ខេត្តព្រះសីហនុ ៖ រដ្ឋបាលខេត្តព្រះសីហនុ បានឱ្យផ្តល់ដំណឹងបន្ថែមថា ករណីបាក់រលំអគារ នៅក្រុងព្រះសីហនុ គិតមកដល់ម៉ោង ១២ និង៣០នាទី រសៀលថ្ងៃទី២៤ ខែមិថុនានេះ ក្រុមប្រតិបត្តិការសង្គ្រោះបន្តរកឃើញសាកសពជនរងគ្រោះជាបន្តបន្ទាប់ គឺបានកើនដល់ ២៦នាក់ហើយ និងអ្នករបួសនៅរក្សាចំនួន ២៤នាក់ដដែល។
មន្ត្រីរដ្ឋបាលខេត្តព្រះសីហនុ បញ្ជាក់ថា សរុបជនរងគ្រោះទាំងស្លាប់ និងរបួស ត្រឹមម៉ោង១២ នុង៣០នាទី រសៀលថ្ងៃទី២៤ ខែមិថុនានេះមានចំនួន ៥០នាក់។ ក្នុងនោះស្លាប់ ២៦នាក់ ស្រី៤នាក់ និងរងរបួសចំនួន ២៤នាក់ ស្រី២នាក់ សរុបមានចំនួន៥០នាក់។។
រហូតមកដល់ពេលនេះ ក្រុមអ្នកជួយសង្គ្រោះ ក៏កំពុងតែបន្តបេសកកម្មស្វែងរកជនរងគ្រោះ ដោយយកចិត្តទុកដាក់ បន្តរហូតមកដល់រសៀលថ្ងៃចន្ទ ទី២៤ ខែមិថុនា ឆ្នាំ២០១៩នេះ។
សូមបញ្ជាក់ថា អគារបាករលំខាងលើនេះ មានកំពស់៧ជាន់ សង់ពីគ្រោងដែក មានបណ្តោយ ៣០ម៉ែត្រ និងទទឹង១៥ម៉ែត្រ វាជាអគារថ្មីកំពុងសាងសង់ និងវិនិយោគដោយជនជាតិចិន។
អគារនេះ មានទីតាំងស្ថិតក្នុងភូមិ៣ សង្កាត់៤ ក្រុង-ខេត្តព្រះសីហនុព្រះសីហនុ ដោយបានដួលរលំកាល កាលពីម៉ោងជិត៥ព្រឹកថ្ងៃទី២២ ខែមិថុនា ឆ្នាំ២០១៩។
ទាក់ទងការដួលរលំអគារខាងលើនេះ កាលពីយប់ម៉ិញនេះ សម្តេចតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា ក៏បានធ្វើដំណើរតាមរថយន្តចុះពិនិត្យផ្ទាល់ ដល់ទីតាំងមានអគារបាក់រលំ ដើម្បីជាការចែករំលែកទុក្ខដល់គ្រួសារសព និងចូលរួមចាត់ចែងផ្តល់ជាកម្លាំងចិត្តដល់ក្រុមការងារសង្គ្រោះឱ្យកាន់តែមានកម្លាំងចិត្ត និងឱ្យមានប្រសិទ្ធភាពថែមទៀត៕ ដែន សីមា