ភ្នំពេញ ៖ កម្លាំងការិយាល័យស៊ើបអង្កេត និងអនុវត្តនីតិវិធី ផែនការងារអន្តោប្រវេសន៍ នៃស្នងការដ្ឋាននគរបាលរាជធានីភ្នំពេញ ចុះត្រួតពិនិត្យ អគារ អិល វី សែនសុខ ផ្ទះលេខ៣៥C ផ្លូវលេខ២៣P សង្កាត់ទឹកថ្លា ខណ្ឌសែនសុខ ឃាត់ខ្លួនជនជាតិចិន៩នាក់ គ្មានលិខិតឆ្លងដែនជាប់នឹងខ្លួន នៅព្រឹកថ្ងៃទី២១ ខែមិថុនា ឆ្នាំ២០១៩ ។
ការឃាត់ខ្លួននេះ ដឹកនាំដោយលោកឧត្តមសេនីយ៍ត្រី សរ សំណាង ជាស្នងការរង ទទួលផែនការងារអន្តោប្រវេសន៍ នៃស្នងការដ្ឋាននគរបាលរាជធានីភ្នំពេញ បានចុះសហការ ជាមួយនាយកដ្ឋានស៊ើបអង្កេត និងអនុវត្តនីតិវិធី នៃអគ្គនាយកដ្ឋានអន្តោប្រវេសន៍ និង កម្លាំងសមត្ថកិច្ចមូលដ្ឋានប៉ុស្តិ៍នគរបាលរដ្ឋបាលទឹកថ្លា ខណ្ឌសែនសុខ រាជធានីភ្នំពេញ មានការដឹកនាំដោយ លោកឧត្តមសេនីយ៍ទោ ហាស់ សុត្ថា អនុប្រធាននាយកដ្ឋានស៊ើបអង្កេត និងអនុវត្តនីតិវិធី លោក ខាំ សុផារី ព្រះរាជអាជ្ញារងអមសាលាដំបូង រាជធានីភ្នំពេញ និងលោកដួង សារី ក្រឡាបញ្ជី ចុះត្រួតពិនិត្យ អគារអិល វី សែនសុខ ផ្ទះលេខ៣៥C ផ្លូវលេខ២៣P សង្កាត់ទឹកថ្លា ខណ្ឌសែនសុខ ជាលទ្ធផល ពិនិត្យឃើញមាន ជនជាតិចិន សរុបចំនួន ៤៣ នាក់ (ស្រី៨នាក់) និងបានឃាត់ខ្លួនជនជាតិចិន ចំនួន៩នាក់ (ស្រី៣នាក់) គ្មានលិខិតឆ្លងដែនជាប់នឹងខ្លួន និងដកហួតលិខិតឆ្លងដែនចំនួន២៦ក្បាល បញ្ជូនទៅនាយកដ្ឋានអន្តោប្រវេសន៍ ដើម្បីអនុវត្តនីតិវិធីបន្តនៃច្បាប់៕ ដោយ៖កូឡាប
