ប្រធានាធិបតីអាមេរិច ដូណាល់ ត្រាំ កាលពីថ្ងៃព្រហស្បតិ៍ម្សិលមិញបានបើកភ្លើងខៀវឲ្យមានការវាយប្រហារយោធាប្រឆាំងនឹងប្រទេសអុីរ៉ង់ ប៉ុន្តែគាត់បានកែប្រែចិត្តវិញ។ នេះបើតាមការប្រព័ន្ធផ្សព្វផ្សាយរបស់អាមេរិច។
សារព័ត៌មាន New York Times បានដកស្រងសម្តីរបស់មន្ត្រីសេតវិមានដោយបញ្ជាក់ថា មានគម្រោងវាយប្រហារលើគោលដៅជាច្រើន។
មន្ត្រីសេតវិមានបញ្ជាក់ថា កិច្ចប្រតិបត្តិការកំពុងស្ថិតក្នុងដំណើរការដំណាក់កាលដំបូង ប៉ុន្តែលោកត្រាំ បានបោះបង់ចោលជំហរទៅវិញ។
សេតវិមានមិនទាន់មានការធ្វើអត្ថាធិប្បាយអ្វីឡើយរហូតមកដល់ពេលនេះ។
សូមបញ្ជាក់ថា គម្រោងវាយប្រហារប្រឆាំងអ៊ីរ៉ង់កើតឡើងក្រោយពេលយោធាអ៊ីរ៉ង់បានបាញ់ទម្លាក់យន្តហោះចារកម្មអាមេរិចកាលកាលពីថ្ងៃព្រហស្បតិ៍។
ទីក្រុងតេហេរ៉ង់បាននិយាយថា យន្តហោះគ្មានមនុស្សបើករបស់អាមេរិចបានចូលក្នុងដែនអាកាសរបស់ខ្លួននៅថ្ងៃព្រហស្បតិ៍ព្រឹក។ ចំណែកភាគីអាមេរិចបានរក្សាជំហរថា យន្តហោះខ្លួនត្រូវបានបាញ់ទម្លាក់នៅដែនលំហរអន្តរជាតិ។
កម្តៅរវាងប្រទេសទាំងពីរកំពុងកើនឡើងខ្លាំង ដែលកាលពីពេលថ្មីៗនេះផងដែឬ អាមេរិចបានចោទអុីរ៉ង់ថា បានវាយប្រហារកប៉ាល់ដឹកប្រេងចំនួន ២គ្រឿងនៅឈូងសមុទ្រអូម៉ង ប៉ុន្តែអ៊ីរ៉ង់បដិសេធថា ខ្លួនពាក់ព័ន្ធនឹងការវាយប្រហារនោះ៕
អត្ថបទប្រែសម្រួលដោយ៖ សុភ័ក្រ
ប្រភព៖ BBC