(បាងកក, ប្រទេសថៃ)៖ លោក ប៉ាន សូរស័ក្តិ រដ្ឋមន្ត្រីក្រសួងពាណិជ្ជកម្ម បានចូលរួមវេទិកា កម្ពុជា-ឡាវ-មីយ៉ាន់ម៉ា-វៀតណាម-ថៃ (CLMVT) ក្រោមប្រធានបទ CLMVT ជាមូលដ្ឋាននៃសង្វាក់តម្លៃបន្ថែមថ្មីសម្រាប់អាស៊ី “CLMVT Forum 2019: CLMVT as the New Value Chain Hub of Asia” នៅទីក្រុងបាងកក ប្រទេសថៃ ក្រោមអធិបតីភាព លោក ប្រាយុទ្ធ ច័ន្ទ អូឆា នាយករដ្ឋមន្ត្រីថៃ និងមានការចូលរួមបណ្តាប្រទេសដែលជាសមាជិក កាលពីថ្ងៃទី២៤ ខែមិថុនា ឆ្នាំ២០១៩ ។ គោលបំណងចម្បងនៃវេទិកានេះ គឺដើម្បីបញ្ជាក់អំពីសក្តានុពលសេដ្ឋកិច្ច និងឧបសគ្គនានា នៅក្នុងតំបន់ CLMVT ។
លោករដ្ឋមន្ត្រី បានចូលរួមកិច្ចសន្ទនារដ្ឋមន្ត្រីនៃប្រទេស CLMVT និងបានគួរបញ្ជាក់ថាបច្ចុប្បន្នប្រជាជនសរុបក្នុងតំបន់ CLMVT មានប្រមាណ ២៦៧ លាននាក់ ជាមួយនឹងកំណើនផលិតផលក្នុងស្រុកសរុប (GDP) ស្មើនឹង ៥.១% គិតត្រឹមឆ្នាំ២០១៨ និងលំហូរវិនិយោគបរទេសផ្ទាល់ (FDI) ស្មើនឹង៧.២%។ ប្រទេស CLMVT មានលក្ខណៈភូមិសាស្ត្រ និងស្ថេរភាពម៉ាក្រូសេដ្ឋកិច្ចល្អ តម្រូវឲ្យប្រទេសសមាជិកបង្កើនទំនាក់ទំនងល្អ និងលើកយកយន្តការចាំបាច់នានា ដើម្បីទាញយកផលចំណេញពីការធ្វើពាណិជ្ជកម្មក្នុងតំបន់របស់ខ្លួន សំដៅទាក់ទាញដៃគូអភិវឌ្ឍន៍នានាបន្ថែមទៀត។
លោករដ្ឋមន្ត្រី បានគូសបញ្ជាក់ទៀតថា បណ្តាប្រទេស CLMVT គួរសហការគ្នាក្នុងការដាក់ចេញនូវវិស័យដែលទទួលផលប៉ះពាល់ពីសង្គ្រាមពាណិជ្ជកម្ម ព្រមទាំងពង្រឹងសាមគ្គីភាពនៅក្នុងតំបន់ CLMVT ផ្អែកលើមូលដ្ឋានឈ្នះ ឈ្នះ សំដៅឆ្លើយតបទៅនឹងតម្រូវការចាំបាច់ និងសក្តានុពលភាពនៃប្រទេសជាសមាជិក សំដៅធ្វើម្ចាស់ពិតប្រាកដលើប្រជាជាតិ CLMVT ទាំងអស់៕ ដោយ៖កូឡាប