានប្រទេសកម្ពុជាផងដែរ។ លោកកិត្តិនីតិកោសលបណ្ឌិត បានផ្ដោតការចាប់អារម្មណ៍ចំពោះកម្មវិធីកិច្ចប្រជុំកំពូលអាស៊ី-ប៉ាស៊ីហ្វិក ឆ្នាំ២០១៩ថា ជាកិច្ចប្រជុំ ដែលផ្អែកលើចក្ខុវិស័យ នៃការច្នៃប្រឌិត និងភាពជាអ្នកដឹកនាំ តាមរយៈការពិភាក្សា ការផ្លាស់ប្ដូរបទពិសោធន៍ និងការចែករំលែកគតិបណ្ឌិត និងការយល់ឃើញរបស់ថ្នាក់ដឹកនាំទាំងឡាយ ដែលមានការប្ដេជ្ញាចិត្ត ក្នុងការកសាងពិភពលោកមួយ ប្រកបដោយការយោគយល់អធ្យាស្រ័យគ្នាទៅវិញទៅមក ក្នុងសុខសន្តិភាពប្រកបដោយនិរន្តភាព និងវិបុលភាពសម្រាប់មនុស្សទាំងអស់៕ ដោយ៖កូឡាប