តុលាការព្រហ្មទណ្ឌថៃ កាលពីថ្ងៃសុក្រម្សិលមិញនេះ បានកាត់ទោសជនបោកប្រាស់ម្នាក់ឲ្យជាប់គុករហូតដល់ ១៣.២៧៥ឆ្នាំ ដោយសារតែបានបោកប្រាស់ជនរងគ្រោះចំនួនជាង ២.៦០០នាក់ ឲ្យដាក់លុយចំនួន ១៦០លានដុល្លាអាមេរិច នៅក្រុមហ៊ុនរបស់លោក។ នេះបើតាមការចេញផ្សាយរបស់ការសែតថៃ Bangkok Post។
ព្រះរាជអាជ្ញាថៃ បានបញ្ជាក់ប្រាប់តុលាការថា ចាប់តាំងពីឆ្នាំ ២០១៥ ដល់ ២០១៦ Phudit Kittitradilok និងបក្សពួក បានរៀបចំសិក្ខាសាលា ដើម្បីអញ្ជើញមនុស្សចូលរួមវិនិយោគជាមួយនឹងក្រុមហ៊ុនរបស់លោក ដោយពួកគេបានប្រាប់ថា ជាការវិនិយោគទុនលើ ផលិតផលថែរក្សាសម្រស់ ឡានមួយទឹក ការនាំចេញ អចលនទ្រព្យ និងអត្រាប្តូរប្រាក់។
ពួកគេបានប្រកាសថា ពួកគេនឹងឲ្យការប្រាក់ប ១ភាគរយជារៀងរាល់សប្តាហ៏ បូករួមនឹង ៥ភាគរយបន្ថែមទៅដល់អ្នកទាំងឡាយណា ដែលបានទាក់ទាញឲ្យមានការវិនិយោគលុយបន្ថែមថ្មីទៀត។
តុលាការបានរកឃើញថា ជនឆបោកឈ្មោះ Phudit Kittitradilok អាយុ ៣៤ឆ្នាំ បានប្រព្រឹត្តបទឆបោកចំនួន ២.៦៥៣ករណី ហើយក្នុងមួយករណីតុលាការកាត់ទោសលោកឲ្យជាប់គុក ៥ឆ្នាំ ដូច្នេះទោសសរុបរបស់លោកគឺ មានចំនួន ១៣.២៦៥ឆ្នាំ។
តុលាការក៍បានរកឃើញថា Phudit Kittitradilok មានទោសពីបទលាងលុយកខ្វក់ផងដែរ ហើយត្រូវបានកាត់ទោសឲ្យជាប់គុក ១០ឆ្នាំបន្ថែមទៀត ដូច្នេះទោសរបស់លោកគឺឡើងដល់ ១៣.២៧៥ឆ្នាំ។
តែដោយសារតែលោកបានសារភាព និងសហការណ៏ តុលាការបានបន្ថយទោសរបស់លោកពាក់កណ្តាលមកត្រឹម ៦.៦៣៧ឆ្នាំ និង ៦ខែវិញ។
ទោះបីយ៉ាងណាក៍ដោយ លោកទំនងជាជាប់គុកត្រឹមតែ ២០ឆ្នាំប៉ុណ្ណោះ ខណៈដែលក្រមព្រហ្មទណ្ឌថៃ បានកំណត់ថា ទោសទណ្ឌច្រើនបំផុតសំរាប់ការរំលោភច្បាប់គឺមានចន្លោះពី ៣ទៅ ១០ឆ្នាំ៕ សុភ័ក្ត្រ
