ភ្នំពេញ ៖ លោកហេង រតនា អគ្គនាយកស៊ីម៉ាក់ នៅថ្ងៃទី ២៤ ខែមិថុនានេះ បានសរសេរសារ នៅលើហ្វេសប៊ុកផ្លូវការរបស់លោក ដោយរៀបរាប់ពីព្រឹត្តិការណ៍ នៃការបាក់រលំអគារ នៅខេត្តព្រះសីហនុ បណ្ដាលឲ្យមនុស្សស្លាប់ និងរបួសជាច្រើននាក់ ហើយក្នុងនោះ លោកក៏បានរំលេចនូវសារនយោបាយមួយចំនួន ដោយលើកឡើងថា ត្រីងៀតឆ្លៀតពងរបស់អតីតមេដឹកនាំបក្សសង្គ្រោះជាតិ គឺលោកសមរង្ស៊ី ដែលឆ្លៀតការកេងចំណេញផ្នែកនយោបាយ ពីប្រជាពលរដ្ឋកម្ពុជា ដែលកំពុងមានទុក្ខ ដោយគ្រោះថ្នាក់បាត់បង់ជីវិត និងរងរបួស ខណៈដែលលោកសមរង្ស៊ី បានស្រែកនៅឯក្រៅប្រទេស មិនហ៊ានជាន់ដីកម្ពុជា មកមើលជនរងគ្រោះ ដែលខុសឆ្ងាយពីសម្ដេចតេជោនាយករដ្ឋមន្ត្រី ដែលបានចុះទៅផ្ទាល់ មើលរាស្ត្ររបស់សម្តេច។
លោកហេងរតនាបានបញ្ជាក់យ៉ាងដូច្នេះថា “សម្តេចតេជោសែន ខិតខំគ្មានសំចៃកម្លាំងទាំងយប់ទាំងថ្ងៃ ជាមួយបេះដូងអាណិតអាសូរ ជនរងគ្រោះ ដោយជួយទាំងស្មារតី ថវិកា និងកម្លាំងកាយចិត្ត! ចុះអ្នកវិញ តេីមានអ្វីក្រៅពីវប្បធម៌ លាបពណ៌ហ្នឹងទេ? សូម្បីនៅអាមេរិក បារាំង ចិន យួន ថៃ ក៏វាមានដួលរលំដែរ! កុំមានមហ្ឆិតាកម្ទេចតែខ្មែរឯងពេក។ មេខេត្តត្រូវបានលាលែង និងដកចេញពីដំណែង ព្រោះការទទួលខុសត្រូវ លេីការគ្រប់គ្រងរបស់ខ្លួន! កំហុសបច្ចេកទេសឬយ៉ាងណា និងអ្នកណាខ្លះ ទទួលខុសត្រូវ គឺត្រូវស៊ើបអង្កេតឱយបានច្បាស់លាស់ និងមានវិធានការ បង្កាសម្រាប់អនាគត!”៕ ដោយ៖កូឡាប
