ប្រធានាធិបតីអាមេរិច ដូណាល់ ត្រាំ បាននិយាយថា លោកមិនចង់មានសង្គ្រាមនោះទេ ប៉ុន្តែលោកបានព្រមានអ៊ីរ៉ង់ថា អុីរ៉ង់នឹងខ្ទេចប្រសិនជាសង្គ្រាមផ្ទុះឡើង។
លោកថា អាមេរិចបើកឲ្យមានការចរចារ ប៉ុន្តែនឹងមិនអនុញ្ញាតឲ្យអ៊ីរ៉ង់អភិវឌ្ឍន៍អាវុធនុយក្លេអ៊ែរនោះឡើយ។ នេះជាការបញ្ជាក់របស់លោកប្រាប់សារពត៌មាន NBC នៅថ្ងៃសុក្រម្សិលមិញនេះ។
ការព្រមាននេះកើតឡើងក្រោយពេលស្ថានការណ៍កំពុងតែឡើងកម្តៅខ្លាំង ក្រោយពេលអ៊ីរ៉ង់បានបាញ់ទម្លាក់យន្តហោះដ្រូនស៊ើបការណ៍របស់អាមេរិចកាលពីថ្ងៃព្រហស្បតិ៍កន្លងទៅនេះ។ លោកត្រាំ នៅថ្ងៃនោះបានបើកភ្លើងខៀវឲ្យមានការវាយប្រហារយោធាប្រឆាំងអ៊ីរ៉ង់ ប៉ុន្តែគាត់ក៏បានប្តូរចិត្តវិញ។
ក្រុងតេហេរ៉ង បាននិយាយថា យន្តហោះស៊ើបការណ៍ដែលគ្មានមនុស្សបើករបស់អាមេរិចបានហោះចូលក្នុងដែនអាកាសរបស់ខ្លួននៅព្រឹកថ្ងៃព្រហស្បតិ៍ ប៉ុន្តែអាមេរិចបញ្ជាក់ថា យន្តហោះដ្រូនខ្លួន ត្រូវបានបាញ់ទម្លាក់នៅក្នុងដែនអាកាសអន្តរជាតិ។
អាមេរិចបានស្នើឲ្យក្រុមប្រឹក្សាសន្តិសុខអង្គការសហប្រជាជាតិជួបប្រជុំនៅថ្ងៃច័ន្ទសើម្បីពិភាក្សាលើបញ្ហាអ៊ីរ៉ង់៕
អត្ថបទប្រែសម្រួលដោយ៖ សុភ័ក្រ
ប្រភព៖ BBC