នៅថ្ងៃ២៥ ខែមិថុនា ឆ្នាំ២០១៩ ក្រុមប្រឹក្សាដើម្បីអភិវឌ្ឍន៍យុវជននៃក្រសួងបរិស្ថាន បានដឹកនាំសិក្ខាកាមចុះទស្សនកិច្ចសិក្សានៅតំបន់ការពារទេសភាពបឹងលំកុដ។ ទស្សនកិច្ចសិក្សារបស់យុវជន រៀបចំឡើងក្នុងគោលបំណងផ្ដល់ឱកាសឱ្យសិក្ខាកាមចុះជួបផ្ទាល់ជាមួយអាជ្ញាធរមូលដ្ឋាន គណៈកម្មការសហគមន៍ និងស្វែងយល់បន្ថែមពីការគ្រប់គ្រងរបស់សហគមន៍ ភូមិសាស្ត្រ និងជួយផ្សព្វផ្សាយពីសក្ដានុពលទេសចរណ៍នៅតំបន់ការពារធម្មជាតិ។
សូមបញ្ជាក់ថា ដើម្បីឆ្លើយតបទៅនឹងតម្រូវការ នៃការលើកកម្ពស់សមត្ថភាពដល់មន្ត្រីរាជការជាយុវជន និងជាអ្នកបន្តវេនជំនាន់ក្រោយរបស់ក្រសួងឱ្យកាន់តែមានសមត្ថភាពខ្ពស់ ក្នុងការដោះស្រាយកិច្ចការចំពោះមុខឱ្យទទួលបានប្រសិទ្ធភាព និងប្រសិទ្ធផលខ្ពស់ ក្រុមប្រឹក្សាដើម្បីអភិវឌ្ឍន៍យុវជនក្រសួងបរិស្ថានបានជ្រើសយកប្រធានបទស្ដីពី ការគ្រប់គ្រងតំបន់ការពារធម្មជាតិ និងជ្រើសរើសទីតាំងភូមិសាស្ត្រខេត្តរតនគិរី ដើម្បីដឹកនាំសិក្ខាកាមចុះទស្សនកិច្ចសិក្សា ជួបផ្ទាល់ជាមួយមន្ត្រីជំនាញ អាជ្ញាធរដែនដី គណៈកម្មការសហគមន៍ ដើម្បីស្វែងយល់ពីតួនាទី ភារកិច្ច ចំណុចខ្លាំង ចំណុចខ្សោយ បញ្ហាប្រឈម ដំណោះស្រាយ យុទ្ធសាស្ត្រ និងយុទ្ធវិធីផ្សេងៗ ក្នុងការគ្រប់គ្រងតំបន់ការពារធម្មជាតិក្នុងភូមិសាស្ត្រខេត្តរតនគិរី ក្នុងនោះ មានការគ្រប់គ្រងសហគមន៍តំបន់ការពារធម្មជាតិសាមុទ្រលើ និងសាមុទ្រក្រោម និងសហគមន៍តំបន់ការពារទេសភាពបឹងលំកុដ។
នៅក្នុងពេលទស្សនកិច្ចសិក្សានោះ អ្នកចូលរួមទាំងអស់ បានរួមមតិគ្នា ចូលរួមជាបច្ច័យសរុបចំនួន ៦៩០ ០០០រៀល និង៥៣ដុល្លារអាមេរិក ដើម្បីសាងសង់រោងលោកតាកុដ ទុកជាស្នាដៃ និងទីកន្លែងគោរពបូជាតាមជំនឿសាសនាប្រជាពលរដ្ឋនៅមូលដ្ឋាន៕ ដោយ៖កូឡាប
