ខេត្តព្រះសីហនុ៖ រដ្ឋបាលខេត្តព្រះសីហនុ បានឱ្យផ្តល់ដំណឹងបន្ថែមថា ករណីបាក់រលំអគារ នៅក្រុងព្រះសីហនុ គិតមកដល់ម៉ោង៦ ព្រឹកថ្ងៃទី២៤ ខែមិថុនានេះ ក្រុមប្រតិបត្តិការសង្គ្រោះបន្តរកឃើញសាកសពជនរងគ្រោះជាបន្តបន្ទាប់ គឺបានកើនដល់ ២៤នាក់ហើយ និងអ្នករបួសនៅរក្សាចំនួន ២៤នាក់ដដែល។
ក្រុមសង្គ្រោះឱ្យដឹងទៀតថា ពួកគេបានរកឃើញសាកសពបុរស៣នាក់ទៀត នៅក្នុងគំនរបាក់បែក នៃអគារដួលរលំ កាលពីយប់រំលងអាធ្រាត្រឈានចូលថ្ងៃទី២៤ ខែមិថុនា នាំឱ្យចំនួនអ្នកស្លាប់កើនច្រើន។
មន្ត្រីរដ្ឋបាលខេត្តព្រះសីហនុ បញ្ជាក់ថា សរុបជនរងគ្រោះទាំងស្លាប់ និងរបួស ត្រឹមម៉ោង៦ព្រឹកថ្ងៃទី២៤ ខែមិថុនានេះ មានចំនួន ៤៨នាក់។ ក្នុងនោះស្លាប់ ២៤នាក់ ស្រី៤នាក់ និងរងរបួសចំនួន ២៤នាក់ ស្រី២នាក់។
ទន្ទឹមគ្នានេះ ក្រុមសង្គ្រោះ ក៏នៅតែបន្តបេសកកម្មស្វែងរកជនរងគ្រោះ ដោយយកចិត្តទុកដាក់ជាបន្តទៀត នៅថ្ងៃចន្ទ ទី២៤ ខែមិថុនា ឆ្នាំ២០១៩នេះ។
សូមបញ្ជាក់ថា អាគារបាករលំខាងលើនេះ មានកំពស់៧ជាន់ សង់ពីគ្រោងដែក មានបណ្តោយ ៣០ម៉ែត្រ និងទទឹង១៥ម៉ែត្រ វាជាអាគារថ្មីកំពុងសាងសង់ និងវិនិយោគដោយថៅកែជនជាតិចិន។
អគារនេះ មានទីតាំងស្ថិតក្នុងភូមិ៣ សង្កាត់៤ ក្រុង-ខេត្តព្រះសីហនុព្រះសីហនុ ហើយបានដួលរលំកាល កាលពីម៉ោងជិត៥ព្រឹកថ្ងៃទី២២ ខែមិថុនា ឆ្នាំ២០១៩។
កាលពីយប់ម៉ិញនេះ សម្តេចតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា ក៏បានធ្វើដំណើរតាមរថយន្តចុះពិនិត្យផ្ទាល់ ដល់ទីតាំងមានអាគារបាក់រលំ ដើម្បីជាការចែករំលែកទុក្ខដល់គ្រួសារសព និងចូលរួមចាត់ចែងផ្តល់ជាកម្លាំចិត្តដល់ក្រុមការងារសង្គ្រោះឱ្យកាន់តែមានប្រសិទ្ធភាព ៕ ដែន សីមា