ខេត្តព្រះសីហនុ៖ រដ្ឋបាលខេត្តព្រះសីហនុ បានឲ្យដឹងថា ប្រតិបត្តិការរុករកជនរងគ្រោះ និងកាយគំនរបាក់បែកពីអគារបាក់រលំ នៅក្រុងព្រះសីហនុ បានបិទបញ្ចប់ជាស្ថាពរហើយ កាលពីយប់ថ្ងៃទី២៤ ខែមិថុនា ឆ្នាំ២០១៩ ក្រោយក្រុមសង្គ្រោះ បានប្រើពេលវេលា រយៈពេល៣ថ្ងៃ ចាប់ពីព្រឹកថ្ងៃទី២២ ខែមិថុនា ឆ្នាំ២០១៩មក។
មន្ត្រីរដ្ឋបាលខេត្តព្រះសីហនុបាឲ្យដឹងថា សរុបជនរងគ្រោះក្នុងហេតុការណ៍អគារបាក់រលំខាងលើនេះ មានចំនួន៥៤នាក់។ ក្នុងនោះជនរងគ្រោះ ដែលស្លាប់មានចំនួន២៨នាក់ និងអ្នករងរបួសមានចំនួន២៦នាក់។
ដោយឡែក ចំពោះការខូចខាតទ្រព្យសម្បត្តិផ្សេងៗទាំងក្នុងអគាររលំបាក់ និងលំនៅដ្ឋាន របស់ប្រជាពលរដ្ឋរស់នៅក្បែរខាងអគារបាក់រលំនេះ អាជ្ញាធរនៅមិនទាន់មានរបាយការណ៍សរុបពីចំនួន នៃទំហំការខូចខាតនៅឡើយ។
គួររំលឹកថា អគារបាក់រលំនេះជាកម្មសិទ្ធិរបស់ថៅកែជនជាតិចិន ហើយជាសំណង់កំពុងសាងសង់ថ្មីមានកម្ពស់ ៧ជាន់ មានបណ្តោយ៣០ម៉ែត្រ និងទទឹង១៥ម៉ែត្រ ស្ថិតនៅភូមិ៣ សង្កាត់៤ ក្រុង-ខេត្តព្រះសីហនុ។ អគារនេះ បានបាក់រលំទាំងស្រុងកាលពីវេលាម៉ោងជិត ៥ព្រឹកថ្ងៃទី២២ ខែមិថុនា ឆ្នាំ២០១៩។
តាមការអះអាងពីមន្ត្រីជំនាញឲ្យដឹងថា អាគារបាក់រលំនេះ គឺដោយសារបញ្ហាបច្ចេកទេសសំណង់គ្មានគុណភាព។
ទាក់ទិនករណីបាក់រលំអគារមានកំពស់ ៧ជាន់ខាងលើនេះ គឺការយកចិត្តទុកដាក់ខ្ពស់ និងអញ្ជើញចូលរួមដោយផ្ទាល់ដល់ទីតាំងកើតហេតុពីសំណាក់ សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា បានចុះមកពិនិត្យកម្លាំងចម្រុះ ឬអ្នកសង្គ្រោះអាជីព, កងកម្លាំងមានសមត្ថកិច្ចចម្រុះ ព្រមទាំងក្រុមអ្នកស្ម័គ្រចិត្តកម្ពុជាច្រើនរាប់រយនាក់ និងចូលរួមពីអ្នកជំនាញជនជាតិចិនផងនោះ បានធ្វើយុទ្ធនាការកាយគំនរបែកបាក់ទាំងយប់ទាំងថ្ងៃ ពោលគឺ២៤ម៉ោងលើ ២៤ម៉ោង ដើម្បីសង្គ្រោះអ្នកនៅរស់រានមានជីវិត និងកាយយកសាកសព ដែលបានជាប់គាំងក្នុងគំនរបេតុងបែកបាក់ស្រុត រហូតរួចរាល់ជាស្ថាពរ និងកំពុងបន្តបោសសំអាតជាចុងក្រោយនៅព្រឹកថ្ងៃទី២៥ ខែមិថុនា ឆ្នាំ២០១៩នេះទៀត។
មន្ត្រីរដ្ឋបាលសាលាខេត្តព្រះសីហនុ បញ្ជាក់បន្ថែមថា ចំពោះហេតុការណ៍ដបសក់រលំអាគារកំពស់៧ជាន់នេះ ក្រៅពីមនុស្សជាប់ពាក់ព័ន្ធទទួលខុសត្រូវ ចំនួន៤នាក់ ដែលអាជ្ញាធរបានឃាត់ខ្លួន ពេលកើតហេតុភ្លាមៗកាលពីថ្ងៃទី២២ ខែមិថុនានោះ គឺមកត្រឹមល្ងាចថ្ងៃទី២៤ ខែមិថុនា សមត្ថកិច្ចនៅ មិនទាន់មានការឃាត់ខ្លួនមនុស្សណាម្នាក់ទៀតទេ។ ប៉ុន្តែអាជ្ញាធរ បានឲ្យដឹងថា ករណីបាក់រលំអាគារកម្ពស់៧ជាន់ខាងលើនេះ សមត្ថកិច្ចស្ថាប័នពាក់ព័ន្ធ កំពុងបន្តដំណើរការស្រាវជ្រាវ ដើម្បីឈានទៅបន្តនីតិវិធីច្បាប់ទៀត៕ ដែន សីមា