ភ្នំពេញ ៖ គណៈកម្មការផែនការ វិនិយោគ កសិកម្ម អភិវឌ្ឍន៍ជនបទ បរិស្ថាន និងធនធានទឹក នៃរដ្ឋសភា ដឹកនាំដោយលោក ជា វ៉ាន់ដេត ប្រធានគណៈកម្មការ រួមជាមួយគណៈកម្មការជំនាញផ្សេងៗទៀតរបស់រដ្ឋសភា បានជួបប្រជុំជាមួយ លោកកិត្តិសេដ្ឋាបណ្ឌិត ឆាយ ថន ទេសរដ្ឋមន្ត្រី រដ្ឋមន្ត្រីក្រសួងផែនការ ដើម្បីពិនិត្យសិក្សាលើសេចក្តីព្រាងច្បាប់ ស្ដីពីការអនុម័តយល់ព្រមលើផែនការយុទ្ធសាស្ត្រអភិវឌ្ឍន៍ជាតិឆ្នាំ២០១៩-២០២៣ នៅរសៀលថ្ងៃទី២៤ ខែមិថុនា ឆ្នាំ២០១៩ នៅវិមានរដ្ឋសភា។
លោកទេសរដ្ឋមន្ត្រីក្រសួងផែនការ បានជម្រាបជូនគណៈកម្មការជំនាញរដ្ឋសភាថា សេចក្តីព្រាងច្បាប់ស្ដីពីការអនុម័តយល់ព្រមលើផែនការ យុទ្ធសាស្ត្រអភិវឌ្ឍន៍ជាតិឆ្នាំ២០១៩-២០២៣ មាន៣មាត្រា ត្រូវបានគណៈរដ្ឋមន្ត្រីពិនិត្យសម្រេចយល់ព្រម ក្នុងសម័យប្រជុំពេញអង្គគណៈរដ្ឋមន្ត្រី នាថ្ងៃទី០៧ ខែមិថុនា ឆ្នាំ២០១៩ និងបានបញ្ជូនមកសុំការអនុម័តពីស្ថាប័ននីតិប្បញ្ញត្តិ។
លោកទេសរដ្ឋមន្ត្រីបានបន្តថា សេចក្តីព្រាងផែនការយុទ្ធសាស្ត្រអភិវឌ្ឍន៍ជាតិនេះ ត្រូវបានរៀបចំឡើងបន្តពីផែនការយុទ្ធសាស្ត្រអភិវឌ្ឍន៍ជាតិ ២០១៤-២០១៨ ដែលត្រូវបានចប់អាណត្តិនាចុងឆ្នាំ២០១៨ ក្នុងនីតិកាលទី៥ នៃរដ្ឋសភាកន្លងទៅ។
លោកទេសរដ្ឋមន្ត្រីបានបន្តទៀតថា ផែនការយុទ្ធសាស្ត្រអភិវឌ្ឍន៍ជាតិ២០១៩-២០២៣ នឹងមានតួនាទីយ៉ាងសំខាន់ក្នុងការអនុវត្តគោលនយោបាយ អាទិភាពនានារបស់រាជរដ្ឋាភិបាលកម្ពុជា ដែលបានកំណត់នៅក្នុងយុទ្ធសាស្ត្រចតុកោណដំណាក់កាលទី៤ និងគោលដៅអភិវឌ្ឍន៍ប្រកបដោយចីរភាពកម្ពុជា២០១៦-២០៣០។
លោកទេសរដ្ឋមន្ត្រីបានគូសបញ្ជាក់ថា ផែនការយុទ្ធសាស្ត្រអភិវឌ្ឍន៍ជាតិឆ្នាំ២០១៩-២០២៣នេះ ត្រូវបានរៀបចំឡើងដើម្បីសម្រេចនូវវត្ថុបំណងសំខាន់បីៈ ទី១-ដើម្បីវាយតម្លៃអំពីលទ្ធផលរួម និងបញ្ហាប្រឈមចម្បងៗ ដែលបានកើតមានឡើងនៅក្នុងការអនុវត្តផែនការយុទ្ធសាស្ត្រអភិវឌ្ឍន៍ជាតិ២០១៤-២០១៨ ក្នុងអាណត្តិកាលរបស់ផែនការនេះទាំងមូលពីឆ្នាំ២០១៤ដល់ឆ្នាំ២០១៨។ ទី២-ដើម្បីកំណត់នូវបណ្ដាវិធានការគោលនយោបាយនានាដល់ក្រសួងស្ថាប័នដែលពាក់ព័ន្ធទាំងអស់ សម្រាប់ការអនុវត្តគោលនយោបាយអាទិភាពនានារបស់រាជរដ្ឋាភិបាលកម្ពុជា និងគោលដៅអភិវឌ្ឍន៍ប្រកបដោយចីរភាពកម្ពុជា តាមវិស័យនៅក្នុងដំណាក់កាលនៃអាណត្តិការរបស់ផែនការ ដើម្បីស្ថិរភាពកំណើនសេដ្ឋកិច្ច កាត់បន្ថយភាពក្រីក្រ និងលើកកម្ពស់កម្រិតជីវភាពរស់នៅប្រជាជនកម្ពុជា និងឆ្ពោះទៅសម្រេចបាននូវស្ថានភាពនៃប្រទេសដែលមានចំណូលមធ្យមកម្រិតខ្ពស់នៅឆ្នាំ២០៣០ និងជាប្រទេសដែលមានចំណូលខ្ពស់នៅឆ្នាំ២០៥០។ ទី៣-ដើម្បីដាក់ចេញនូវប្រព័ន្ធមួយ សម្រាប់តាមដានត្រួតពិនិត្យ និងវាយតម្លៃប្រចាំឆ្នាំនៃការអនុវត្តផែនការ យុទ្ធសាស្ត្រអភិវឌ្ឍន៍ជាតិ២០១៩-២០២៣របស់ក្រសួងស្ថាប័ននានា។
លោកទេសរដ្ឋមន្ត្រីបានបន្ថែមទៀតថា ផែនការយុទ្ធសាស្ត្រអភិវឌ្ឍន៍ជាតិឆ្នាំ២០១៩-២០២៣ បានត្រូវរៀបចំឡើងដោយឈរលើមូលដ្ឋានមួយចំនួន ដូចជា ធាតុចូលដែលទទួលបានពីក្រសួងស្ថាប័ននានា។ ការគិតគូរ និងការគណនាផ្ទាល់ចាំបាច់មួយចំនួនរបស់ក្រសួងផែនការ។ ការពិគ្រោះយោបល់បន្ថែមជាមួយនឹងក្រសួងស្ថាប័នពាក់ព័ន្ធមួយចំនួន។ ការពិគ្រោះយោបល់ជាមួយនឹងដៃគូអភិវឌ្ឍន៍នានា។ ការពិនិត្យមើលឡើងវិញលើទិន្នន័យថ្មីៗ ជាពិសេសទិន្នន័យស្ដីពីអង្កេតសេដ្ឋកិច្ច សង្គមកិច្ច និងទិន្នន័យរដ្ឋបាលរបស់បណ្ដាក្រសួងស្ថាប័ន។ ការពិនិត្យមើល និងបញ្ចូលនូវឯកសារគោលនយោបាយថ្មីៗមួយចំនួនរបស់រដ្ឋាភិបាលកម្ពុជារួមទាំងទស្សនាទានឆ្នាំ២០៣០ និង២០៥០ របស់កម្ពុជា។
នៅក្នុងឱកាសនោះ លោកជា វ៉ាន់ដេត បានថ្លែងអំណរគុណយ៉ាងជ្រាលជ្រៅចំពោះវត្តមានរបស់ ឯកឧត្តមទេសរដ្ឋមន្ត្រី ឆាយ ថន និងសហការី ដែលបានអញ្ជើញចូលរួមប្រជុំជាមួយគណៈកម្មការជំនាញរបស់រដ្ឋសភា ដោយឯកឧត្តមប្រធានគណៈកម្មការបានមានប្រសាសន៍បញ្ជាក់ថា បន្ទាប់ពីបានស្ដាប់ការពន្យល់បកស្រាយទៅលើចំណុចនានា ដែលគណៈកម្មការជំនាញនៃរដ្ឋសភា បានសាកសួររួចមកហើយនេះ គណៈកម្មការនៃរដ្ឋសភា សម្រេចថានឹងបញ្ជូនសេចក្តីព្រាងច្បាប់នេះ ទៅគណៈកម្មាធិការអចិន្ត្រៃយ៍រដ្ឋសភា ដើម្បីពិនិត្យដាក់បញ្ចូលក្នុងរបៀបវារៈសម័យប្រជុំរដ្ឋសភានាពេលខាងមុខ៕ ដោយ៖កូឡាប
