សិស្ស និងបុគ្គលិក មជ្ឈមណ្ឌលបណ្តុះបណ្តាលវិជ្ជាជីវៈ ដែលមានទីតំាងនៅខេត្តកណ្តាល ចំនួន១២៣នាក់បានមកសិក្សាស្វែងយល់ពីតួនាទីភារកិច្ច របស់រដ្ឋសភា និងបានទស្សនាវិមានរដ្ឋសភា នៅរសៀលថ្ងៃទី២០ ខែមិថុនា ឆ្នាំ២០១៩។
ដំណើរទស្សនកិច្ចសិក្សានេះ ដឹកនាំដោយ លោក ញ៉ឹក ប៊ុនធឿន ប្រធានផ្នែកស្រាវជ្រាវ និងទីផ្សារនៃមជ្ឈមណ្ឌលបណ្តុះបណ្តាលវិជ្ជាជីវៈ។
លោកកិត្តិនីតិកោសលបណ្ឌិត ប៉ែន បញ្ញា ប្រធានគណៈកម្មការនីតិកម្ម និងយុត្តិធម៌នៃរដ្ឋសភានិងមន្រ្តីជាន់ខ្ពស់នៃអគ្គលេខាធិការដ្ឋានរដ្ឋសភា បានទទួលស្វាគមន៍ និងធ្វើបទបង្ហាញនៅក្នុងដំណើរទស្សនកិច្ចនេះ។ លោកកិត្តិនីតិកោសលបណ្ឌិត ប៉ែន បញ្ញា បានលើកឡើងពីប្រវត្តិរបស់ រដ្ឋសភាកម្ពុជា ពីឆ្នាំ១៩៤៧ រហូតដល់បច្ចុប្បន្ននេះ។ លោកកិត្តិនីតិកោសលបណ្ឌិតបានគូសបញ្ជាក់ថា រដ្ឋសភាជាស្ថាប័នតំណាងឲ្យប្រជាធិបតេយ្យ ហើយរដ្ឋធម្មនុញ្ញកម្ពុជាបានចែងយ៉ាងច្បាស់ ពីរបបប្រជាធិបតេយ្យនៅកម្ពុជា ដែលមានភាពសេរីពហុបក្ស និងបានបែងចែកអំណាចដឹកនាំរដ្ឋជាបី ដាច់ពីគ្នា គឺអំណាចនីតិប្បញ្ញត្តិ អំណាចនីតិប្រតិបត្តិ និងអំណាចតុលាការ។
លោកប្រធានគណៈកម្មការនីតិកម្ម និងយុត្តិធម៌របស់រដ្ឋសភា បានមានប្រសាសន៍បន្ថែមថា រដ្ឋសភាមានភារកិច្ចស្នូលសំខាន់បីគឺ ជាតំណាងរបស់ ពលរដ្ឋ ត្រួតពិនិត្យ និងឃ្លាំមើលការអនុវត្តច្បាប់របស់រាជរដ្ឋាភិបាល និងការងារនីតិកម្ម។ ចាប់ពីឆ្នាំ១៩៩៣មក រដ្ឋសភាបានដំណើរការចំនួន៦អាណត្តិ ហើយ។ រដ្ឋសភាកើតចេញពីការបោះឆ្នោតដោយសេរី នៅរៀងរាល់៥ឆ្នាំម្តង។
ចំណែក លោក កៃ កេតនិន អគ្គនាយកនីតិកម្ម និងស្រាវជ្រាវ នៃអគ្គលេខាធិការដ្ឋានរដ្ឋសភា បានធ្វើបទបង្ហាញពីតួនាទី និងភារកិច្ចរបស់អគ្គលេខាធិការដ្ឋានរដ្ឋសភា។ អគ្គលេខាធិការដ្ឋានរដ្ឋសភា គឺអង្គភាពរដ្ឋបាលដែលមានភារកិច្ចផ្តល់សេវាគ្រប់បែបយ៉ាង ដើម្បីឲ្យរដ្ឋសភាដំណើរការ ជាអចិន្រ្តៃយ៍។
គួរជម្រាបដែលថា មជ្ឈមណ្ឌលបណ្តុះបណ្តាលវិជ្ជាជីវៈនេះ បានបង្កើតឡើងនៅឆ្នាំ១៩៩៤។ ជាអង្គការក្រៅរដ្ឋាភិបាល ដែលបានសហការជាមួយ ក្រសួងអប់រំ យុវជន និងកីឡា ក្រោមគម្រោងឥណទានសម្បទានរបស់ធនាគារអភិវឌ្ឍន៍អាស៊ី(ADB) និងសម្បទានភ្នាក់ងារអភិវឌ្ឍន៍បារាំង(AFD) ក្នុងការអប់រំ បណ្តុះបណ្តាលបច្ចេកទេស និងវិជ្ជាជីវៈ លើជំនាញបច្ចេកទេស និងវិជ្ជាជីវៈទាំងនោះ មានដូចជា ផ្នែកព័ត៌មានវិទ្យា ជួសជុលរថយន្ត ជួសជុលម៉ាស៊ីនដេរ ជាងអ៊ុតសក់ ភាសាអង់គ្លេស ពេទ្យសត្វ កសិកម្ម អគ្គិសនី ជាដើម។
លោក ញ៉ឹក ប៊ុនធឿន ប្រធានផ្នែកស្រាវជ្រាវ និងទីផ្សារនៃមជ្ឈមណ្ឌលបណ្តុះបណ្តាលវិជ្ជាជីវៈ បានចាត់ទុកដំណើរទស្សនកិច្ចមកកាន់វិមានរដ្ឋសភា នាឱកាសនេះ មានសារៈសំខាន់ណាស់ ក្នុងការពង្រឹងពង្រីកចំណេះដឹងទូទៅរបស់សិក្ខាកាម ពិសេសបានផ្តល់ឱកាសដល់ពួកគេបានស្គាល់ និងបាន ឃើញកន្លែងធ្វើការរបស់តំណាងរាស្រ្ត ដែលជាតំណាងរបស់ពួកគាត់។
លោកបានកោតសរសើរដល់ស្ថាប័នរដ្ឋសភា ដែលតែងតែផ្តល់ឱកាសដល់ សាធារណជន បានមកធ្វើទស្សនកិច្ចសិក្សាដោយផ្ទាល់នៅក្នុងវិមានរដ្ឋសភា៕ ដោយ៖កូឡាប
